ஏ. சி. திருலோகச்சந்தர்

ஏ. சி. திருலோகச்சந்தர்
பிறப்பு	செங்கல்வராய முதலியார் திருலோகச்சந்தர் (1930-06-11)சூன் 11, 1930 ஆற்காடு, வேலூர் மாவட்டம், சென்னை மாகாணம், பிரித்தானிய இந்தியா
இறப்பு	சூன் 15, 2016(2016-06-15) (அகவை 86) சென்னை, தமிழ்நாடு
கல்வி	எம்.ஏ
பணி	திரைப்பட இயக்குநர், வசனகர்த்தா
செயற்பாட்டுக் காலம்	1951 – 1988
பெற்றோர்(கள்)	தந்தை : செங்கல்வராயன் முதலியார் தாயார் : நாகபூஷ்ணம் அம்மாள்
வாழ்க்கைத் துணை	பாரதி
பிள்ளைகள்	மல்லிகேசுவரி சீனிவாசன் (மகள்), ராஜ்சந்தர், பிரேம் திரிலோக் (இறந்து விட்டார்)

ஆற்காடு செங்கல்வராய முதலியார் திருலோகச்சந்தர் (பரவலாக ‌ஆ. செ. திருலோகச்சந்தர் (A. C. Tirulokachandar, 11 சூன் 1930 – 15 சூன் 2016) தமிழகத் திரைப்பட இயக்குநர் ஆவார். இவர் புகழ்பெற்ற பல தமிழ்த் திரைப்படங்களையும், சில இந்தி, தெலுங்குப் படங்களையும் இயக்கியுள்ளார். மேலும் இவர் 1966 இல் இயக்கிய ஏவிஎம்மின் முதல் வண்ண திரைப்படமான அன்பே வா திரைப்படத்தில் தமிழ் திரையுலகின் அன்றைய முன்னணி நடிகரான மக்கள் திலகம் எம்ஜிஆர் அவர்கள் நடிப்பை புதிய பறிமாற்றத்தில் முழுநீள காதல் திரைப்படமாக இயக்கி புகழ் பெற்றார். அதே போல் 1969 இல் இவர் நடிகர் திலகம் சிவாஜி கணேசனை வைத்து மூன்று மாறுபட்ட கதாபாத்திரங்களில் இயக்கிய தெய்வமகன் திரைப்படம் ஆசுக்கார் விருதுக்குப் பரிந்துரைக்கப்பட்ட முதலாவது தென்னிந்திய தமிழ் திரைப்படமாகும்.

வாழ்க்கை குறிப்பு

ஏ. சி. திருலோகச்சந்தர் அன்றைய வேலூர் மாவட்டம் ஆற்காட்டில் செங்கல்வரயான் முதலியார்–நாகபூஷ்ணம் அம்மாள் இணையருக்கு மகனாகப் பிறந்தார். முதுகலை வரை பட்டப்படிப்பை முடித்தவர்.

திரையுலகில்

திரையுலகில் அவரது நண்பர் ராஜகோபாலின் தந்தை ஆர். பத்மநாபன் இயக்கிய குமாரி திரைப்படத்தின் மூலம் கதை வசனம் திருத்தம் செய்யும் வேலையுடன் அப்படத்தின் கதாநாயகன் எம். ஜி. ஆர் உடன் பழகும் வாய்ப்பும் அவருக்கு கிடைத்தது. அதன் பிறகு வீணை எஸ். பாலசந்தர் உடன் உதவி இயக்குநராகப் பணிபுரியும் வாய்ப்பு இவருக்கு கிடைத்தது. சி. எல். ஆனந்தன் கதாநாயகனாக நடித்த விஜயபுரி வீரன் திரைப்படத்தில் உதவி இயக்குநராகவும், கதாசிரியராகவும் பணியாற்றிய பிறகு அப்படத்தின் வெற்றியைத் தொடர்ந்து ஏ. வி. மெய்யப்பச் செட்டியார் ஆனந்தனைக் கதாநாயகனாக வைத்து ஏ. சி. திருலோகச்சந்தரை முதல் முறையாக இயக்குநராக மாற்றி தனது ஏவிஎம் நிறுவனம் வாயிலாக வீரத்திருமகன் திரைப்படத்தை வெளியிட்டார்.

அதன் பிறகான காலகட்டத்தில் ஏவிஎம் நிறுவனத்தில் திருலோகச்சந்தர் தமிழ், தெலுங்கு, கன்னடம், இந்தி மொழித் திரைப்படங்களை அந்நிறுவனத்தின் சார்பில் இயக்கி வெளியிட்டார். அதன் பின்னர் ஏவிஎம் மூலம் ஏ. பீம்சிங் இயக்கத்தில் உருவான பார்த்தால் பசி தீரும் திரைப்படத்தில் கதை வசனகர்த்தாவாக பணியாற்றினாலும் வீரத்திருமகன், நானும் ஒரு பெண், காக்கும் கரங்கள், ராமு, அன்பே வா, அதே கண்கள், எங்க மாமா (தயாரிப்பு), பாபு (தயாரிப்பு) போன்ற திரைப்படங்களை இயக்கியுள்ளார். சிவகுமாரை தனது காக்கும் கரங்கள் திரைப்படம் மூலம் அறிமுகப்படுத்தினார்.

1966 இல் அன்பே வா திரைப்படத்தை காஷ்மீர் சிம்லா, ஊட்டி போன்ற சுற்றுலாத் தலங்களுக்கு சென்று எம்ஜிஆரின் நடிப்பில் ஏவிஎம்-மின் முதல் வண்ண திரைப்படமாக வெளியிட்டார். அதன் பிறகு திருலோகச்சந்தர் தனது நண்பர் கே. பாலாஜியின் சொந்த படத்தயாரிப்பு நிறுவனமான 'சுஜாதா பிக்சர்ஸ்' சார்பில் தங்கை திரைப்படத்தின் மூலம் முதல் முறையாக சிவாஜி கணேசனை வைத்து இயக்கும் வாய்ப்பினை பெற்றார். தங்கையின் வெற்றிக்கு பிறகு கே. பாலாஜி தயாரித்த என் தம்பி, திருடன், எங்கிருந்தோ வந்தாள் போன்ற திரைப்படங்களை இயக்கி சாதனை படைத்தார். சிவாஜி கணேசனின் சொந்த படத்தயாரிப்பு நிறுவனங்களான "கமலா மூவிஸ்", "சாந்தி பிலிம்ஸ்" சார்பில் அன்பளிப்பு, தெய்வமகன், தர்மம் எங்கே போன்ற திரைப்படங்களை இயக்கினார்.

இயக்கி தயாரித்த தமிழ் திரைப்படங்கள்

வ:எண்	ஆண்டு	திரைப்படம்	மொழி	குறிப்புகள்
1	1987	குடும்பம் ஒரு கோயில்	தமிழ்
2	1987	அன்புள்ள அப்பா	தமிழ்
3	1982	வசந்தத்தில் ஓர் நாள்	தமிழ்	மௌசா ம் திரைப்படத்தின் மீள்தயாரிப்பு
4	1981	லாரி டிரைவர் ராஜாகண்ணு	தமிழ்
5	1980	விஸ்வரூபம்	தமிழ்
6	1978	பைலட் பிரேம்நாத்	தமிழ்
7	1978	வணக்கத்திற்குரிய காதலியே	தமிழ்
8	1977	பெண் ஜென்மம்	தமிழ்
9	1976	நீ இன்றி நானில்லை	தமிழ்
10	1976	பத்ரகாளி	தமிழ்
11	1975	டாக்டர் சிவா	தமிழ்
12	1975	அன்பே ஆருயிரே	தமிழ்
13	1975	அவன்தான் மனிதன்	தமிழ்	கஸ்தூரி நிவேசாவின் மீள்தயாரிப்பு
14	1974	தீர்க்கசுமங்கலி	தமிழ்
15	1973	ராதா	தமிழ்
16	1973	சொந்தம்	தமிழ்
17	1973	பாரத விலாஸ்	தமிழ்
18	1972	இதோ எந்தன் தெய்வம்	தமிழ்
19	1972	அவள்	தமிழ்
20	1972	தர்மம் எங்கே	தமிழ்
21	1971	பாபு	தமிழ்	ஒடியல் நின்னுவின் மீள் தயாரிப்பு
22	1970	எங்கிருந்தோ வந்தாள்	தமிழ்	பிரம்மச்சாரி இந்தித் திரைப்படத்தின் மீள்தயாரிப்பு
23	1970	எங்க மாமா	தமிழ்	கிலோனா திரைப்படத்தின் மீள் தயாரிப்பு
24	1969	திருடன்	தமிழ்
25	1969	தெய்வமகன்	தமிழ்
26	1969	அன்பளிப்பு	தமிழ்
27	1968	என் தம்பி	தமிழ்
28	1967	இரு மலர்கள்	தமிழ்
29	1967	அதே கண்கள்	தமிழ்
30	1967	தங்கை	தமிழ்
31	1966	அன்பே வா	தமிழ்
32	1966	ராமு	தமிழ்
33	1965	காக்கும் கரங்கள்	தமிழ்
34	1963	நானும் ஒரு பெண்	தமிழ்
35	1962	வீரத்திருமகன்	தமிழ்

கதை & வசனம் மற்றும் உதவி இயக்கம்

வ:எண்	ஆண்டு	திரைப்படம்	மொழி	குறிப்புகள்
1	1962	பார்த்தால் பசி தீரும்	தமிழ்	கதை & வசனம்
2	1960	விஜயபுரி வீரன்	தமிழ்	கதை & வசனம்
3	1952	குமாரி	தமிழ்	உதவி இயக்கம்

மறைவு

திருலோகச்சந்தர் 2016 சூன் 15 அன்று தனது 86-ஆவது அகவையில் சென்னையில் காலமானார். இவருக்கு மல்லி சீனிவாசன் என்ற மகளும், ராஜ்சந்தர் என்ற மகனும் உள்ளனர். இவரது இறப்பிற்கு சில நாட்களுக்கு முன்னர் இவரது இன்னொரு மகன் பிரேம் திரிலோக் அமெரிக்காவில் காலமானார்.

வெளி இணைப்புகள்

• ஐ.எம்.டி.பி இணையத்தளத்தில் திருலோகச்சந்தர்