ஏ. எம். நாயக்

ஏ. எம். நாயக் (Anil Manibhai Naik, பிறப்பு: சூன் 9, 1942) என்பவர் எல் அண்ட் டி நிறுவனத்தின் தலைவர்.

இவர் இந்தியாவின் மூன்றாவது உயரிய விருதான பத்ம பூஷண் விருதை சனவரி 26, 2009 அன்று பெற்றார். மேலும் இவர் எகனாமிக் டைம்ஸ் விருதான "லீடர் ஆப் த இயர்" என்ற விருதையும் 2008 ஆண்டு பெற்றார்.

வாழ்க்கையும்,கல்வியும்

நாயக் தென் குஜராத்தின் ஒரு கிராமத்தில் பிறந்தவர் இவரின் தாத்தா, அப்பா அனைவரும் ஆசிரியர்கள். குஜராத்தின் வல்லபா வித்யா நகரில் உள்ள பிர்லா விஸ்வகர்மா மகாவித்யாலையா பொறியியல் கல்லூரியில் இயந்திரப் பொறியியல் முடித்தார்.

பணிகள்

இவரது ஆங்கிலம் அவ்வளவு பிரமாதமாக இருக்காது என்பதால், பிறர் ஆங்கிலத்தில் பேசுவதை குஜராத்தி மொழியில் புரிந்துகொண்டு, குஜராத்தியில் அதற்கான பதிலை யோசித்து, பின் அதை ஆங்கிலத்தில் மொழி பெயர்த்துப் பேசி தன்னுடைய ஆரம்ப காலத்தைக் கழித்திருக்கிறார். பிறகு இவர் தன் ஆங்கில அறிவை வளர்த்துக்கொண்டார். நெஸ்டர் நிறுவனத்தில் வேலைக்குச் சேர்ந்தார்.

நாயக் 1965-ம் ஆண்டு மார்ச் 15-ம் தேதி எல் அண்ட் டி நிறுவனத்தில் இளநிலைப் பொறியாளராக இணைந்தார்.

பணியில் சேர்ந்தபின் முதல் 21 வருடங்களில் அவர் எந்த விடுமுறையும் எடுத்ததில்லை. வாராந்திர விடுமுறை கூட எடுக்காமல் பணிபுரிந்தார். 1974-ல் (ஒன்பது ஆண்டுகளுக்குள்) துணை பொது மேலாளராக பதவி உயர்வு பெற்றார். 1986இல் பொது மேலாளராக பதவி உயர்வு பெற்றார். 1999-ம் ஆண்டு தலைமைச் செயல் அதிகாரியாக பொறுப்பேற்றுக் கொண்டார்.

தலைவராக பொறுப்பேற்ற பிறகு முதல் வேலையாக, எல் அண்ட் டியை இளைஞர்களைக் கவரும் நிறுவனமாக மாற்றினார். அதன் பிறகு பல கிளை நிறுவனங்களை உருவாக்கி அவற்றுக்கு தனியாக தலைவர்களை நியமித்தது, பங்குதாரர்களுக்கு ஏற்ற நிறுவனமாக மாற்றினார். நாயக் அறக்கட்டளை மூலம் இதுவரை ரூ.100 கோடி ரூபாய் நன்கொடை அளித்திருக்கிறார்.