ஜுராசிக் பார்க் (திரைப்படம்)

கட்டற்ற கலைக்களஞ்சியமான விக்கிப்பீடியாவில் இருந்து.
தாவிச் செல்லவும்: வழிசெலுத்தல், தேடல்
ஜுராசிக் பார்க்
இயக்குனர் ஸ்டீவன் ஸ்பில்பேர்க்
தயாரிப்பாளர் கேத்தலின் கென்னடி
ஜெரால்ட்.R.மோலன்
ஸ்டீவன் ஸ்பீல்பர்க்
நடிப்பு சாம் நீல்
லாரா டென்
ஜெப் கோல்டுப்ளும்
ரிச்சர்ட் அட்டென்பாரோ
மார்டின் பெர்ரீரோ
மற்றும் பாப் பெக்
இசையமைப்பு ஜான் வில்லியம்ஸ்
ஒளிப்பதிவு டீன் கண்டே
படத்தொகுப்பு மைக்கேல் கான்
திரைக்கதை டேவிட் கோப்
மைக்கேல் கிரைட்டன்
கலையகம் அம்ப்ளின் என்டர்டெயின்மென்ட்
விநியோகம் யுனிவெர்சல் பிக்சர்ஸ்
வெளியீடு ஜூன் 11, 1993
கால நீளம் 127 மணித்துளிகள்
மொழி ஆங்கிலம்
ஸ்பானிஷ்
ஆக்கச்செலவு $ 6.3 கோடி[1]
மொத்த வருவாய் $ 102.9 கோடி[1][2]

ஜுராசிக் பார்க் (Jurassic Park) என்பது 1993 ஆம் ஆண்டு ஸ்டீவன் ஸ்பில்பேர்க் (Steven Spielberg) இயக்கத்தில் வெளிவந்த அமெரிக்க அறிபுனை சாகசத் திரைப்படம் ஆகும். ஜுராசிக் பார்க் திரைப்படத் தொடரின் முதல் படம் இதுவேயாகும். இதே பெயரில் அமெரிக்க எழுத்தாளர் மைக்கேல் கிரைட்டனால் (Michael Crichton) 1990 இல் எழுதப்பட்டு வெளியான ஒரு புதினத்தைத் தழுவி இப்படம் எடுக்கப்பட்டது.

இத் திரைப்படமானது நடு அமெரிக்க நாடான கோஸ்ட்டா ரிக்காவின் அருகிலுள்ள ஈஸ்லா நுப்லார் என்ற கற்பனைத் தீவில் நிகழ்வதாக அமைந்துள்ளது. அங்கு ஒரு பணக்காரர், மரபணு விஞ்ஞானிகளின் துணையுடன் அழிந்துபோன உயிரினங்களான தொன்மாக்களை (Dinosaurs) படியெடுப்பு முறையில் உயிர்ப்பித்துப் பின் அவற்றைக் கொண்டு வனவிலங்குப் பூங்கா ஒன்றைத் தொடங்குவதாகக் கதை அமைந்துள்ளது.

கிரைட்டனின் புதினம் வெளியாவதற்கு முன் நான்கு ஸ்டூடியோக்கள் இத் திரைப்படத்தின் உரிமைகளை வாங்க முன்வந்தன. இறுதியில் யுனிவர்சல் ஸ்டுடியோஸ் உதவியால் ஸ்பில்பேர்க் $ 15 லட்சத்துக்கு அவ்வுரிமைகளைப் பெற்றார்; திரைக்கதையை எழுதுவதற்கென மைக்கேல் கிரைட்டன், $ 5 லட்சத்துக்கு அமர்த்தப்பட்டார்; திரைக்கதையின் இறுதி வடிவத்தை எழுதிய டேவிட் கோப் (David Koepp), கிரைட்டனின் புதினத்தில் காணப்பட்ட நீண்ட விளக்கங்கள், வன்முறை ஆகியவற்றுள் பெரும்பாலான பகுதிகளைத் தவிர்த்தார். மேலும், கதாபாத்திரங்களின் சித்தரிப்பையும் மாற்றியமைத்தார்.

படப்பிடிப்பு, 1992 ஆம் ஆண்டில் ஆகஸ்ட் முதல் நவம்பர் வரை கலிபோர்னியா மற்றும் ஹவாயில் நடைபெற்றது. இறுதித் தயாரிப்பு போலந்தில் மே 1993 வரை ஸ்பீல்பேர்க் தலைமையில் நடைபெற்றது. அதே சமயத்தில்தான் அவர் சிண்டலர்ஸ் லிஸ்ட் படத்தையும் இயக்கிக்கொண்டிருந்தார்.

இப்படத்தில் இடம்பெற்ற டைனோசார்கள் அனைத்தும் இண்டஸ்ட்ரியல் லைட் & மேஜிக் நிறுவனத்தின் CGI தொழில்நுட்ப உதவியாலும் ஸ்டேன் வின்ஸ்டன் குழுவினரின் அனிமேட்ரானிக் மாடல்களைக் கொண்டும் உருவாக்கப்பட்டன. அவற்றின் ஒலிகளுக்காகத் தற்கால விலங்குளின் ஒலிகள் பதிவுசெய்யப்பட்டன. மொத்தப் படத்தின் ஒலிப்பதிவையும் துல்லியமாகச் செய்ய விரும்பிய ஸ்பில்பேர்க், DTS என்ற ஒலிப்பதிவு நிறுவனத்தைத் தோற்றுவிக்க முதலீடு செய்து உதவினார். படத்தின் சந்தைப்படுத்துதல் $ 6.5 கோடி செலவில் நடந்தது. நூறு நிறுவனங்களுடன் உரிம ஒப்பந்தங்களும் கையெழுத்திடப்பட்டன.

ஜுராசிக் பார்க் முதன்முதலில் உலகமெங்கும் திரையிடப்பட்டபொழுது $ 90 கோடிக்கு மேல் வசூலித்தது. இது ஸ்பில்பேர்க்கின் இயக்கத்தில் 1982 ஆம் ஆண்டு வெளிவந்த ஈ.டி. தி எக்ஸ்ட்ரா டெரஸ்ட்ரியல் (E.T. The Extra-Terrestrial) என்ற படத்தைவிட அதிகம். இக்காரணத்தால் ஜுராசிக் பார்க் அதிக வருவாய் ஈட்டிய படங்களின் பட்டியலில் முதலிடம் பிடித்தது. இச்சாதனை பின்னர் 1997 இல் டைட்டானிக் (Titanic) படத்தால் முறியடிக்கப்பட்டது.

ஜுராசிக் பார்க் படத்தின் காட்சியமைப்பு, ஜான் வில்லியம்ஸின் இசையமைப்பு, ஸ்பீல்பேர்க்கின் இயக்கம் ஆகியன விமர்சகர்களால் பாராட்டப்பட்டன. ஆனால் படத்தின் திரைக்கதை விமர்சிக்கப்பட்டது. இப்படம் 20-க்கும் மேற்பட்ட விருதுகளை (மூன்று அகாதமி விருதுகள் உட்பட) பெற்றுள்ளது. இவற்றுள் பெரும்பாலானவை காட்சியமைப்புக்காக வழங்கப்பட்டவையாகும்.

ஜுராசிக் பார்க் 2011-ஆம் ஆண்டு மீண்டும் வெளியிடப்பட்டு $ 7.86 லட்சத்துக்கு மேல் வசூலித்தது. 2013 இல் இருபதாம் ஆண்டு நிறைவைக் கொண்டாடும் விதமாக முப்பரிமாண வடிவிலும் வெளியிடப்பட்டது. இவ்வெளியீடுகளால் $ 100 கோடிக்கு மேல் மொத்த வசூல் படைத்த 17-ஆவது திரைப்படமாக ஜுராசிக் பார்க் ஆனது. மேலும் உலக அளவில் அதிக வருவாய் ஈட்டிய 14-ஆவது திரைப்படம், வட அமெரிக்காவில் அதிக வருவாய் ஈட்டிய 16-ஆவது திரைப்படம், ஸ்பீல்பேர்க் இயக்கிய படங்களில் அதிக வசூல் படைத்த ஒரே படம் என்ற பெருமைளைப் பெற்றுள்ளது. பியூரியஸ் 7 திரைப்படம் வெளியாகும் வரை, யுனிவர்சல் ஸ்டுடியோஸால் வெளியிடப்பட்டவற்றுள் அதிக வசூல் படைத்த திரைப்படம் என்ற பெருமையையும் பெற்றிருந்தது.

சிறந்த திரைப்படங்களின் பட்டியலிலும் ஜுராசிக் பார்க் இடம்பெற்றுள்ளது. சிறந்த CGI மற்றும் அனிமேட்ரானிக் தொழில்நுட்பங்களினால் திரைப்படக் காட்சியமைப்பில் இப்படம் ஒரு மைல்கல்லாகவும் அமைந்துவிட்டது.

ஜுராசிக் பார்க்கின் தொடர்ச்சியாக தி லாஸ்ட் வேர்ல்ட்: ஜுராசிக் பார்க் (The Lost WorldːJurassic Park) மற்றும் ஜுராசிக் பார்க் III (Jurassic Park III) ஆகிய படங்கள் வெளிவந்தன. இவை வெற்றிப்படங்களாக இருப்பினும் இவற்றைக் குறித்த விமர்சனங்கள் பல்வகைப்பட்டனவாக இருந்தன. மூன்றாம் தொடர்ச்சியாக ஜுராசிக் வேர்ல்ட் என்ற திரைப்படம் ஜூன் 12, 2015 இல் வெளியாகவுள்ளது.

கதைச் சுருக்கம்[தொகு]

இன்-ஜென் (InGen) உயிரி பொறியியல் நிறுவனத்தின் நிறுவனரும் அதன் தலைமைச் செயல் அலுவலரும்(CEO) ஆன ஜான் ஹேமன்ட் (John Hammond), ஜுராசிக் பார்க் எனப் பெயர்கொண்ட ஒரு கருத்தியல் பூங்காவை (theme park) கோஸ்ட்டா ரிக்கா நாட்டின் மேற்கே உள்ள ஈஸ்லா நுப்லார் (Isla Nublar) என்ற தீவில் உருவாக்குகிறார். உலகில் சில கோடி ஆண்டுகளுக்கு முன்பு வாழ்ந்த டைனோசார்கள் படியெடுப்பு முறையில் மீளுருவாக்கப்பட்டுப் பின்பு இங்கு வாழவிடப்படுகின்றன. இச்சமயத்தில் வெலாசிராப்டர் (Velociraptor) என்ற டைனோசாரால் ஒரு பணியாளர் கொல்லப்படுகிறார். ஆதலால் இப்பூங்காவின் பாதுகாப்பை வல்லுநர்களைக்கொண்டு உறுதி செய்ய வேண்டும் என அதன் முதலீட்டாளர்கள் வழக்கறிஞர் டொனால்ட் ஜென்னாரோ (Donald Gennaro) வழியாக ஹேமன்டை வலியுறுத்துகின்றனர். ஜென்னாரோ,கணிதவியலாளர் இயான் மால்கம்-ஐ (Dr.Ian Malcolm) அழைத்துவருகிறார். அதேநேரத்தில் ஹேமன்ட், தொல்லுயிர் ஆய்வாளர் ஆலன் க்ரான்ட் (Dr. Alan Grant), தொல் தாவர ஆய்வாளர் எல்லி சாட்லர் (Dr.Ellie Sattler) ஆகியோரை அழைத்துவருகிறார். இக்குழுவினர் இத்தீவுக்கு வந்து சேரும்பொழுது ப்ராக்கியோ சாரஸ் (‌Brachiosaurus), பாரா சாரோலோஃபஸ் (‌‌‌Parasaurolophus) ஆகிய டைனோசார்களைக் கண்டு வியப்படைகின்றனர்.

பின்பு இக்குழுவினர் பூங்காவின் பார்வையாளர் மையத்துக்குச் செல்கின்றனர். அங்குள்ள ஆய்வகத்தில் டைனோசார்கள் எவ்வாறு படியெடுக்கப்பட்டன என அறிந்துகொள்கின்றனர் (அம்பர் பிசினில் மாட்டிக்கொண்ட பழங்காலக் கொசுக்களின் உடலில் கண்டெடுக்கப்பட்ட டைனோசார் டி.என்.ஏக்கள் அவற்றை மீண்டும் உருவாக்க உதவின. டி.என்.ஏ கற்றைகளில் காணப்பட்ட இடைவெளிகளில் தவளைகளின் டி.என்.ஏ க்கள் நிரப்பப்பட்டன. இவ்வாறு உருவாக்கப்பட்ட டைனோசார்களுக்குள் இனப்பெருக்கம் நிகழாமல் தடுப்பதற்காக அவை அனைத்தும் பெண்பாலினமாக உருவாக்கப்பட்டுள்ளன).

இக்குழுவினரோடு ஹேமன்டின் பெயரக்குழந்தைகளான அலெக்சிஸ் "லெக்ஸ்" மர்ஃபியும்(Alexis "Lex" Murphy) திமோத்தி "டிம்" மர்ஃபியும்(Timothy "Tim" Murphy) டைனோசார்களைப் பார்வையிட இணைந்துகொள்கின்றனர். இவர்கள் அனைவரும் தானியங்கிச் சிற்றுந்துகளில் ஏறிப் பூங்காவிற்குள் செல்கின்றனர். ஹேமன்ட் இச்சுற்றுலாவைப் பூங்காவின் கட்டுப்பாட்டு அறையிலிருந்து கண்காணிக்கிறார். ஆனால் பெரும்பாலான டைனோசார்கள் இக்குழுவுக்குத் தென்படாமல் இருக்கின்றன. தவிர ஒரு ட்ரை செராடாப்ஸ் (Triceratops) உடல்நலமின்றி படுத்திருக்கிறது.

இந்நிலையில் ஒரு வெப்பமண்டலப் புயல், ஈஸ்லா நுப்லார் தீவை நெருங்கிக்கொண்டிருப்பதால் பல பூங்காப் பணியாளர்கள் படகுகளைக்கொண்டு கோஸ்டாரிக்காவுக்குச் சென்றுவிடுகின்றனர். பார்வையாளர் குழுவினரும் ட்ரை செராடாப்ஸின் இருப்பிடத்தை விட்டுச் சிற்றுந்துகளுக்குத் திரும்புகின்றனர். எல்லி மட்டும் பூங்காவின் கால்நடை மருத்துவருடன் அவ்விடத்தில் இருந்து அந்த டைனோசாரைப் பார்வையிடுகிறார்.

இப்புயலின்போது பூங்காவின் கணிப்பொறி நிரலாளரான டென்னிஸ் நெட்ரி (Dennis Nedry), டைனோசார்களின் முளையங்களை (Embryos) திருடி இன்-ஜென் நிறுவனத்தின் போட்டி நிறுவனமான பயோசின்-னுக்கு (Biosyn) விற்கத் திட்டமிடுகிறார் (ஏற்கெனவே இதற்கான கையூட்டை இவர் பெற்றிருந்தார்). இதற்காகப் பூங்காவின் பாதுகாப்பு அமைப்பைச் செயலிழக்க வைத்துப் பின்பு முளையச் சேமிப்பு அறைக்குள் நுழைகிறார். இதனால் பூங்காவின் பெரும்பாலான பாதுகாப்பு வேலிகள் செயலிழக்கின்றன.இச்சமயத்தில் டி-ரெக்ஸ் (T-rex) என்ற டைனோசார் அதன் இருப்பிடத்திலிருந்து வெளியேறி பார்வையாளர் குழுவைத் தாக்குகிறது. க்ரான்ட், லெக்ஸ் , டிம் ஆகியோர் ஒருவழியாகத் தப்பிச்சென்று ஒரு மர உச்சியில் அன்றைய இரவைக் கழிக்கின்றனர்.ஆனால் டி-ரெக்ஸானது ஜென்னாரோவைக் கொன்று உண்டு, மால்கம்-ஐக் காயப்படுத்திவிட்டுச் செல்கின்றது.

இச்சமயத்தில் முளையங்களைப் பெறுவதற்காக தீவின் கிழக்குக் கப்பல்துறையில் காத்திருக்கும் பயோசின் ஆட்களுக்கு அவற்றைக்கொண்டு செல்லும் நெட்ரி, வழியில் தன் சிற்றுந்தைத் தவறான வழியில் செலுத்தி ஓரிடத்தில் சிக்கிக்கொள்கிறார்.அப்பொழுது அங்கு வரும் டைலோஃபோ சாரஸ் (Dilophosaurus) என்ற டைனோசார் அவரைக் கொன்றுவிடுகிறது.

எல்லியும் பூங்காவின் காப்பாளர் இராபர்ட் முல்டூனும் (Robert Muldoon) டி-ரெக்ஸ் தாக்குதலில் உயிர்பிழைத்தோரைத் தேட முயல்கின்றனர். ஆனால் டி-ரெக்ஸ் திரும்பி வருவதற்கு முன்பாக அவர்களால் மால்கம்-ஐ மட்டுமே கண்டுபிடிக்க முடிகிறது. அங்குள்ள சிற்றுந்தில் மூவரும் ஏறிப் பார்வையாளர் மையத்துக்குத் திரும்புகின்றனர்.

அங்கு நெட்ரியின் குறியீட்டு நிரலை வெளிக்கொணர முடியாமல் திணறும் ஹேமன்டும், பூங்காவின் தலைமைப் பொறியாளர் ரே அர்னால்டும் (Ray Arnold) பூங்காவின் முழு மின் அமைப்பையும் துண்டித்துப் பின்பு மீண்டும் உயிர்ப்பித்து அதன்வழியாக பூங்காவின் பாதுகாப்பு அமைப்பை உயிரூட்ட முடிவுசெய்கின்றனர்.எனவே மின் கட்டமைப்பைத் துண்டித்துவிட்டு அனைவரும் விடியற்காலையில் நிலவறை ஒன்றில் அடைக்கலம் புகுகின்றனர். அர்னால்ட் மட்டும் மின் உயிரூட்டலை நிறைவு செய்வதற்காக ஒரு கொட்டகைக்குச் செல்கிறார்.அவர் மீண்டும் வரத்தவறுவதால் எல்லியும் முல்டூனும் தாங்களே அங்கு செல்கின்றனர்.

அங்கு சென்றபின்பு அவ்விருவரும், மின்வெட்டால் வெலாசிராப்டர்களும் தப்பிவிட்டதை அறிகின்றனர். எனவே முல்டூன், அவற்றைத் திசைதிருப்ப முயலும் அதே சமயத்தில் எல்லி,கொட்டகைக்குள் சென்று மின்சாரத்தை மீண்டும் உயிர்ப்பிக்கிறார். அப்பொழுது அவர் அர்னால்டின் ஒரு துண்டிக்கப்பட்ட கையைக் கண்டு அங்கிருந்து தப்பிச் செல்கிறார். அச்சமயம் முல்டூனும் ஒரு வெலாசிராப்டரால் தாக்கப்பட்டு உயிரிழக்கிறார்.

இச்சமயம் க்ரான்ட்,லெக்ஸ்,டிம் ஆகியோர் மரத்திலிருந்து இறங்கி வந்தபின்னர் டைனோசார் முட்டை ஓடுகளைக் காண்கின்றனர்.இதனால் பூங்காவிலுள்ள டைனோசார்கள் இனப்பெருக்கம் செய்யத் தொடங்கிவிட்டன என்று க்ரான்ட் உணர்கிறார் (டைனோசார்களின் டி.என்.ஏ. க்களில் காணப்பட்ட இடைவெளிகளில் நிரப்பப்பட்ட டி.என்.ஏ கற்றைகள், மேற்காஃப்ரிக்கத் தவளைகளுடையவை (West African Bullfrogs).இவை (ஒரேபாலினச் சூழ்நிலையில் தங்கள் பாலினத்தை மாற்றிக்கொள்ளும் திறன் வாய்ந்தவை). எனவே இவற்றின் டி.என்.ஏ க்கள், டைனோசார்களையும் அவ்வாறு தங்கள் பாலினத்தை மாற்றிக்கொண்டு இனப்பெருக்கம் செய்ய உதவியிருக்கின்றன).

பின்பு இம்மூவரும் பார்வையாளர் மையத்துக்குத் திரும்பும் வழியில் காலிமைமஸ் மந்தை ஒன்றைக் காண்கின்றனர்.அப்பொழுது திடீரென்று டி-ரெக்ஸ் அங்கு வந்து அவற்றுள் ஒன்றைக் கொல்கிறது.பின்பு அம்மூவரும் பார்வையாளர் மையத்தை அடைகின்றனர்.அங்கு இரு குழந்தைகளையும் விட்டுவிட்டு க்ரான்ட் மற்றவர்களைத் தேடிச் செல்கிறார்.அப்பொழுது கொட்டகையிலிருந்து தப்பி வரும் எல்லியைச் சந்திக்கிறார். இருவரும் பார்வையாளர் மையத்துக்குத் திரும்பிச்செல்லும் அதேசமயத்தில் அங்கு இரு குழந்தைகளையும் வெலாசிராப்டர்கள் தாக்க முயல்கின்றன.

க்ரான்டும் எல்லியும் சென்று அவ்விருவரையும் காப்பாற்றிக் கட்டுப்பாட்டு அறைக்கு அழைத்துச் செல்கின்றனர்.அங்கு லெக்ஸின் முயற்சியால் மின்சாரம் மீண்டு வருகிறது.பின்பு அவர்கள் தொலைபேசி கொண்டு ஹேமன்டை உதவிக்கு அழைத்துவிட்டுப் பார்வையாளர் மையத்தின் வெளிக்கூடத்துக்குச் செல்கின்றனர்.அப்பொழுது அங்கு இரு வெலாசிராப்டர்கள் நால்வரையும் தாக்க முயல்கின்றன. அப்போது எதிர்பாராமல் அங்கு வரும் டி-ரெக்ஸ் அவ்விரண்டையும் கொல்கிறது. பின்பு பார்வையாளர் மையத்துக்கு வெளியில் அவர்கள் வரும்பொழுது ஹேமன்ட், முதலுதவி பெற்ற மால்கம்முடன் சிற்றுந்தில் வந்து நிற்கிறார்.தான் அப்பூங்காவுக்கு ஒப்புதல் அளிக்கப்போவதில்லை என க்ரான்ட், ஹேமன்டிடம் கூற அவரும் அதை ஏற்றுக்கொள்கிறார். பின்பு மால்கம் உட்பட ஆறு பேரும் சிற்றுந்தில் ஏறி உலங்கு வானூர்தி (Helicopter) இருக்குமிடத்துக்குச் செல்கின்றனர். அங்கிருந்து அவர்கள் அனைவரும் அவ்வானூர்தியில் ஏறித் தீவை விட்டு வெளியேறுகின்றனர்.

நடித்தவர்கள்[தொகு]

முதன்மைக் கட்டுரை: ஜுராசிக் பார்க் கதாபாத்திரங்களின் பட்டியல்

எண் கதாபாத்திரம் நடித்தவர் குறிப்பு
1 ஆலன் க்ரான்ட் (Dr.Alan Grant) சாம் நீல் (Sam Neill) தொல்லுயிர் ஆய்வாளர்
2 எல்லி சாட்லர் (Dr.Ellie Sattler) லாரா டென் (Laura Dern) தொல் தாவர ஆய்வாளர்
3 இயான் மால்கம் (Dr.Ian Malcolm) ஜெஃப் கோல்ட்ப்ளும் (Jeff Goldblum) கணித வல்லுநர்
4 ஜான் ஹேமன்ட் (John Hammond) ரிச்சர்ட் ஆட்டன்பரோ (Richard Attenborough) இன்-ஜென் நிறுவனத்தின் தலைவர், ஜுராசிக் பார்க்கை உருவாக்கியவர்
5 அலெக்சிஸ் "லெக்ஸ்' மர்ஃபி (Alexis "Lex" Murphy) அரியானா ரிச்சர்ட்ஸ் (Ariana Richards) ஹேமன்டின் பேத்தி
6 திமோத்தி "டிம்" மர்ஃபி (Timothy"Tim" Murphy) ஜோசெஃப் மெஸெல்லோ (Joseph Mazello) ஹேமன்டின் பேரன்
7 இராபர்ட் முல்டூன் (Robert Muldoon) பாப் பெக் ( Bob Peck) பூங்காவின் காப்பாளர்
8 டொனால்ட் ஜென்னாரோ (Donald Gennaro) மார்ட்டின் ஃபெர்ரீரோ (Martin Ferrero) பூங்காவின் முதலீட்டாளர்கள் தரப்பு வழக்கறிஞர்
9 டென்னிஸ் நெட்ரி (Dennis Nedry) வைன் நைட் (Wayne Knight) பூங்காவின் கணிப்பொறி நிரலாளர்
10 ரே அர்னால்ட் (Ray Arnold) சாமுவேல் எல். ஜாக்சன் (Samuel L. Jackson) பூங்காவின் தலைமைப் பொறியாளர்
11 லூயி டாட்ஜ்சன் (Dr.Lewis Dodgson) கேமரூன் தோர் (Cameron Thor) பயோசின் நிறுவனத்தின் தலைவர்
12 ஜுவானிட்டோ ராஸ்டக்னோ (Juanito Rostagno) மிகுவேல் சான்டோவல் (Miguel Sandoval) அம்பர் பிசின் சுரங்கம் ஒன்றின் உரிமையாளர்
13 ஜெர்ரி ஹார்டிங் (Dr.Gerry Harding) ஜெரால்ட் ஆர். மோலன் (Gerald R. Molen) பூங்காவின் கால்நடை மருத்துவர்
14 ஹென்றி வூ (Dr.Henry Wu) பி.டி. வோங் (BD Wong) பூங்காவின் தலைமை மரபணு வல்லுநர்
15 - ரிச்சர்ட் கிலே (Richard Kiley) பூங்காச் சுற்றுலாவில் வானொலி மூலம் வர்ணணையளிப்பவர்
16 மிஸ்டர் டி.என்.ஏ -வின் (‌‌Mr. DNA) குரல் க்ரெக் பர்சன் (Greg Burson) படியெடுத்தல் முறையினை விளக்கும் அனிமேஷன் டி.என்.ஏ

படத்தில் தோன்றிய டைனோசார்கள்[தொகு]

மேலும் பார்க்க: ஜுராசிக் பார்க் தொடரில் தோன்றிய விலங்குகளின் பட்டியல்

இத் திரைப்படத்தின் தலைப்பானது ஜுராசிக் காலத்தைக் குறிப்பிடுவதாக உள்ளது. எனினும் இப்படத்தில் தோன்றும் ப்ராக்கியோ சாரஸ் மற்றும் டைலோஃபோ சாரஸ் ஆகியன மட்டுமே ஜுராசிக் காலத்தைச் சேர்ந்தனவாகும். மற்ற விலங்குகள் கிரெடேஷியஸ் காலத்தில்தான் தோன்றின. [3] திரைக்கதையிலும் ஓரிடத்தில் டாக்டர் க்ரான்ட் ஒரு சிறுவனிடம் வெலாசிராப்டரின் சீற்றத்தை விவரிக்கும்பொழுது " நீ (இப்போது) கிரெடேஷியஸ் காலத்தில் வாழ்வதாகக் கற்பனைசெய்து கொள்..." என்கிறார்[4]

டைரனோசாரஸ்[தொகு]

"இத் திரைப்படத்தின் நட்சத்திரம்" என்று இயக்குநர் ஸ்பில்பேர்க்கால் வர்ணிக்கப்பட்ட டைனோசார் டைரனோசாரஸ் ஆகும். ரசிகர்கள் ஏமாற்றமடைய நேரிடும் என்பதற்காக அவர் இப்படத்தின் இறுதியில் டி-ரெக்ஸைக் கொண்டு ஒரு காட்சியைப் படமெடுத்தார்.[5] ஸ்டேன் வின்ஸ்டன் வடிவமைத்த அனிமேட்ரானிக் டி-ரெக்ஸானது 20 அடி (6.1 மீட்டர்) உயரமும், 17500 பவுண்டு (7900 கிலோ) எடையும்,[6] 40 அடி (12 மீட்டர் ) நீளமும் இருந்தது. [7] "உயிருள்ள ஒரு டைனோசாருக்கு மிக அருகில் நான் இருந்த தருணம் அது" என்று தொல்லுயிர் ஆய்வாளர் ஜாக் ஹார்னர் (Jack Horner) பின்பு நினைவுகூர்ந்தார்.[7]

இப்படத்தின் ஆலோசகர்களாக அமர்த்தப்பட்ட தொல்லுயிர் ஆய்வாளர்களிடையே டி-ரெக்ஸின் அசைவுகளை (குறிப்பாக அதன் ஓட்டத்திறனை) பற்றி ஒருமித்த கருத்து நிலவவில்லை. எனினும் இப்படத்தின் அனிமேட்டரான ஸ்டீவ் வில்லியம்ஸ் (Steve Williams), "இயற்பியலை ஜன்னலுக்கு வெளியில் எறிந்துவிட்டு, மணிக்கு 60 மைல் வேகத்தில் ஓடக்கூடிய ஒரு டி-ரெக்ஸை (‌‌அவ்வளவு வேகமாக ஓடினால் அதன் உள்ளீடற்ற எலும்புகள் முறிந்துவிடக்கூடும் என்றாலும்) உருவாக்க" முடிவுசெய்தார்.[8] டி-ரெக்ஸானது ஒரு சிற்றுந்தைத் துரத்தும் காட்சியைப் படம்பிடிக்க இரு மாதங்களானது இம்முடிவுக்கு ஒரு முக்கியக் காரணம்.[9]

இந்த டைனோசாரின் பார்வையானது அசைவுகளின் அடிப்படையில் அமைந்ததாகச் சித்தரிக்கப்பட்டுள்ளது. ஆனால் பிந்தைய ஆய்வுகள், கொன்றுண்ணிப் பறவைகளுக்கு இணையான துணைவிழிப் பார்வை (‌Binocular Vision) இதற்கிருந்தது என நிரூபித்துள்ளன.[10]

குட்டி யானை,புலி மற்றும் ஆட்பிடியன் (Alligator) ஆகியவற்றின் ஒலிகளைக் கலந்து இந்த டைனோசரின் கர்ஜனையாகச் சித்தரித்தனர். இதன் சுவாச ஒலிக்காகத் திமிங்கிலம் ஒன்றின் ஒலி பதிவுசெய்யப்பட்டது.[9] ஒரு காட்சியில் காலிமைமஸ் ஒன்றை டி- ரெக்ஸ் வேட்டையாடும்பொழுது வரும் ஒலியானது உண்மையில், நாய் ஒன்று கயிறைக் கடிக்கும் ஒலியாகும்.[5] டி-ரெக்ஸின் காலடி ஓசையானது சீக்கோயா மரங்கள் (Sequoias) வெட்டப்பட்டுத் தரையில் விழும் ஓசையாகும்.[11]

வெலாசிராப்டர்[தொகு]

இப்படத்தில் வெலாசிராப்டருக்கு முக்கியப் பங்குண்டு. இதன் உண்மையான அளவு திரைப்படத்தில் சித்தரிக்கப்பட்டதை விடச் சிறியதாகும். இத்திரைப்படம் வெளியாவதற்குச் சற்று முன்பு இந்த டைனோசாரின் சித்தரிக்கப்பட்ட அளவையொத்த யூட்டா ராப்டர் (Utahraptor) என்ற டைனோசார், ஆய்வாளர்களால் கண்டறியப்பட்டது.[12] இதனால் ஸ்டேன் வின்ஸ்டன் "நாம்(‌படப்பிடிப்புக் குழுவினர்) அதை (வெலாசிராப்டரை) செய்தோம்; பின்பு அவர்கள் (ஆய்வாளர்கள்) அதை (யூட்டா ராப்டரை) கண்டுபிடித்துவிட்டார்கள்" என்று வேடிக்கையாகக் குறிப்பிட்டார்."[7]

ஜுராசிக் பார்க்கின் காப்பாளர் இராபர்ட் முல்டூன் தாக்கப்படுதல் மற்றும் சமையலறை ஆகிய காட்சிகளில் வெலாசிராப்டர் போல வேடமிட்ட ஆட்கள் நடித்தனர்.

விருதுகள்[தொகு]

  • அகாதமி விருது
  • சிறந்த சிறப்பு காட்சி அமைப்புகள் (வெற்றி)
  • சிறந்த ஒலி (வெற்றி)
  • சிறந்த சிறப்பு ஒலி அமைப்பு தொகுப்பு (வெற்றி)

மற்றும் பல்வேறு வகையான விருதுகளை குவித்தது இந்த திரைப்படம்.

குறிப்புகள்[தொகு]

  1. பிழை காட்டு: செல்லாத <ref> குறிச்சொல்; mojo என்னும் பெயரில் உள்ள ref குறிச்சொல்லுக்கு உரையேதும் வழங்கப்படவில்லை
  2. http://boxofficemojo.com/movies/intl/?id=_fJURASSICPARK201&country=UK&wk=2011W38&id=_fJURASSICPARK201
  3. Gould, Stephen (August 12, 1993). "Dinomania". The New York Review of Books. http://www.nybooks.com/articles/archives/1993/aug/12/dinomania/. பார்த்த நாள்: April 2, 2007. 
  4. Guzman, Rafer (April 4, 2013). "Movies: Dino-mite! Back to Jurassic Park, in 3-D". Portland Press Herald. பார்த்த நாள் January 13, 2014.
  5. பிழை காட்டு: செல்லாத <ref> குறிச்சொல்; Earl_doc என்னும் பெயரில் உள்ள ref குறிச்சொல்லுக்கு உரையேதும் வழங்கப்படவில்லை
  6. பிழை காட்டு: செல்லாத <ref> குறிச்சொல்; triple_cite என்னும் பெயரில் உள்ள ref குறிச்சொல்லுக்கு உரையேதும் வழங்கப்படவில்லை
  7. 7.0 7.1 7.2 Corliss, Richard (April 26, 1993). "Behind the Magic of Jurassic Park". TIME. http://www.time.com/time/magazine/article/0,9171,978307,00.html. பார்த்த நாள்: January 26, 2007. 
  8. Shone, p. 217
  9. பிழை காட்டு: செல்லாத <ref> குறிச்சொல்; the_end என்னும் பெயரில் உள்ள ref குறிச்சொல்லுக்கு உரையேதும் வழங்கப்படவில்லை
  10. Jaffe, Eric (June 28, 2006). "Sight for 'saur eyes: T. rex vision was among nature's best.". Science News. பார்த்த நாள் January 15, 2014.
  11. பிழை காட்டு: செல்லாத <ref> குறிச்சொல்; pre என்னும் பெயரில் உள்ள ref குறிச்சொல்லுக்கு உரையேதும் வழங்கப்படவில்லை
  12. "What Do We Really Know About Utahraptor? | Dinosaur Tracking". Blogs.smithsonianmag.com. doi:10.1080/02724634.2001.10010852. பார்த்த நாள் January 24, 2013.

நூல் பட்டியல்[தொகு]

வெளி இணைப்புகள்[தொகு]

Wikiquote-logo.svg
விக்கிமேற்கோள்களில் பின் வரும் நபர் அல்லது தலைப்பு தொடர்பான மேற்கோள்கள் தொகுக்கப்பட்டுள்ளன: