ஜானகி இராமச்சந்திரன்

ஜானகி இராமச்சந்திரன்
வி. என். ஜானகி
பிறப்பு	நவம்பர் 30, 1923 வைக்கம், கேரளா
இறப்பு	மே 19 1996 (age 73) சென்னை, தமிழ்நாடு
பணி	நடிகை, அரசியல்வாதி
வாழ்க்கைத் துணை	கணபதிபட் எம். ஜி. ராமச்சந்திரன்
பிள்ளைகள்	அப்பு என்கிற இரவீந்திரன்

ஜானகி இராமச்சந்திரன்
தமிழக முதல்வர்
தொகுதி	ஆண்டிபட்டி
அரசியல் கட்சி	அ.இ.அ.தி.மு.க

ஜானகி இராமச்சந்திரன் (Janaki Ramachandran) அல்லது வைக்கம் நாராயணி ஜானகி என்னும் வி. என். ஜானகி பிரபல நடிகரும் முன்னாள் தமிழக முதல்வருமாகிய எம். ஜி. இராமச்சந்திரனுடைய மூன்றாவது மனைவி ஆவார். இவர் ஒரு முன்னாள் திரைப்பட நடிகை. இவரின் முதல் கணவர் நடிகரும் ஒப்பனையாளருமான கணபதிபட் ஆவார். இவர்கள் இருவருக்கும் அப்பு என்கிற இரவீந்திரன் என்னும் மகன் இருந்தார். இராஜகுமாரி படத்தில் கதைத்தலைவியாக நடித்த இவர் கதைத்தலைவனாக நடித்த எம். ஜி. இராமச்சந்திரனைக் காதலித்தார். இதனால் ஏற்பட்ட பிணக்கில் தன் கணவர் கணபதிபட்டை விட்டுவிலகி தன் மகனோடு வந்து எம். ஜி. இராமச்சந்திரனோடு 18ஆண்டுகள் உடனுறைந்தார். எம். ஜி. இராமச்சந்திரன் இரண்டாவது மனைவி சதானந்தவதி 1962ஆம் ஆண்டில் இயற்கை எய்திய பின்னர் இவர் எம். ஜி. இராமச்சந்திரனை திருமணம் செய்து கொண்டார்.

எம். ஜி இராமச்சந்திரன் முதல்வர் பதவியிலிருந்த நிலையில் காலமானபோது, ஜானகி முதல்வராக்கப்பட்டார். எனினும் தன் கணவர் உருவாக்கிய அனைத்திந்திய அண்ணா திராவிட முன்னேற்றக் கழகத்தை முழுமையாக வைத்திருக்க அவரால் இயலவில்லை. எம். ஜி. ஆர் காலத்தில் கட்சியின் கொள்கை பரப்புச் செயலாளராக இருந்தவரும் பிரபல நடிகையுமான ஜெயலலிதாவின் ஆதரவாளவர்களுடைய எதிர்ப்பினால் கட்சி உடைந்தது. 1987-88ல் குறுகிய காலம் தமிழ்நாட்டின் முதல்வராகப் பணியாற்றினார்.