உலகப் பாரம்பரியக் களம்

உலக பாரம்பரியக் களம் (World Heritage Site) என்பது, யுனெஸ்கோவின் உலக பாரம்பரியக் குழுவினால் நிர்வகிக்கப்படும் அனைத்துலக உலக பாரம்பரியங்கள் திட்டத்தின் பட்டியலில் உள்ளடக்கப்பட்டுள்ள ஒரு களம் ஆகும். இது, காடு, மலை, ஏரி, பாலைவனம், நினைவுச் சின்னம், கட்டிடம், நகரம் போன்ற எதுவாகவும் இருக்கலாம். யுனெஸ்கோவின் உலக பாரம்பரியக் குழு, நாடுகளின் பொதுக் குழுவினால் தெரிவு செய்யப்படும் 21 பிரதிநிதிகளைக் கொண்டிருக்கும்.

மனித இனத்தின் பொதுப் பாரம்பரியத்துக்கு இன்றியமையாத இயற்கை மற்றும் பண்பாட்டு முக்கியத்துவம் கொண்ட களங்களைப் பட்டியலிட்டு, அவற்றைப் பாதுகாப்பதே இத் திட்டத்தின் நோக்கமாகும். சில களங்களின் மேம்பாட்டுக்காக உலக பாரம்பரிய நிதியத்தில் இருந்து நிதி உதவி வழங்கப்படுவதும் உண்டு. 16 நவம்பர் 1972 ஆம் ஆண்டில் தொடங்கப்பட்ட இத் திட்டத்தை இதுவரை 184 நாடுகள் கையெழுத்திட்டு ஏற்றுக்கொண்டுள்ளன.

2007 ஆம் ஆண்டு நிலைவரப்படி இது வரை 851 களங்கள் பட்டியலிடப்பட்டுள்ளன. 142 நாடுகளில் அமைந்துள்ள இக்களங்களில், 660 பண்பாட்டுக் களங்களும், 166 இயற்கைசார் களங்களும், 25 கலப்பு இயல்புக் களங்களும் அடங்குகின்றன.

புவியியற் பகுதிகள் அடிப்படையில் பாரம்பரியக் களங்களின் பரம்பலைக் கீழுள்ள அட்டவணையிற் காணலாம்.

வலயம்	இயற்கை	பண்பாடு	கலப்பு	மொத்தம்	%
ஆபிரிக்கா	33	38	3	74	9%
அரபு நாடுகள் மற்றும் இஸ்ரேல்	3	58	1	62	7%
ஆசியா-பசிபிக்	45	126	11	182	21%
ஐரோப்பாவும் வட அமெரிக்காவும்.	51	358	7	416	49%
லத்தீன் அமெரிக்காவும் கரிபியனும்	34	80	3	117	14%

உலக பாரம்பரியக் களங்களின் பட்டியல்

• உலக பாரம்பரியக் களங்களின் பட்டியல் - அரபு நாடுகள்
• உலக பாரம்பரியக் களங்களின் பட்டியல் - ஆபிரிக்கா
• உலக பாரம்பரியக் களங்களின் பட்டியல் - அமெரிக்காக்கள்
• உலக பாரம்பரியக் களங்களின் பட்டியல் - ஆசியாவும் ஆஸ்திரலேசியாவும்
• உலக பாரம்பரியக் களங்களின் பட்டியல் - ஐரோப்பா
• உலக பாரம்பரியக் களங்களின் பட்டியல் - ஆபத்தான நிலையிலுள்ளவை

தமிழகத்திலுள்ளவை

1. மாமல்லபுர மரபுக்கோயில்கள் - பல்லவர்களால் கட்டப்பட்டது.
2. அழியாத சோழர் பெருங்கோயில்கள் - சோழர்களால் கட்டப்பட்டது.