கல்லணை

கட்டற்ற கலைக்களஞ்சியமான விக்கிப்பீடியாவில் இருந்து.
தாவிச் செல்லவும்: வழிசெலுத்தல், தேடல்
கல்லணை
Grand Anicut kallanai.JPG
கல்லணையின் தற்போதையத் தோற்றம்
கல்லணை is located in தமிழ்நாடு
கல்லணை அமைவிடம்
அமைவிடம் திருச்சிராப்பள்ளியில் இருந்த 15 கிமி, தமிழ்நாடு
புவியியல் ஆள்கூற்று 10°49′49″N 78°49′08″E / 10.830166°N 78.818784°E / 10.830166; 78.818784ஆள்கூறுகள்: 10°49′49″N 78°49′08″E / 10.830166°N 78.818784°E / 10.830166; 78.818784
திறந்தது 2 ஆம் நூற்றாண்டு
அணையும் வழிகாலும்
வகை நீர்தேக்கம்
Impounds காவிரி ஆறு, வெண்ணாறு, புதுஆறு, கொள்ளிடம்
நீளம் 0.329 km (1,079 ft)
அகலம் (base) 20 m (66 ft)
கல்லணை
கல்லணையில் காவிரி

கல்லணை இந்தியாவின் தமிழ்நாட்டில் உள்ள உலக பழமை வாய்ந்த அணையாகும். இது காவிரி மீது கட்டப்பட்டுள்ளது. இது திருச்சிக்கு மிக அருகில் உள்ளது.திருச்சியில் அகண்ட காவேரி என அறியப்படும் காவிரி முக்கொம்புவில் உள்ள மேலணையில் காவேரி, கொள்ளிடம் என இரண்டாக பிரிகிறது. அதில் காவிரி ஆறு கிளை கல்லணையை வந்தடைகிறது.

கல்லணை காவிரியை காவிரி ஆறு, வெண்ணாறு, புதுஆறு, கொள்ளிடம் என 4 ஆக பிரிக்கிறது.

பாசன காலங்களில் காவிரி, வெண்ணாறு, புதுஆறு ஆகியவற்றிலும், வெள்ள காலங்களில் கொள்ளிடத்திலும் தண்ணிர் கல்லணையில் இருந்து திறந்துவிடப்படும். அதாவது வெள்ள காலங்களில் கல்லணைக்கு வரும் நீர் காவிரிக்கு இடது புறம் ஓடும் கொள்ளிடம் ஆற்றில் (முக்கொம்புவில் காவிரியில் இருந்து பிரிந்த கிளை ஆறு ) திருப்பி விடப்படும். எனவே டெல்டா மாவட்டத்தின் பல இலட்சம் ஏக்கர் நிலம் வெள்ளத்தில் இருந்து காப்பற்றப்படுகிறது.

வரலாறு[தொகு]

இந்த அணை கரிகாலன் என்ற சோழ மன்னனால் 2 ஆம் நூற்றாண்டில் கட்டப்பட்டது.[1][2][3][4] தற்போதுள்ள அணைகளில் கல்லணையே மிக பழமையானது எனவும், தற்போதும் புழக்கத்தில் உள்ளது எனவும் அறியப்படுகிறது. இதுவே உலகின் மிகப்பழமையான நீர்ப்பாசனத் திட்டம் என்றும் கூறப்படுகிறது. மணலில் அடித்தளம் அமைத்து கல்லணையைக் கட்டிய பழந்தமிழர் தொழில்நுட்பம் இன்று வரை வியத்தகு சாதனையாகப் புகழப் படுகிறது.[5]

கல்லணையின் நீளம் 1080 அடி அகலம் 66 அடி உயரம் 18 அடி. இது நெளிந்து வளைந்த அமைப்புடன் காணப்படுகிறது. கல்லும் களிமண்ணும் மட்டுமே சேர்ந்த ஓர் அமைப்பு 1900 ஆண்டுகளுக்கு மேலாக காவிரி வெள்ளத்தைத் தடுத்து நிறுத்தி வருவது அதிசயமே ஆகும். 1839 இல் அணையின் மீது பாலம் ஒன்று கட்டப்பட்டது. பல இடங்களிலிருந்து தினந்தோறும் ஏராளமானோர் இவ்வணையைக் காண வருவதால், இது ஒரு சுற்றுலாத் தலமாகவும் விளங்குகிறது.

அணை கட்டப்பட்ட தொழில்நுட்பம்[தொகு]

பல நூற்றாண்டுகளுக்கு முன்பு தமிழகத்தை ஆண்ட கரிகால சோழன் காவிரியில் அடிக்கடி பெருவெள்ளம் வந்து மக்கள் துயரப்பட்டதைக் கண்டு அதைத் தடுக்க காவிரியில் ஒரு பெரிய அணையைக் கட்ட முடிவெடுத்தான் . ஆனால், அது சாதாரன விஷயம் அல்லவே . ஒரு நொடிக்கு இரண்டு லட்சம் கனநீர் பாயும் காவிரியின் தண்ணீர் மேல் அணைக்கட்டுவதற்கும் ஒரு வழியைக் கண்டுபிடித்தார்கள் தமிழர்கள் .

நாம் கடல் தண்ணீரில் நிற்கும்போது அலை நம் கால்களை அணைத்துச் செல்லும். அப்போது பாதங்களின் கீழே குறுகுறுவென்று மணல் அரிப்பு ஏற்பட்டு நம் கால்கள் இன்னும் மண்ணுக்குள்ளே புதையும் . இதைத்தான் சூத்திரமாக மாற்றினார்கள் அவர்கள் . காவிரி ஆற்றின் மீது பெரிய பெரிய பாறைகளைக் கொண்டுவந்து போட்டார்கள் . அந்தப் பாறைகளும் நீர் அரிப்பின் காரணமாக கொஞ்சம் கொஞ்சமாக மண்ணுக்குள் போகும் . அதன் மேல் வேறொரு பாறையை வைப்பார்கள்.

நடுவே தண்ணீரில் கரையாத ஒருவித ஒட்டும் களி மண்ணைப் புதிய பாறைகளில் பூசிவிடுவார்கள் . இப்போது இரண்டும் ஒட்டிக்கொள்ளும் . இப்படிப் பாறைகளின் மேல் பாறையைப் போட்டு, படுவேகத்தில் செல்லும் காவிரி நீர் மீது கட்டிய அணைதான் கல்லணை.

சர் ஆர்தர் காட்டன் பங்களிப்பு[தொகு]

இந்திய நீர் பாசனத்தின் தந்தை என அறியப்படும் சர் ஆர்தர் காட்டன் என்ற ஆங்கில பொறியாளர் கல்லணையை பல ஆண்டுகாலம் ஆராய்ந்தார்.

கல்லணை பலகாலம் மணல் மேடாகி நீரோட்டம் தடைப்பட்டது. ஒருங்கிணைந்த தஞ்சை மாவட்டம் தொடர்ச்சியாக வெள்ளம் மற்றும் வறட்சியால் வளமை குன்றியது. இந்த சூழலில் 1829 இல் காவிரி பாசன பகுதி தனி பொறுப்பாளராக ஆங்கிலேய அரசால் சர் ஆர்தர் காட்டன் நியமிக்கப்பட்டார்.

இவர்தான் பயனற்று இருந்த கல்லணையில் தைரியமாக சிறு சிறு பகுதியாய் பிரித்து எடுத்து மணல் போக்கிகளை அமைத்தார். அப்போது, கல்லணைக்கு அமைக்கப்பட்ட அடித்தளத்தை ஆராய்ந்த அவர் பழந்தமிழரின் அணை கட்டும் திறன் மற்றும் பாசன மேலாண்மையை உலகுக்கு எடுத்துக் கூறினார். கல்லணைக்கு 'கிரான்ட் அணைகட்' என்ற பெயரையும் சூட்டினார்.

கரிகால சோழன் மணிமண்டபம்[தொகு]

கரிகால சோழன் நினைவு மணிமண்டபம்
கரிகால சோழன் நினைவு மணிமண்டபம் அடிக்கல் நாட்டுவிழா

பல நூற்றாண்டுகளை கடந்தும் உறுதியோடு நிற்கும் கல்லணை தமிழர்களின் கட்டுமான திறனை காலங்களை கடந்தும் பறை சாற்றி கொண்டிருக்கிறது. பழமையான இந்த அணையையும், இதை கட்டிய கரிகால சோழனையும் கெளரவிக்க கல்லணை அருகே மணிமண்டபம் அமைத்து கரிகால சோழன் சிலையும் அமைக்கப்படும் என்று தமிழக அரசு அறிவித்தது. [6] அதன்படி கல்லணையில் இருந்து திருகாட்டுப்பள்ளி செல்லும் சாலையில் காவிரி ஆற்றின் இடது கரை ஓரத்தில் மணி மண்டபம் கட்டப்பட்டு வருகிறது.

இந்த மண்டபத்தில் நிறுவுவதற்காக பிரமாண்டமான கரிகால சோழன் சிலை சென்னையில் தயாராகி வருகிறது. பட்டத்து யானை மீது ராஜா வலம் வருவது போல் உருவாக்கப்படவுள்ளது. 8 அடி உயர யானை மீது 6 அடி உயரத்தில் கரிகால சோழன் அமர்ந்து இருப்பார். கையில் வைத்திருக்கும் செங்கோல் மீதும், தலையில் உள்ள கிரீடத்தின் மீதும் சோழர்களின் சின்னமான புலிக்கொடி பொறிக்கப்படும். [7] [8]

கல்லணை பற்றி சங்க கால சான்றுகள்[தொகு]

சங்ககாலத்தில் கரிகாலன் கல்லணை கட்டி காவிரியின் போக்கைக் கட்டுப்படுத்திக் கழனிகளிற் பாய்ச்சிச் செழிப்பை உண்டாக்கியதை பட்டினப்பாலை, பொருநர் ஆற்றுப்படை பாடல்களும், தெலுங்குச் சோழக் கல்வெட்டுகளும், திருவாலங்காட்டுச் செப்பேடுகளும் தெரிவிக்கின்றன.

படங்கள்[தொகு]


துணுக்கு[தொகு]

சர். ஆர்தர் காட்டன், கரிகாலன் கட்டிய இக்கல்லணையை "மகத்தான அணை" (Grand Anicut) என்ற பெயர் சூட்டி அழைத்தார்.[9].

மணிமண்டபம்[தொகு]

தமிழ்நாடு அரசு சார்பாக 12ம் தேதி பிப்ரவரி மாதம் புதன் கிழமை 2014ம் ஆண்டு கரிகால்சோழனுக்கு மணிமண்டபம் கட்டப்பட்டு, காணொலிகாட்சி மூலம் தமிழக முதல்வர் ஜெ. ஜெயலலிதா அவர்கள் சென்னையிலிருந்து திறந்துவைத்தார். இந்த மண்டபம் 4,090 சதுர அடி பரப்பில் அமைந்துள்ளது.[10]

மேற்கோள்கள்[தொகு]

  1. "Flowing waters for fertile fields". The Hindu (India). 29 August 2011. http://www.thehindu.com/life-and-style/kids/article2408778.ece. 
  2. Singh, Vijay P.; Ram Narayan Yadava (2003). Water Resources System Operation: Proceedings of the International Conference on Water and Environment. Allied Publishers. p. 508. ISBN 81-7764-548-X. http://books.google.com/books?id=Bge-0XX6ip8C&pg=PA508&dq=kallanai&sig=_bvXlOQqAftum2T7p_6McQJHgUk#PPA508,M1. 
  3. Syed Muthahar Saqaf (10 March 2013). "A rock solid dam that has survived 2,000 years". The Hindu. http://www.thehindu.com/todays-paper/tp-national/tp-tamilnadu/a-rock-solid-dam-that-has-survived-2000-years/article4494161.ece. பார்த்த நாள்: 13 November 2013. 
  4. Rita 2011, chpt. Small Field Big Crop.
  5. "This is the oldest stone water-diversion or water-regulator structure in the world". மூல முகவரியிலிருந்து 2007-02-06 அன்று பரணிடப்பட்டது. பார்த்த நாள் 2007-05-27.
  6. கல்லணை கட்டிய கரிகாலனுக்கு மணிமண்டபம்: ஜெ. அறிவிப்பு
  7. சென்னையில் தயாரான பிரமாண்ட கரிகாலன் சிலை: கல்லணை அருகே நிறுவப்படுகிறது
  8. கல்லணை கட்டிய கரிகாலனுக்கு நினைவு மண்டபம்: ஜெயலலிதா திறந்து வைத்தார்
  9. பக் 38, ப.கோமதிநாயகம் (மார்ச், 2000). தமிழகப் பாசன வரலாறு. ஸ்நேகா பதிப்பகம். பக். 87. ISBN 81-87371-07-2. 
  10. http://www.dinamalar.com/news_detail.asp?id=914838 தினமலர் பார்த்த நாள் 13.02.2014

வெளி இணைப்புகள்[தொகு]


"http://ta.wikipedia.org/w/index.php?title=கல்லணை&oldid=1753599" இருந்து மீள்விக்கப்பட்டது