பாலூட்டி

கட்டற்ற கலைக்களஞ்சியமான விக்கிப்பீடியாவில் இருந்து.
தாவிச் செல்லவும்: வழிசெலுத்தல், தேடல்
பாலூட்டி
புதைப்படிவ காலம்: 220–0 Ma
திராசிக் முதல் தற்போது வரை
மேல் இடது மூலையிலிருந்து வலஞ்சுழியாக:ஒட்டகச் சிவிங்கி, பொன்னிறப்பழ வௌவால், சிங்கம், முள்ளெலி
மேல் இடது மூலையிலிருந்து வலஞ்சுழியாக:ஒட்டகச் சிவிங்கி, பொன்னிறப்பழ வௌவால், சிங்கம், முள்ளெலி
உயிரியல் வகைப்பாடு
உலகம்: Eukarya
திணை:
(இராச்சியம்)
விலங்குகள்
தொகுதி: முதுகுநாணி
துணைத்தொகுதி: முதுகெலும்பி
உட்தொகுதி: தாடையுள்ளவை
பெருவகுப்பு: நான்கு காலிகள்
(unranked) பனிக்குடமுடையன
வகுப்பு பாலூட்டி (Mammalia)
லின்னேயஸ், 1758
Clades
மான் ஒரு பாலூட்டி விலங்காகும்.

பாலூட்டி (இலங்கை வழக்கு: முலையூட்டி) என்பது தமது குட்டிக்கு பால் கொடுக்கின்ற வெப்ப இரத்த விலங்குகள் அனைத்தையும் குறிக்கும். இவை உயிர் வாழ்வதற்குத் தேவையான வெப்பம் இவற்றின் உடலின் இயக்கத்தில் இருந்தே உருவாக்கப்படுகிறது. பாலூட்டிகள் தங்களின் தோலினுள் பால் சுரப்பிகளைக் கொண்டுள்ளன.

பெரும்பாலான பாலூட்டிகள் உயிருள்ள குட்டிகளை ஈனுகின்றன. மிகச்சில முட்டையிட்டு குஞ்சு பொறிக்கின்றன. பெரும்பாலான பாலூட்டிகள் நான்கு கால்களையும் தோலின் மீது முடியையும் கொண்டிருக்கின்றன.

பாலூட்டிகள் என்னும் வகுப்பில், 2008 ஆம் ஆண்டு அனைத்துலக இயற்கைக் காப்பு ஒன்றியத்தின் (IUCN)கணக்கெடுப்பின்படி 5488 பாலூட்டிகள் உள்ளன[1]; இதனை உலகம் தழுவிய 1,700 பாலூட்டியின அறிஞர்களின் உதவியுடன் தொகுத்துள்ளனர். பாலூட்டிகள் 1,229 பேரினங்களில 153 குடும்பங்களாக தொகுக்கப்பெற்று, 29 வரிசைகளில் அடங்குவதாக அமைந்துள்ளன[2]

புற அமைப்பியல்[தொகு]

பாலூட்டிகள் தாம் வாழும் சூழலுக்கேற்பத் தம்மைத் தகவமைத்துக்கொண்டு வெவ்வேறு தோற்ற இயல்புகளுடன் உள்ளன. எடுத்துக்காட்டாக கடலில் வாழும் பாலாட்டியான நீலத் திமிங்கலம் மீனின் உடலமைப்பை ஒத்துள்ளது. உடம்பில் உள்ள மயிர்த் தொகுதியும் பால் சுரப்பியும் பாலூட்டிகளை மற்ற விலங்குகளிடமிருந்து வேறுபடுத்திக் காட்டுகின்றன. பாலூட்டிகளின் உரோமமானது அவற்றின் உடலில் இருந்து வெப்பம் வெளியேறாமல் இருக்க உதவுகிறது. பால் சுரப்பிகள் என்பன மாறுபாடு அடைந்து வியர்வைச் சுரப்பிகளாகும். பாலுட்டிகளின் குட்டிகள் பிறந்து சில காலம் தாயின் பாலையே குடித்து வளர்கிறது.

வாழிடம்[தொகு]

பாலூட்டிகள் பலவேறுபட்ட வாழிடங்களில் வாழ்கின்றன. உயர்ந்த மலைகள், காடுகள், பனிப் பகுதிகள், வறண்ட பாலைவனங்கள், கடல், ஆறு போன்ற நீர்நிலைகள் முதலியவற்றில் பாலூட்டிகள் வாழ்கின்றன. வாழிடத்திற்கு ஏற்றவாறு தம்மைத் தகவமைத்துக் கொண்டும் உள்ளன. உயர்ந்த மலைகளில் வரையாடுகள் போன்ற ஆடுகளும் பனிப் பகுதிகளில் பனிக் கரடி, பாலைவனங்களில் ஒட்டகம் கடலில் ஓங்கில், திமிங்கலம், ஆறுகளில் நீர்நாய் காடுகள் சமவெளிகளில் மான்கள், புலி, சிங்கம் போன்ற விலங்குகளும் வாழ்கின்றன.

சில பாலூட்டிகள்[தொகு]

வௌவால்[தொகு]

வௌவால் பறக்கவல்ல முதுகெலும்புள்ள (முதுகெலும்பி) பாலூட்டி. பாலூட்டிகளில் பறக்கவல்ல ஒரே விலங்கு இவ்வௌவால்தான். இவ்விலங்கை வவ்வால் என்றும் வாவல் என்றும் அழைப்பர். இவ்வௌவால் இனத்தில் 1000க்கும் மேற்பட்ட வகைகள் உள்ளன. பாலூட்டிகளிலேயே இவை மட்டுமே 20% ஆக இருக்கலாம் என்று கருதப்படுகிறது. உயிரினங்களைத் தேர்ந்து வகைப்படுத்தும் அறிவியல் துறையாளர்களான வகையியலாளர்கள் வௌவால் இனத்தை கைச்சிறகிகள் எனப்படும் Chiroptera என்னும் வரிசையில் வைத்துள்ளார்கள். இவ்வௌவால்கள் பெரும்பாலும் (சுமார் 70%) எலி போன்ற சிறு முகம் (குறுமுகம்) உடையனவாகவும் பூச்சிகளையுண்பனவாகவும் உள்ளன.வௌவால்கள் பகல் பொழுது முழுவதும் தலைகீழாக தொங்கிக்கொண்டிருக்கும்.சூரியன் மறைந்த பின்னர் இவை உலவ ஆரம்பிக்கும்.இரவு நேரங்களிலேயே இவை உணவு உண்ணும்.

கரடி[தொகு]

கரடி (Bear), ஒரு ஊனுண்ணிப் பாலூட்டி விலங்கு. இவ்வினத்தைச் சேர்ந்த பனிக்கரடிகளும், கொடுங்கரடிகள் (Grizzly bear) என்னும் பழுப்பு நிறக்கரடிகளும். ஊனுண்ணிப் பாலூட்டிகள் யாவற்றினும் மிக பெரியது. ஆசியக் கருங்கரடி போன்ற சில சிறியவகைக் கரடிகள் அனைத்துண்ணிகளாக உள்ளன.துருவக் கரடிகள் பெரிய உருவத்தைக் கொண்டவை. இவை, பனி படர்ந்த துருவப் பகுதியில் எளிதில் கண்டுபிடிக்க முடியாத வகையில் வெண்மை நிறம் கொண்டவை. எஸ்கிமோக்களின் மொழியில் "ஆர்க்டோஸ் (Arctos) என்றால் கரடிகளின் பிரதேசம் என்று அர்த்தம். இதனால்தான் வட துருவப் பகுதிக்கு "ஆர்ட்டிக்' என்ற பெயர் வந்தது.

ஒட்டகம்[தொகு]

ஒட்டகம் என்பது பொதுவாக பாலைவனங்களில் வாழும் தாவர உண்ணி வகையைச் சேர்ந்த பாலூட்டி விலங்கு ஆகும். பொதுவாக ஒட்டகம் என்று அழைக்கப்படும் ஒட்டகப் பேரினத்தில் ஆறு சிற்றினங்கள் உள்ளன. இவை ஆசியா, வடக்கு ஆப்பிரிக்காவில் உள்ள பாலைநிலங்களை தாயகமாகக் கொண்டவை. இவை பொதுவாக 30 முதல் 50 ஆண்டுகள் வரை உயிர்வாழ்கின்றன.

பூனை[தொகு]

பூனை பாலூட்டி இனத்தைச் சேர்ந்த ஒரு ஊனுண்ணி ஆகும். இவை மனிதனால் பழக்கப்பட்டு வீடுகளில் வளர்க்கப்படுகின்றன. வீடுகளில் வளர்க்கப்படும் பூனைகள் சைவ உணவையும் உண்கின்றன. பூனைகள் பண்டைய எகிப்தில் வழிபாட்டு விலங்குகளாக இருந்து வந்ததால்,அவைகளை பொதுவாக வீட்டில் வளர்க்கப்பட்டு வணங்கினர்.பூனைகள் இறந்தால் அதற்கும் பிரமிடுகள் கட்டி, சில எலிகளையும் பாடம் செய்து எகிப்தியர்கள் புதைத்துள்ளனர்.அரசர்களுடன் அவர்களது பூனைகளுக்கும் பிரமிடுகளில் இடங்கள் ஒதுக்கப்பட்டது.

பசு[தொகு]

பசு என்பது பாலூட்டி இனத்தைச் சேர்ந்த ஒரு விலங்கு. பசுவினுடைய பால் பல சத்துக்கள் நிறைந்ததுள்ள காரணத்தினால் மனிதன் அதனை ஒரு முக்கிய உணவாகக் கொண்டுள்ளான். இந்தியக் கலாச்சாரத்தில் பசு போற்றப்படும் ஒரு விலங்காக உள்ளது. புராணங்களின்படி காமதேனுவும், நந்தினியும் தேவலோகப் பசுக்கள்.

நாய்[தொகு]

நாய் அனைத்துண்ணி பாலூட்டி வகையைச் சேர்ந்த ஒரு விலங்கு இனமாகும். இன்று பெரும்பாலும் மனிதர்களோடு வாழ்கின்றது. இன்றுள்ள வளர்ப்பு நாய்கள் ஏறத்தாழ 17,000 [3] ஆண்டுகளுக்கு முன் வாழ்ந்த மனிதன் ஓநாய்களைப் பழக்கி நாயினமாக வளர்த்தெடுக்கப்பட்டவை என்று கூறப்படுகிறது. மறைந்த உயிரினப் படிவத்தில் இருந்து பெற்ற டி என் ஏ (DNA) க்களைக் கொண்டு 150,000 [4][5] ஆண்டுகளுக்கு முன்னமேயே கூட நாய்கள் பழக்கப்பட்டிருக்கலாம் என எண்ண வாய்ப்பிருக்கின்றது என்பர்.

உசாத்துணை[தொகு]

  • பத்தாம் வகுப்பு அறிவியல் நூல், தமிழ்நாடு அரசு, முதல் பதிப்பு 2011

மேற்கோள்களும் அடிக்குறிப்புகளும்[தொகு]

  1. "Initiatives". The IUCN Red List of Threatened Species. IUCN (April, 2010).
  2. Wilson, D. E., and Reeder, D. M. (eds), ed (2005). Mammal Species of the World (3rd edition ed.). Johns Hopkins University Press. ISBN 0-801-88221-4. http://www.bucknell.edu/msw3. 
  3. McGourty, Christine (2002-11-22). "Origin of dogs traced". பிபிசி. http://news.bbc.co.uk/2/hi/science/nature/2498669.stm. பார்த்த நாள்: 2007-11-27. 
  4. Vilà, C. et al. (1997). Multiple and ancient origins of the domestic dog. Science 276:1687–1689. (Also "Multiple and Ancient Origins of the Domestic Dog")
  5. Lindblad-Toh, K, et al. (2005) Genome sequence, comparative analysis and haplotype structure of the domestic dog. Nature 438, 803–819.

இவற்றையும் பார்க்கவும்[தொகு]

"http://ta.wikipedia.org/w/index.php?title=பாலூட்டி&oldid=1599332" இருந்து மீள்விக்கப்பட்டது