வாழப்பாடி ராமமூர்த்தி

வாழப்பாடி கூ. இராமமூர்த்தி
தனிப்பட்ட விவரங்கள்
பிறப்பு	இராமமூர்த்தி. கூத்த படையாட்ச்சி (1940-01-18)18 சனவரி 1940 வாழப்பாடி, சேலம் மாவட்டம், இந்தியா
இறப்பு	27 அக்டோபர் 2002(2002-10-27) (அகவை 62) சென்னை
தேசியம்	இந்தியன்
அரசியல் கட்சி	தமிழக ராஜீவ் காங்கிரஸ்
பிற அரசியல் தொடர்புகள்	திராவிடர் கழகம் தமிழ் தேசிய கட்சி இந்திய தேசிய காங்கிரஸ் திவாரி காங்கிரஸ்
பிள்ளைகள்	இராம. சுகந்தன் இராம. கர்ணன் சகுந்தலா
பெற்றோர்	தந்தை : கூத்த படையாட்ச்சி தாயார் : பழநியம்மாள்
கல்வி	இளங்கலை
பணி	அரசியல்வாதி, வழக்கறிஞர்
சமயம்	இந்து

வாழப்பாடி கே. ராமமூர்த்தி (Vazhappadi K. Ramamoorthy)(18 சனவரி 1940-அக்டோபர் 27, 2002) என்பவர் வாழப்பாடியார் என்று அறியப்படுபவர் தமிழ்நாட்டைச் சார்ந்த ஓர் இந்திய அரசியல்வாதி ஆவார். இவர் ஆறு முறை இந்திய மக்களவை உறுப்பினராகவும் இரு முறை இந்திய நடுவண் அரசில் அமைச்சராகவும் பணியாற்றியுள்ளார்.

இளமை

இராமமூர்த்தி 1940ஆம் ஆண்டு சேலம் மாவட்டம் வாழப்பாடியில் கூத்த படையாட்ச்சி–பழநியம்மாள் இணையருக்கு நான்காவது மகனாகப் பிறந்தார். மேலும் இவருடன் பிறந்தவர்கள் அனைவரும் பெண் பிள்ளைகளாகவே இருந்தனர். இதில் ஜெயலட்சுமி, பச்சையம்மாள், பார்வதி என்ற மூன்று மூத்த சகோதரிகளும் பாக்கியம், மங்கம்மாள், சசிசந்திரா என்ற மூன்று இளைய சகோதரிகள் ஆவர்.

அரசியல் வாழ்க்கை

1959இல் இராமமூர்த்தி திராவிடர் கழகத்தில் இணைந்தார். அடுத்த ஆண்டே இக்கட்சியிலிருந்து விலகி இந்திய தேசிய காங்கிரசில் இணைந்தார். இதன் பிறகு 1968ல் சேலம் மாவட்ட இளைஞர் காங்கிரசு பொறுப்பாளரானார். காங்கிரஸ் கட்சியின் தொழிற்சங்கப் பிரிவான ஐ. என். டி. யூ. சியின் தலைவராகப் பணியாற்றினார். காங்கிரசின் மாநிலத் தலைவராகவும் பொறுப்பு வகித்தார். தமிழக காங்கிரஸ் கட்சியின் பெரும் தலைவர்களான ஜி. கே. மூப்பனார் தலைமையிலான "மூப்பனார் "அணிக்கும்" எதிராக “வாழப்பாடியார் அணிக்கும்” என்ற ஒன்று இவரது தலைமையில் செயல்பட்டது. இவர் முதன் முதலாக அன்றைய காங்கிரஸ் கட்சியின் மூத்த தலைவரான காமராஜர் தலைமையிலான நிறுவன காங்கிரசில் செயல்பட்டு வந்த போது 1971 நாடாளுமன்ற தேர்தலில் அன்றைய சேலம் மேட்டூர் நாடாளுமன்ற தொகுதியில் போட்டியிட்டு தோல்வியடைந்தார். இதன் பிறகு 1977 நாடாளுமன்ற தேர்தலில் அதிமுக–காங்கிரசு கூட்டணியில் காங்கிரஸ் கட்சி சார்பில் தர்மபுரி மக்களவைத் தொகுதியில் போட்டியிட்டு வெற்றி பெற்றார். இதன் பிறகு 1980, 1984, 1989, 1991 நாடாளுமன்றத் தேர்தல்களில் கிருஷ்ணகிரி மக்களவைத் தொகுதியிலிருந்து வெற்றி பெற்றார். பின்பு வாழப்பாடி இராமமூர்த்தி தனது சுயகட்சியான தமிழக ராஜீவ் காங்கிரசு சார்பில் அதிமுக–பாஜக தலைமையிலான தேஜகூட்டணியில் 1998 நாடாளுமன்ற தேர்தலில் சேலம் மக்களவைத் தொகுதியிலிருந்து வெற்றி பெற்று பிரதமர் வாஜ்பாயின் மத்திய அமைச்சரவையில் இந்திய பெட்ரோலியதுறை மந்திரியாக பொறுப்பேற்றார்.

தனிக்கட்சி

1991 முதல் 1996 வரையில் பி. வி. நரசிம்ம ராவ் தலைமையிலான நடுவண் அமைச்சரவையில் தொழிலாளர் நலத்துறை அமைச்சராகப் பதவி வகித்தார். 1996 நாடாளுமன்ற/சட்டமன்ற தேர்தலில் அதிமுக–காங்கிரஸ் கூட்டணியை எதிர்த்து காங்கிரசிலிருந்து விலகி திவாரி காங்கிரசி இணைந்து அதன் தமிழ்நாட்டுத் தலைவராகப் பணியாற்றினார். 1996 சட்டமன்றத் தேர்தலில் பாட்டாளி மக்கள் கட்சியுடன் கூட்டணி அமைத்துப் போட்டியிட்டார். இத்தேர்தலில் திவாரி காங்கிரசு எத்தொகுதியிலும் வெற்றி பெறவில்லை. பின்பு 1998 நாடாளுமன்றத் தேர்தலில் தமிழக ராஜீவ் காங்கிரசு என்ற கட்சியைத் தொடங்கி அதிமுக-பாஜகவுடன் கூட்டணி அமைத்துப் போட்டியிட்டு வென்றார். பின்பு ஆட்சி கலைக்கப்பட்டு அடுத்த வருடத்திலேயே 1999 நாடாளுமன்றத் தேர்தலில் திமுக-பாஜக கூட்டணியில் மீண்டும் சேலம் மக்களவைத் தொகுதியில் போட்டியிட்ட போது தோல்வியடைந்தார். பின்பு 2001 சட்டமன்றத் தேர்தலில் திமுக–பாஜக கூட்டணியில் தொடர்ந்த போதும் தேர்தலில் போட்டியிட கேட்ட தொகுதிகள் கிடைக்காததால் வாழப்பாடி ராமமூர்த்தி தனித்து போட்டியிட்டு தோல்வியடைந்தார். இத்தோல்விக்குப் பிறகு தனது கட்சியைக் கலைத்து விட்டு மீண்டும் காங்கிரசு கட்சியில் இணைந்து செயல்பட்டார். பிறகு 2002ம் ஆண்டு மாரடைப்பால் மரணமடைந்தார்.

மேற்கோள்கள்

• காவிரிக்காக பதவியை உதறியவர்
• வாழப்பாடி ராமமூர்த்தி மாரடைப்பால் மரணம்