சாவேரி

சாவேரி இராகம் கருநாடக இசையில் பயன்படும் இராகங்களில் ஒன்றாகும். இது 15வது மேளகர்த்தா இராகமாகிய, "அக்னி" என்றழைக்கப்படும் 3வது சக்கரத்தின் 3 வது மேளமாகிய மாயாமாளவகௌளையின் ஜன்னிய இராகம் ஆகும். எப்போதும் பாடக் கூடிய இவ்விராகம் ஔடவ- சம்பூர்ண இராகம் ஆகும். பழைமையான இவ்விராகம் கருணைச் சுவையை வெளிப்படுத்தும்.

இலக்கணம்

சாவேரி ஆரோகணச் சுரங்கள் C யிலிருந்து தொடக்கம்

சாவேரி அவரோகணச் சுரங்கள் C யிலிருந்து தொடக்கம்

ஆரோகணம்:	ஸ ரி1 ம1 ப த1 ஸ்
அவரோகணம்:	ஸ் நி3 த1 ப ம1 க3 ரி1 ஸ

• இந்த இராகத்தில் ஷட்ஜம், சுத்த ரிஷபம் (ரி₁), அந்தர காந்தாரம் (க₃), சுத்த மத்திமம்(ம₁), பஞ்சமம், சுத்த தைவதம் (த₁), காகலி நிஷாதம் (நி₃) ஆகிய சுரங்கள் வருகின்றன.

• ஆரோகணத்தில் க, நி வர்ஜம். இது உபாங்க இராகம் ஆகும்.

இதர அம்சங்கள்

• பல்லவி சேஷய்யர் இந்த இராகத்தை எட்டு மணித்தியால நேரம் பாடியதாக சொல்லப்படுகின்றது

• பஞ்சம வர்ஜ சுரக்கோர்வைகளும், தாட்டு சுரக்கோர்வைகளும் இவ்விராகத்திற்கு அழகைக் கொடுக்கின்றன.

• இவ்விராகத்தின் ஆரோகண, அவரோகண முறையை 22வது மேளத்தில் கையாண்டால் சாலகபைரவியும், 28வது மேளத்தில் கையாண்டால் யதுகுலகாம்போதியும், 29வது மேளத்தில் கையாண்டால் ஆரபியும் கிடைப்பதைக் காணலாம்.

உருப்படிகள்

1. வர்ணம்: "ஸரஸூட" - ஆதி - கொத்தவாசல் வெங்கடராமய்யர்
2. கிருதி : "ஸ்ரீராஜகோபால" - ஆதி - முத்துசுவாமி தீட்சிதர்
3. கிருதி : "சம்கரி சம்குரு" - ரூபகம் - சியாமா சாஸ்திரிகள்
4. கிருதி : "முருகா முருகா" - மிஸ்ரசாபு - பெரியசாமி தூரன்
5. கிருதி : "தரிதாபுலேக" - ஆதி - தியாகராஜர்.
6. கிருதி : "ராமபாண" - ஆதி - தியாகராஜர்
7. கிருதி : "துளசிஜகத்ஜனனி " - ரூபகம் - தியாகராஜர்
8. கிருதி : "எந்த நேர்ச்சின" - ஆதி - பட்டணம் சுப்பிரமணிய ஐயர்
9. கிருதி : "ஸ்ரீகாமகோடி பீட ஸ்திதே" - ஆதி - மைசூர் சதாசிவராயர்
10. கிருதி : "நானே முழுதும்" - ரூபகம் - முத்துத் தாண்டவர்
11. கிருதி : "வர்மமா என்மீதில்" - ரூபகம் - ஆனை-ஐயா
12. பதம் : "ஏமா தெலியது" - திரிபுடை - சேத்ரக்ஞர்

இவற்றையும் பார்க்கவும்

• ஜன்னிய இராகங்களின் பட்டியல் - அகரவரிசைப் பகுப்பு