உள்ளடக்கத்துக்குச் செல்

வெள்ளை இராசா

கட்டற்ற கலைக்களஞ்சியமான விக்கிப்பீடியாவில் இருந்து.
வெள்ளை இராசா
Rajah of Sarawak
முன்னாள் மன்னராட்சி
ஜேம்சு புரூக்
முதல் வெள்ளை இராசா
சரவாக் இராச்சியம்
முதல் மன்னர் ஜேம்சு புரூக்
கடைசி மன்னர் சார்லசு வைனர் புரூக்
Style மேன்மைக்கு உரிய
அலுவல் வசிப்பிடம் ஆஸ்தானா சரவாக்
மன்னராட்சி துவங்கியது 1841
மன்னராட்சி முடிவுற்றது 1946

வெள்ளை இராசா, (ஆங்கிலம்: White Rajahs; மலாய்: Raja Putih Sarawak) என்பது சரவாக் மாநிலத்தில், சரவாக் இராச்சியம் எனும் ஆட்சியை நிறுவிய ஒரு பிரித்தானியக் குடும்பத்தின் வம்ச முடியாட்சி. அதுவே ஒரு முன்னாள் மன்னராட்சி.

போர்னியோ தீவின் வடமேற்குப் பகுதியில் சரவாக் சுல்தானகம் எனும் சரவாக் இராச்சியத்தை (Raj of Sarawak) உருவாக்கிய வம்சாவழியினர்.

புரூணை சுல்தானகத்தில் இருந்து ஜேம்சு புரூக் (James Brooke) எனும் பிரித்தானியர் பெற்ற சில பகுதிகளைக் கொண்ட ஒரு சுதந்திர நாடாக சரவாக் இராச்சியம் உருவாக்கப்பட்டது.

பொது

[தொகு]

1840-ஆம் ஆண்டுக் காலக் கட்டத்தில், சரவாக்கை ஆட்சி செய்யத் தொடங்கிய புரூக் அரசக் குடும்பத் தலைவரையும்; சாதாரண புரூக் குடும்பத்தைச் சார்ந்தவர்களையும்; வேறுபடுத்திக் காட்டுவதற்காக வெள்ளை இராசா எனும் அடைமொழி பயன்படுத்தப்பட்டது.

ஜேம்சு புரூக் என்பவர் அதன் முதல் இராசாவாக ஆட்சி செய்தார். 1841-ஆம் ஆண்டில் இருந்து 1868-ஆம் ஆண்டு, அவர் இறக்கும் வரையில் சரவாக்கை ஆட்சி செய்தார்.[1]

புரூணை சுல்தானகம்

[தொகு]
கூச்சிங்கிற்கு அருகில் புரூக் நினைவகம்

1800-ஆம் ஆண்டுகளில், சரவாக் நிலப்பகுதி புரூணை சுல்தானகத்திற்கு சொந்தமான ஒரு காலனியாக இருந்தது. 1946-ஆம் ஆண்டு சரவாக்கைப் பிரித்தானிய அரசாங்கம் எடுத்துக் கொள்ளும் வரையில் சரவாக் இராச்சியத்தை வெள்ளை இராசாக்கள் 95 ஆண்டு காலம் ஆட்சி செய்தார்கள்.[2]

ஜேம்சு புரூக் முதன்முதலில் போர்னியோ தீவிற்கு வந்தபோது, சரவாக் நிலப்பகுதி புருணை சுல்தானகத்தின் அடிமை மாநிலமாக இருந்தது. அரசாங்க அமைப்பு முறை புரூணை அரசாங்க நிர்வாகத்தை அடிப்படையாகக் கொண்டு இயங்கி வந்தது.[3]

பொதுச்சேவை சீர்த்திருத்தங்கள்

[தொகு]

பிரித்தானிய அரசாங்க நிர்வாக அமைப்பைப் போல சரவாக் அரசாங்க நிர்வாகத்தையும் புரூக் மறுசீரமைத்தார். இறுதியில் சரவாக அரசாங்கத்தில் ஒரு பொதுச் சேவையையும் உருவாக்கினார்.

ஐரோப்பிய அதிகாரிகளை, குறிப்பாக பிரித்தானிய அதிகாரிகளை மாவட்டத்தின் வெளிமாநிலங்களை நிர்வகிப்பதற்கு நியமித்தார். ராஜா ஜேம்சு புரூக் மற்றும் அவரின் வாரிசுகளால், சரவாக் பொதுச் சேவைத் துறை தொடர்ந்து சீர்திருத்தம் செய்யப்பட்டது.

வெள்ளை இராசா வம்சாவழியினர்

[தொகு]
பெயர் தோற்றம் பிறப்பு இறப்பு
ஜேம்சு புரூக்
(1841–1868)
29 ஏப்ரல் 1803, இந்தியா 11 ஜூன் 1868, இங்கிலாந்து
ஜோன் புரூக்
Rajah Muda of Sarawak
(1859–1863)
1823, இங்கிலாந்து 1 டிசம்பர் 1868, இங்கிலாந்து
சார்லஸ் புரூக்
(1868–1917)
3 ஜுன் 1829, இங்கிலாந்து 17 மே 1917, இங்கிலாந்து
சார்லசு வைனர் புரூக்
(1917–1946)
26 செப்டம்பர் 1874, இங்கிலாந்து 9 மே 1963, இங்கிலாந்து
பெர்த்திராம் புரூக்
Tuan Muda of Sarawak
(1917–1946)
8 ஆகஸ்டு 1876, சரவாக் 15 செப்டம்பர் 1965, இங்கிலாந்து
அந்தோனி புரூக்
Rajah Muda of Sarawak
(1939–1946)
10 டிசம்பர் 1912, இங்கிலாந்து 2 மார்ச் 2011, நியூசிலாந்து

மலாய் முடியாட்சியின் பழக்க வழக்கங்கள்

[தொகு]
கூச்சிங்கில் ராஜா புரூக் தன் மனைவியின் நினைவாக கட்டிய மார்கிரேட்டா கோட்டை
ராஜா புரூக் அவர் காலத்தில் கட்டிய அஸ்தானா அரண்மனை

இராஜா ஜேம்சு புரூக், மலாய் முடியாட்சியின் பல பழக்க வழக்கங்கள் மற்றும் மரபுச் சின்னங்களைத் தக்க வைத்துக் கொண்டார். மேலும் அவற்றை தன்னுடைய முழுமையான ஆட்சி பாணியுடன் இணைத்துக் கொண்டார்.

இராஜா ஜேம்ஸ் புரூக்கிற்கு சட்டங்களை இயற்றவும்; சட்டங்களை அறிமுகப்படுத்தவும் அதிகாரம் இருந்தது. அதே சமயத்தில் தலைமை நீதிபதியாகச் செயல்படவும் அதிகாரம் இருந்தது. ஒரு நாட்டின் மன்னருக்கான அனைத்து உரிமைகளும் வெள்ளை ராஜா ஜேம்சு புரூக்கிடம் இருந்தது.

போர்னியோ நிறுவனம்

[தொகு]

சரவாக்கின் பழங்குடி மக்கள் மேற்கத்திய வணிகர்களால் சுரண்டப் படுவதைத் தடுக்க வெள்ளை ராஜாக்கள் உறுதியான நடவடிக்கைகளை எடுத்தனர்.

போர்னியோ நிறுவனம் (Borneo Company) சரவாக்கில் செயல்படுவதற்கு அனுமதி வழங்கினர். சீனத் தொழிலாளர்கள் கொடுத்த தொல்லைகளின் போது வெள்ளை ராஜாக்களுக்கு இந்த போர்னியோ நிறுவனம் இராணுவ ஆதரவை வழங்கி வந்தது.

இராஜா சார்லஸ் புரூக், சரவாக் ரேஞ்சர்ஸ் (Sarawak Rangers) எனும் ஒரு சிறிய துணை இராணுவப் படையை உருவாக்கினார். இந்தச் சிறிய இராணுவம், சரவாக் இராச்சியம் முழுவதும் இருந்த பல கோட்டைகளைப் பாதுகாத்தது. இராஜாவின் தனிப்பட்ட பாதுகாவல் படையாகவும் செயல்பட்டது.

சுவடுகள்

[தொகு]

வெள்ளை இராஜா வம்சத்தின் கட்டிடக்கலை பாரம்பரியத்தை, இன்றும்கூட சரவாக்கில் உள்ள 19-ஆம் நூற்றாண்டு காலனித்துவப் பாரம்பரியக் கட்டிடங்களில் காணலாம்.

கூச்சிங் நகரில் உள்ள ஆஸ்தானா சரவாக் எனும் ஆளுநரின் இல்லம்; சரவாக் அருங்காட்சியகம் (Sarawak Museum); கூச்சிங் பழைய நீதிமன்றம் (Old Courthouse); மார்கெரிட்டா கோட்டை (Fort Margherita); கூச்சிங் சதுரக் கோட்டை (Square Fort); புரூக் நினைவுச் சின்னம் (Brooke Memorial) போன்றவற்றில் அந்தக் கட்டிடக்கலை வடிவங்களைக் காணலாம். ராஜா சார்லஸ் காலத்தில் நிறுவப்பட்ட புரூக் கப்பல்துறை (The Brooke Dockyard) இன்றும் இயங்கி வருகிறது.

ஜேம்ஸ் புரூக்கின் கடைசி வாரிசு

[தொகு]
வெள்ளை ராஜாக்களின் கடைசி வாரிசு ஜேசன் டெஸ்மண்ட் அந்தோனி புரூக்

சரவாக் மாநில அரசாங்கத்துடன் மற்றும் சரவாக் மக்களுடனும் புரூக் வம்சாவழியினர் (Brooke Dynasty) இன்றும் வலுவான உறவுகளைப் பேணி வருகின்றனர்.

அந்தோனி புரூக்கின் பேரன் ஜேசன் டெஸ்மண்ட் அந்தோனி புரூக் (Jason Desmond Anthony Brooke), வயது 36, இன்றும் கூச்சிங்கில், பல அரசு விழாக்களுக்கு அழைக்கப் படுகிறார். சிறப்பு செய்யப் படுகிறார். இவர் இலண்டனில் தங்கி இருந்தாலும் சரவாக்கிற்கு அடிக்கடி வந்து போகிறார்.[4]

ஜேம்சு புரூக் அறக்கட்டளை

[தொகு]

இவர் ஜேம்சு புரூக் அறக்கட்டளையை நடத்தி வருகிறார்.[5] சரவாக் பாரம்பரிய நிகழ்ச்சிகளில் சிறப்பு விருந்தினராய்க் கலந்து கொள்கிறார். சரவாக் கழகத்தின் (Sarawak Association) தலைவராக உள்ளார்.[4]

2016 செப்டம்பர் மாதம் சரவாக் அரசாங்கம், கூச்சிங்கில் உள்ள சரவாக் மாநில நூலகம்; சரவாக் அருங்காட்சியகம் ஆகியவற்றின் முக்கியமான குறிப்புகளில் கையெழுத்திடுவதற்கான பொறுப்புகளையும் இவரிடம் வழங்கியது.[6][7]

மேற்கோள்கள்

[தொகு]
  1. James, Lawrence (1997) [1994]. The Rise and Fall of the British Empire. New York: St. Martin's Griffin. pp. 244–245. பன்னாட்டுத் தரப்புத்தக எண் 0-312-16985-X.
  2. Kaur, Amarjit (February 1995). "The Babbling Brookes: Economic Change in Sarawak 1841–1946". Modern Asian Studies (Cambridge University Press) 29 (1): 65–109, 73. doi:10.1017/s0026749x00012634. பன்னாட்டுத் தர தொடர் எண்:0026-749X. https://archive.org/details/sim_modern-asian-studies_1995-02_29_1/page/65. 
  3. Chew, Daniel (1990). Chinese Pioneers on the Sarawak Frontier 1841–1941. Singapore: Oxford University Press. பன்னாட்டுத் தரப்புத்தக எண் 0-19-588915-0.
  4. 4.0 4.1 "The Brooke Heritage Trust". Brooketrust.org. பார்க்கப்பட்ட நாள் 2022-01-30.
  5. "Ensuring the Brooke legacy lives on". The Borneo Post. 14 February 2016. Archived from the original on 2020-11-30. பார்க்கப்பட்ட நாள் 2018-07-20.
  6. "Brooke records now available to public". New Sarawak Tribune. Archived from the original on 2014-02-22. பார்க்கப்பட்ட நாள் 2014-02-04.
  7. "Fort Margherita to house historical artefacts – BorneoPost Online | Borneo , Malaysia, Sarawak Daily News | Largest English Daily In Borneo". Theborneopost.com. 2012-12-12. பார்க்கப்பட்ட நாள் 2014-02-04.

வெளி இணைப்புகள்

[தொகு]
"https://ta.wikipedia.org/w/index.php?title=வெள்ளை_இராசா&oldid=3902574" இலிருந்து மீள்விக்கப்பட்டது