அமெரிக்கத் தமிழர்

அமெரிக்கத் தமிழர்
ஆனந்த குமாரசுவாமி செந்தில் ராமமூர்த்தி கமலா ஆரிசு இந்திரா நூயி எம். நைட் ஷியாமளன் அசீஸ் அன்சாரி
மொத்த மக்கள்தொகை
132,573
குறிப்பிடத்தக்க மக்கள்தொகை கொண்ட பகுதிகள்
மத்திய நியூ செர்சி•நியூ யோர்க் நகரம்•லாஸ் ஏஞ்சல்ஸ்
மொழி(கள்)
முதன்மை: அமெரிக்க ஆங்கிலம்•தமிழ் சிறியளவு: பிரெஞ்சு•சிங்களம்•ஏனைய இந்திய மொழிகள்
சமயங்கள்
முதன்மை: இந்து சமயம் (சைவம்•வைணவம்) சிறியளவு: கிறிஸ்தவம்•இஸ்லாம்•சமணம்
தொடர்புள்ள இனக்குழுக்கள்
தமிழர்•இந்திய அமெரிக்கர்•இலங்கை அமெரிக்கர்

அமெரிக்கத் தமிழர் எனப்படுவோர் தமிழ் பின்புலத்தைக் கொண்டு ஐக்கிய அமெரிக்காவில் குடியேறியவர்களாவர். அதிகமானோர் தமிழ்நாட்டில் இருந்தும் இலங்கையில் இருந்தும் கல்விக்காகவும் வேலைக்காகவும் அமெரிக்கா சென்று, அந்நாட்டில் குடியுரிமைச் சட்ட உரிமைகளின் அடிப்படையில் அந்நாட்டிலேயே குடியுரிமைப் பெற்றவர்களாவர். கடந்த 50 ஆண்டுகளுக்கும் மேலாக தமிழர் அங்கு குடியேறி வாழ்ந்து வருகின்றனர். ஈழத்தமிழரான ஆனந்த குமாரசுவாமி 1917 களிலேயே (கிட்டத்தட்ட 100 ஆண்டுகள்) அமெரிக்கா சென்று நுண்கலை அருங்காட்சியகத்தில் கீழைத்தேயப் பிரிவின் பணிப்பாளராகவும், ஆய்வாளராகவும் பணிபுரிந்து அங்கேயே குடியேறியவர் என்பது குறிப்பிடத்தக்கது. அத்துடன் மலேசியா, சிங்கப்பூர், இந்தோனேசியா, தென்னாப்பிரிக்கா, பிரஞ்சு மேற்கு இந்தியா, மற்றும் ஐக்கிய இராச்சியம் போன்ற நாடுகளில் இருந்தும் அமெரிக்கா சென்று குடியுரிமை பெற்றவர்களும் உள்ளனர். 1983 களின் பின்னர் இலங்கை இனப்பிரச்சினை காரணமாக உலகெங்கும் புலம்பெயர்ந்த ஈழத்தமிழர்களில் குறிப்பிட்ட எண்ணிக்கையானோர் அமெரிக்காவில் புகலிடம் பெற்றவர்களும் உளர்.

மூன்றாம் நாடு வழங்கல்

ஆசிய நாடுகளில் புகலிடம் கோருவோர்களுக்கு அதே நாட்டில் குடியுரிமை வழங்கும் சட்டம் அந்நாடுகளில் இல்லாமையால் யுஎன்எச்சிஆர் போன்ற மனிதவுரிமை அமைப்புகள் மூன்றாம் நாடு வழங்கல் கொள்கையின் ஊடாக மூன்றாம் நாடுகளில் குடியுரிமைப் பெற்று வழங்கிவருகிறது. அதனடிப்படையில் தாய்லாந்து, ஹொங்கொங் போன்ற ஆசியநாடுகளின் ஊடாக அமெரிக்க குடியுரிமை பெற்றவர்களில் கணிசமான ஈழத்தமிழர்களும் அடங்குவர்.

தமிழ்க் கல்வி

அமெரிக்காவின் சில மாகாணங்களில் தமிழ் மொழி ஒரு பாடமாகக் கற்பிக்கப்படுகிறது. மாகாண வாரியாக தமிழ்ப் பாடங்களைக் கற்பிக்கும் கல்வி நிறுவனங்களின் பட்டியல் கீழே தரப்பட்டுள்ளது.

• கலிபோர்னியா - கலிபோர்னியா பல்கலைக்கழகம், பெர்க்கிலி - உயர்நிலைப் படிப்பு
• மிச்சிகன் - மிச்சிகன் பல்கலைக்கழகம் - உயர்நிலைப் படிப்பு
• சிக்காகோ - சிக்காகோ பல்கலைக்கழகம் - அடிப்படை, இளநிலை, உயர்நிலைப் படிப்புகள்
• நியூ யார்க் - கொலம்பியா பல்கலைக்கழகம் -உயர்நிலைப் படிப்பு
• மேடிசன் - விஸ்கான்சின் பல்கலைக்கழகம் - உயர்நிலைப் படிப்பு
• சிக்காகோ - அமெரிக்காவின் இந்தியவியல் நிறுவனம் - உயர்நிலைப் படிப்பு
• பிலடெல்பியா - பென்னிசில்வேனியா - உயர்நிலைப் படிப்பு
• மிச்சிகன் - மிச்சிகன் அரசுப் பல்கலைக்கழகம் - உயர்நிலைப் படிப்பு

புகழ் பெற்ற அமெரிக்கத் தமிழர்கள்

• சிவா ஐயாதுரை, மின்னஞ்சலைக் கண்டுபிடித்தவர்
• ஆனந்த குமாரசுவாமி
• சுப்பிரமணியன் சந்திரசேகர்
• எம். நைட் ஷியாமளன்
• இந்திரா நூயி
• இந்திரன் அமிர்தநாயகம்
• வெங்கட்ராமன் ராமகிருஷ்ணன், நோபல் பரிசு பெற்ற அறிவியலாளர்
• அர்ஜுன் அப்பாதுரை

இவற்றையும் பார்க்க

• பகுப்பு:ஐக்கிய அமெரிக்கத் தமிழர் அமைப்புகள்