மலேசியா

மலேசியா Malaysia
குறிக்கோள் Bersekutu Bertambah Mutu ஒற்றுமையே பலம்
நாட்டுப்பண் நெகாராகூ என் நாடு
தலைநகரம் பெரிய நகரம்		கோலாலம்பூர்[a] புத்ராஜெயா (நிர்வாக மையம்) 3°08′N, 101°42′E
ஆட்சி மொழி(கள்)		மலேசிய மொழி[b]
தேசிய இனங்கள்		50.4% மலாய்க்காரர்கள் 23.7% சீனர்கள் 11.0% மலேசியப் பழங்குடியினர்  7.1% இந்தியர்கள்  7.8% மற்றவர்கள்
அரசு		கூட்டாட்சி அரசியலமைப்பு முடியாட்சி
-	மாமன்னர்	அப்துல் ஹாலிம்
-	பிரதமர்	நஜீப் துன் ரசாக் (பாரிசான் நேசனல்)
-	துணைப்பிரதமர்	மொகாய்தீன் யாசின் (பாரிசான் நேசனல்)
விடுதலை
-	ஐக்கிய இராச்சியத்திடம் இருந்து (மலாயா மட்டும்)	ஆகஸ்ட் 31, 1957
-	சபா, சரவாக் மற்றும் சிங்கப்பூருடன் கூட்டாட்சி[e]	செப்டம்பர் 16, 1963
பரப்பளவு
-	மொத்தம்	3,29,847 கிமீ² (67வது) 1,27,355 சது. மை
-	நீர் (%)	0.3
மக்கள்தொகை
-	2007 மதிப்பீடு	27,544,000 (43வது)
-	2010 குடிமதிப்பு	28,334,135
-	அடர்த்தி	86/கிமீ² (114வது) 216.45/சதுர மைல்
மொ.தே.உ  (கொஆச (ppp))		2011 கணிப்பீடு
-	மொத்தம்	$442.010 பில்லியன் (24th)
-	நபர்வரி	$15,385 (47th)
மொ.தே.உ(பொதுவாக)		2011 மதிப்பீடு
-	மொத்தம்l	$247.781 பில்லியன் (39th)
-	நபர்வரி	$8,624 (58th)
ம.வ.சு (2011)		0.781 (உயர்) (61th)
நாணயம்		ரிங்கிட் (RM) (MYR)
நேர வலயம்		மலேசிய நேரம் (ஒ.ச.நே.+8)
-	கோடை (ப.சே.நே.)	Not observed (ஒ.ச.நே.+8)
இணைய குறி		.my
தொலைபேசி		++60
^ a. கோலாலம்பூர் மலேசியாவின் தலைநகரமாகவும், நடுவண் அரசின் மையகமாவும் விளங்குகிறது. புத்ராஜெயா நடுவண் அரசின் நிர்வாக, நீதித்துறைகளின் தலையாய மையமாக விளங்குகிறது. ^ b. அரசாங்கத்தின் கொள்கையின்படி பகாசா மலேசியா என்று அழைக்கப்படுகிறது. பகாசா மலேசியா என்றால் மலேசிய மொழி. இருப்பினும் சட்டம் பகாசா மலாயு அல்லது மலாய் மொழி என்றே சுட்டுகிறது. ^ c. 1967ஆம் ஆண்டு தேசிய மொழிச் சட்டம்: தேசிய மொழி எழுத்துகள் ரூமி எனும் லத்தீன் எழுத்துகளில் இருக்கும். இருப்பினும் ஜாவி எழுத்துகள் புறக்கணிக்கப்பட மாட்டாது. ^ d. 1967ஆம் ஆண்டு தேசிய மொழி சட்டத்தின் கீழ் சில காரணங்களுக்காக ஆங்கிலம் பயன்படுத்தப்படலாம். ^ e. 1965 ஆகஸ்டு மாதம் 9ஆம் தேதி சிங்கப்பூர் சுதந்திர நாடானது.

மலேசியா (Malaysia) தென்கிழக்கு ஆசியாவில் உள்ள ஒரு முடியாட்சி நாடு. இந்த நாடு தீபகற்ப மலேசியா அல்லது மேற்கு மலேசியா என்றும், கிழக்கு மலேசியா என்றும் இரு பிரிவுகளாகப் பிரிக்கப் பட்டுள்ளது. கிழக்கு மலேசியாவை, மலேசிய போர்னியோ என்று அழைப்பதும் உண்டு. மலேசியாவில் 13 மாநிலங்கள் உள்ளன. அவற்றுடன் மூன்று கூட்டரசு மாநிலங்களும் இணைந்து உள்ளன. மலேசியாவின் மொத்த பரப்பளவு 329,847 சதுர கிலோமீட்டர்கள் (127,350 சதுர மைல்கள்).

மேற்கு மலேசியாவையும் கிழக்கு மலேசியாவையும் தென்சீனக்கடல் பிரிக்கின்றது. மலேசியாவின் நில எல்லைகள் தாய்லாந்து, இந்தோனேசியா, சிங்கப்பூர், பிலிப்பைன்ஸ், புரூணை ஆகிய நாடுகளுடன் பகிர்ந்து கொள்ளப் படுகின்றன. மலேசியாவின் தலைநகரம் கோலாலம்பூர். நடுவண் அரசின் நிர்வாக மையம் புத்ராஜெயாவில் உள்ளது. 2010ஆம் ஆண்டு மலேசியாவின் மக்கள் தொகை 27.5 மில்லியன். தீபகற்ப மலேசியாவின் மக்கள் தொகை மட்டும் 20 மில்லியன்.

மலேசியாவின் தலைநகர் கோலாலம்பூர். அரசாங்க அலுவலகங்கள் புத்ராஜெயாவில் உள்ளன. 1957ஆம் ஆண்டு ஐக்கிய இராச்சியத்திடம் இருந்து விடுதலை பெற்றது. இப்போது மலேசியாவின் மன்னராக மாட்சிமை தங்கிய மாமன்னர் மிசான் சைனல் அபிடீன் மகுடம் வகிக்கின்றார். மலேசியாவின் பிரதமராக நஜீப் துன் ரசாக் தலைமைப் பொறுப்பில் இருக்கின்றார். இருபதாம் நூற்றாண்டில் கூடுதலான பொருளாதார வளர்ச்சியைப் பெற்ற நாடுகளின் பட்டியலில் இரண்டாவது இடம் பிடித்தது. கடந்த 50 ஆண்டுகளாக இதன் மொத்த தேசிய உற்பத்தி வளர்ச்சி 6.5% ஆக இருந்து வருகிறது. வெளிநாடுகள் மிகுதியாக முதலீடுகள் செய்து வருகின்றன. இப்போது சுற்றுலா, அறிவியல், வர்த்தகம் முதலிய பிரிவுகளில் வளர்ச்சி அடைந்து வருகிறது.

மலேசியாவின் மக்கள் தொகை 2.5 கோடி. இவர்களில் மலாய் மக்கள் பெரும்பான்மையானவர். இவர்களுக்கு அடுத்து சீனர்களும் இந்தியர்களும் கூடுதலாக வாழ்கின்றனர். பெரும்பான்மையான மலேசிய மக்கள் இஸ்லாமைப் பின்பற்றுகிறார்கள். இஸ்லாமே மலேசியாவின் தேசிய சமயமும் ஆகும். மலாய் மொழி தேசிய மொழியாகும்.

வரலாறு

வரலாற்றுக்கு முந்தைய காலம்

வரலாற்றுக்கு முந்தைய காலச் சான்றுகள் மலேசியாவில் அதிகமாகக் கிடைத்து இருக்கின்றன. பூர்வகுடி செமாங் இனத்தவர்களின் மூதாதையர்கள் சுமார் 40000 ஆண்டுகளுக்கு முந்தைய ஆப்பிரிக்கர்களாக இருக்கலாம் என கருதப்படுகிறது.

ஆரம்ப காலம்

முதல் நூற்றாண்டின் முற்பகுதியில் இந்தியாவிலிருந்தும் சீனாவிலிருந்தும் வந்த வர்த்தகர்களும் குடியேற்றக்காரர்களும் வர்த்தகத் துறைமுகங்களையும் நகரங்களையும் உருவாக்கினர். பிற்பகுதியில் மலேசியா ஸ்ரீ விஜயப் பேரரசின் ஆட்சியின் கீழ் இருந்திருக்கிறது. 11ம் நூற்றாண்டில் சோழ அரசன் இராஜேந்திர சோழன் கடாரம் எனப்படும் இடத்தை போரில் வென்றதற்கான வரலாற்று ஆதாரங்கள் காணப்படுகின்றன. சோழர்களின் வருகையும் போர்களும் ஸ்ரீவிஜய ஆட்சியை பலமிழக்கச்செய்தது.

சுல்தான்கள்

பதினைந்தாம் நூற்றாண்டின் ஆரம்ப காலத்திலிருந்து பல்வேறு சுல்தான்கள் ஆட்சி புரிந்தார்கள். ஸ்ரீ விஜயப் பேரரசின் இளவரசனான பரமேஸ்வரன் மலாயத் தீபகற்பத்தின் முதல் சுதந்திர இராச்சியமாகக் கருதப்படும் மலாக்கா சுல்தானியத்தை நிறுவினான். பரமேஸ்வரன் முஸ்லிமாக மதம் மாறினான். இக்கால கட்டத்தில் இஸ்லாமிய சமயம் தீவிரமாகப் பரவியது. மேலும் இக்காலப் பகுதியில் மலாக்கா முக்கிய வாணிப மையமாகவும் விளங்கியது.

ஐரோப்பிய குடியேற்ற ஆட்சிகள்

மலேசியாவின் வரைபடம்

1511ல் மலாக்கா போர்த்துக்கீசர் வசமானது. பின் 1641ல் டச்சுக்காரரால் கைப்பற்றப்பட்டது. 1786ல் கெடாவின் சுல்தான் பினாங்கை பிரிட்டிஷ் கிழக்கிந்தியக் கம்பனிக்கு குத்தகைக்குக் கொடுத்தார். இதனால் பிரித்தானியப் பேரரசு மலாயாவில் காலூன்றியது. பிரித்தானியர் 1819ல் சிங்கப்பூரைக் கைப்பற்றினர். மேலும் 1824ல் ஆங்கில-டச்சு ஒப்பந்தப்படி மலாக்காவையும் தமது கட்டுப்பாட்டுக்குள் கொண்டுவந்தனர். 1826ல் பிரித்தானியர் பினாங்கு, மலாக்கா, சிங்கப்பூர், லபுவன் தீவுகள் ஆகியவற்றை நேரடியாகத் தமது கட்டுப்பாட்டின் கீழ் கொண்டுவந்ததன் மூலம் அவற்றைத் தமது முடிக்குரிய குடியேற்ற நாடாக்கினர்.

இரண்டாம் உலகப்போரின் போது 1943-1945 வரை ஜப்பான் ஆட்சி செலுத்தியது. இக்காலப்பகுதியில் இனப்பிரச்சினைகள் உருவாகியதோடு தேசியவாதமும் மேலோங்கியது. போருக்குப்பின் மீண்டும் பிரித்தானியா அதிகாரத்திற்கு வந்தது. மேலும் பிரித்தானியா மலாயாவின் நிர்வாகத்தை ஒருங்கிணைத்து அதனை மலாயக் கூட்டமைப்பு என்ற ஒரே முடிக்குரிய குடியேற்ற நாடாக்கியது. எனினும் மலாயர் இதனை எதிர்த்தனர். மேலும் மலாயக் கம்யூனிஸ்ட் கட்சியின் தலைமையில் ஒன்றிணைந்த போராளிகள் பிரத்தானியப் படைகளுக்கெதிராக கொரில்லாப் போர் தொடுத்தனர்.

சமகாலம்

1957 ஆகஸ்ட் 31 அன்று விடுதலை அடைந்த மலேசியா 1963 ஆம் ஆண்டு மலேசிய கூட்டரசு எனப்படும் தற்கால மலேசிய நாடாக உருவாகியது. 1965ஆம் ஆண்டு சிங்கப்பூர் மலேசியாவிலிருந்து பிரிந்து தனிநாடாகியது. 1969ஆம் ஆண்டு நடந்த இனக்கலவரத்திற்குப் பிறகு பூமிபுத்திரா எனப்படும் பூர்வகுடிமக்களுக்கு பொருளாதார வளர்ச்சியில் சம பங்கு வழங்கும் நோக்கோடு சர்ச்சைக்குட்பட்ட புதிய பொருளாதார கொள்கை கொண்டுவரப்பட்டது.

சமீப காலங்களில் சிறுபான்மை இந்தியர்கள் தாங்கள் புறக்கணிக்கப்படுவதாக கூறி போராட்டம் நடத்தி வருவது குறிப்பிடத்தக்கது . நவம்பர் 2007இலும் பெப்ரவரி 2008 இலும் பெருந்திரளான மக்கள் ஒன்றுகூடி போராட முயன்றபோது காவற்துறையினரால் கண்ணீர் புகை குண்டு வீசிக் கலைக்கப்பட்டனர்.

ஆட்சிப்பிரிவுகள்

முதன்மைக் கட்டுரைகள்: மலேசிய மாநிலங்கள் மற்றும் மலேசிய மாவட்டங்கள்

பெர்லிஸ் கெடா பினாங்கு கெலந்தான் தெரங்கன்னு பேராக் செலங்கூர் நெகிரி செம்பிலான் மலாக்கா ஜொகூர் பகாங் சரவாக் சபா லபுவான் கோலாலம்பூர் புத்ராஜெயா தென்சீனக் கடல் Strait of Melaka தாய்லாந்து வளைகுடா Sulu Sea Celebes Sea

மலேசியாவின் மாகாணங்கள்

மலேசியா பதின்மூன்று மாநிலங்கள் மற்றும் மூன்று கூட்டாட்சிப்பகுதிகளை உள்ளடக்கியது. இவை இரு வலயங்களாகப் பிரிக்கப்பட்டுள்ளன. பதினொரு மாநிலங்கள் மற்றும் இரண்டு கூட்டாட்சிப் பகுதிகள் மலேசியத் தீபகற்பப் பகுதியிலும், இரண்டு மாநிலங்கள் மற்றும் ஒரு கூட்டாட்சிப் பகுதி கிழக்கு மலேசியாவிலும் உள்ளன. அனைத்து மாநிலங்களும் தமக்குரிய தனியான சட்டசபைகளைக் கொண்டுள்ளன.

அனைத்து மாநிலங்களும் மேலும் மாவட்டங்களாகப் பிரிக்கப்பட்டுள்ளன. மாவட்டங்கள் மேலும் ”முகிம்”களாகப் பிரிக்கப்பட்டுள்ளன.

வெளி இணைப்புகள்

• மலேசிய அரச இணையத்தளம்
• பிரதம மந்திரியின் இணையத்தளம்
• Department of Statistics Malaysia
• என்சைக்கிளோபீடியா பிரித்தானிக்காவில் மலேசியா