வேற்றுமை அணி

வேற்றுமை அணி என்பது இரு பொருள்களுக்கு இடையேயுள்ள ஒற்றுமையைக் கூறி, பின் அவற்றை வேறுபடுத்திக் காட்டுவது ஆகும்.

எடுத்துக்காட்டு

'அங்கண் விசும்பின் அகனிலாப் பாரிக்கும் திங்களும் சான்றோரும் மறுவாற்றும் சான்றோர் அஃதாற்றார் தெருமந்து தேய்வர் ஒரு மாசுறின்'. (நாலடியார்)

இச்செய்யுளில் அகன்ற வானத்தில் இருக்கும் நிலா தன் ஒளியைப் பரப்பிப் பிறரை மகிழ்விக்கும் அதுபோல உயர்ந்த இடத்தில் இருக்கும் சான்றோரும் தன் அறிவு ஒளியால் பிறரை மகிழ்விப்பர்.எனவே இருவரும் இத்திறத்தால் ஒப்பானவர்கள். ஆனால் நிலா தன் களங்கத்தை ஏற்றுக் கொள்ளும். சான்றோர் தன் பெயருக்கு வரும் களங்கத்தை ஏற்றுக் கொள்ள மாட்டார்கள் இத்திறத்தால் இருவரும் மாறுபட்டவர்கள் என்று கூறித் திங்களுக்கும் சான்றோருக்கும் முதலில் ஒற்றுமை கூறிப் பின்னர் வேற்றுமைப் படுத்தியுள்ளது...

எடுத்துக்காட்டு

தீயினால் சுட்டபுண் உள்ளாறும் ஆறாதே

நாவினால் சுட்ட வடு.

பொருள்: தீயினால் சுட்ட புண்ணால் உடலில் வடு உண்டானாலும் உள்ளே ஆறிவிடும்; நாவினால் சுட்ட புண்ணால் உடலின் புறத்தே வடு உண்டாகாவிட்டாலும் உள்ளே ஆறாது.

அணி: வேற்றுமை அணி