கி. ஆ. பெ. விசுவநாதம்

கட்டற்ற கலைக்களஞ்சியமான விக்கிப்பீடியாவில் இருந்து.
Jump to navigation Jump to search
முத்தமிழ் காவலர் கி.ஆ.பெ
Kap-viswanatham-238218.jpg
இந்திய அரசு வெளியிட்ட கி. ஆ. பெ. விசுவநாதம் அவர்களின் அஞ்சல் தலை
பிறப்பு கி. ஆ. பெ. விசுவநாதம்
நவம்பர் 11, 1899(1899-11-11)
திருச்சி, சென்னை மாகாணம்
இறப்பு திசம்பர் 19, 1994(1994-12-19) (அகவை 95)
தேசியம் இந்தியா
அறியப்படுவது எழுத்தாளர்
பெற்றோர் பெரியண்ண பிள்ளை,
சுப்புலட்சுமி அம்மையார்

கி. ஆ. பெ. விசுவநாதம் பிள்ளை (நவம்பர் 11, 1899 - டிசம்பர் 19, 1994) பரவலாக முத்தமிழ் காவலர் கி.ஆ.பெ, தமிழகத்தின் திருச்சியைச் சேர்ந்த தமிழ் உணர்வாளர் ஆவார். நீதிக்கட்சி உறுப்பினராக பிராமணரல்லாதோர் முன்னேற்றத்திற்காகவும் தமிழ்மொழியின் உயர்விற்காகவும் பாடுபட்டவர். துவக்கத்தில் பெரியாருடன் இணைந்து இந்தி எதிர்ப்புப் போராட்டத்தில் ஈடுபட்டபோதும் அவரது திராவிடநாடு கோரிக்கையுடன் உடன்படாதவர். அது தமிழரின் தனித்தன்மையை நீர்த்துவிடும் என எண்ணினார். இவர் எழுதியுள்ள 23 நூல்களும் தமிழ்வளர்ச்சித்துறையால் 2007-2008 இல் நாட்டுடைமையாக்கப்பட்டு பரிவுத் தொகை 10 லட்சம் ரூபாய் வழங்கப்பட்டது.[1][2]

பிறப்பும் இளமைக்காலமும்[தொகு]

1893-ஆம் ஆண்டு நவம்பர் 29-ஆம் தேதி பெரியண்ண பிள்ளை - சுப்புலட்சுமி அம்மையார் அவர்களுக்கு புதல்வனாய் பிறந்தார். தமிழ் இலக்கண கடலான இவர் பள்ளிக்கு சென்றதில்லை. ஐந்தாவது வயதில் முத்துச்சாமிக் கோனாரிடம் மணலில் தமிழ் எழுத்துகளை எழுதிப் பயிற்சி பெற்றார். நாவலர் வேங்கடசாமி நாட்டார், மறைமலையடிகள், திரு. வி. க, நாவலர் சோமசுந்தர பாரதியார் முதலிய தமிழறிஞர்கள் தொடர்பால் தாமாக முயன்று தமிழ் இலக்கண-இலக்கியங்களைக் கற்றுப் புலமை பெற்றார்.[3]

முக்கிய நிகழ்வுகள்[தொகு]

  • முதல் இந்தி எதிர்ப்புப்போரில் (1938) தந்தை பெரியாரோடும், தமிழறிஞர்களோடும் கைகோத்துப் போராடிய முதன்மைப் போராளியே கி. ஆ. பெ. விசுவநாதம்.
  • 1965ஆம் ஆண்டு இந்தி எதிர்ப்புப் போரில் மக்களை தூண்டியதாகக் கூறி இரண்டு மாதம் சிறையிலடைக்கப்பட்டார். அதன் காரணமாக கி. ஆ. பெ. விசுவநாதம் தனது மகள் மணிமேகலை திருமண உறுதியேற்பாடு நிகழ்வுக்கு செல்ல முடியவில்லை. தன் வாழ்நாளின் இறுதியில் தமிழீழ விடுதலைப் போருக்கு துணை நின்றார்.[4]

விருதுகள்[தொகு]

  • 1956ஆம் ஆண்டு திருச்சிராப்பள்ளி தமிழ்ச் சங்கம் "முத்தமிழ் காவலர்" விருது வழங்கியது
  • 1965ஆம் ஆண்டு மதுரையில் நடைபெற்ற சித்த மருத்துவ மாநாட்டில் "சித்த மருத்துவ சிகாமணி" விருது வழங்கப்பட்டது
  • 1975ஆம் ஆண்டு தமிழ்நாட்டு நல்வழி நிலையம் "வள்ளுவ வேல்" என்னும் விருது வழங்கியது

காலவரிசை[தொகு]

  • 1899 - நவம்பர் 11, தோற்றம். தந்தை: திரு. பெரியண்ணன் அவர்கள், தாய்: சுப்புலட்சுமி அம்மையார் அவர்கள்.
  • 1904 - திரு.முத்துசாமி கோனார் அவர்களிடம் மணலில் எழுதி தமிழ் எழுத்துகள் கற்றல்.
  • 1907 - தந்தையின் புகையிலைக்கடையில் அலுவல்
  • 1914 - திருச்சி சைவ சித்தாந்த சபையில் உறுப்பினராக சேர்ந்து பின்னர் துணைச்செயலர் ஆதல். பன்னிரண்டு ஆண்டுகள்.
  • 1916 - நீதிக்கட்சியின் உறுப்பினர் ஆதல். பின்னர் கட்சியின் நகர, வட்ட, மாவட்டக் கிளைகளில் படிப்படியாக பதவிகள் பெறல்.
  • 1920 - செப்டம்பர் 15, செல்லக்கண்ணு அம்மையாரை இல்வாழ்க்கை துணைவியாக ஏற்றல். 3 ஆண்டுகள் இல்லறத்திற்கு பிறகு மகப்பேறின் போது தாயும் சேயும் இறத்தல்.
  • 1923 - காங்கிரசில் இருந்த பெரியாருடன் நீதிக்கட்சியில் இணைந்து பணியாற்றல்.
  • 1925 - இரண்டாம் திருமணம். இராசம்மாள் அம்மையாரை துணைவியாக ஏற்றல். 4 ஆண்டுகள் இல்லறத்திற்கு பிறகு துணைவியார் இறைவனடி சேர்தல்.
  • 1929 - மூன்றாம் திருமணம். தமக்கையின் மகள் சுப்புலட்சுமி அம்மையாரை துணைவியாக ஏற்றல். மக்கட்பேறு: 6 பெண்கள், 4 ஆண்கள்.
  • 1936 - திருச்சி நகரக் கலைக்கழகத்தின் தலைவராகத் தேர்ந்தெடுக்கப் பெறுதல். 20 ஆண்டுகள் இயல், இசை, நாடக வளர்ச்சிக்கு பணியாற்றுதல்.
  • 1937 - இராஜாஜி தலைமையிலான சென்னை மாநில அரசு இந்தியைத் திணித்ததை எதிர்த்துப் போராட்டம், திருச்சியில் தமிழர் மாநாடு கூட்டுதல், பொதுச் செயலாளராகச் சுற்றுப்பயணம் செய்து தமிழ் மக்களைக் கிளர்ந்தெழச் செய்தல்.
  • 1940 - இராசா சர்.அண்ணாமலைச் செட்டியாருடன் சேர்ந்து தமிழிசை இயக்கத்திற்குப் பொதுச் செயலாளராக இருந்து பணியாற்றல்.
  • 1953 - 'வள்ளுவரும் குறளும்', 'தமிழ் மருத்துவம்', 'அறிவுக்கு உணவு' என்ற மூன்று நூல்கள் வெளியிடப்பெறுதல்.
  • 1954 - திருச்சியில் கி.ஆ.பெ.வி தொடக்கப்பள்ளி தொடங்கப் பெறல். 1961ல் அது உயர்நிலைப்பள்ளியாகவும், 1978ல் மேல்நிலைப்பள்ளியாகவும் உயர்தல்.
  • 1956 - திருச்சிராப்பள்ளி தமிழ்ச்சங்கம் "முத்தமிழ்க்காவலர்" என்னும் பட்டத்தை வழங்குதல். இதற்குப்பின் வாழ்நாள் முழுவதும் முத்தமிழ்க்காவலர் என்றே வழங்கப்பட்டார்.
  • 1958 - மணிவிழா. திருச்சி தமிழ்ச்சங்கம் மணிவிழா மலரை வெளியிட்டது. தமிழகப்புலவர் குழு தோற்றுவிக்கப்பட்டது.
  • 1965 - திருச்சியில் 9 எதிர்கட்சித் தலைவர்களை அழைத்து இந்தி எதிர்ப்பு மாநாட்டை நடத்துதல். சனவரி 26 இந்தி எதிர்ப்பு போராட்டத்தில் உயிர் நீத்த 27 பேரின் நினைவாக ஒவ்வொரு ஆண்டும் சனவரி 26 அன்று உண்ணா நோன்பு இருத்தல். திசம்பர் 11 மதுரையில் நடைபெற்ற தமிழகச் சித்தமருத்துவ மாநாட்டில் "சித்த மருத்துவ சிகாமணி" எனும் விருது வழங்கப் பெறுதல்.
  • 1969 - கோவையில் நடைபெற்ற தென் மாநிலங்களின் இந்தி எதிர்ப்பு மாநாட்டு வரவேற்புக் குழுத் தலைவராகப் பணியாற்றுதல். அக்டோபர் - காந்தியடிகளின் நூற்றாண்டு விழாவில் பல இடங்களில் பங்குபெறுதல்.
  • 1973 - 75ஆம் ஆண்டு பவளவிழா: மலர் வெளியிடப்பெறுதல்.
  • 1974 - சூலை 4 திருச்சி நகர் மன்றம் வரவேற்பு
  • 1975 - சென்னை மயிலாப்பூரில் உள்ள தமிழ்நாட்டு நல்வழி நிலையம் "வள்ளுவ வேள்" என்னும் விருதை வழங்குதல்.
  • 1978 - சனவரி தமிழ்நாடு இயல், இசை, நாடக மன்றம் "கலைமாமணி" விருது வழங்கி பாராட்டுதல்.
  • 1980 - மதுரை பல்கலைக்கழகம் கெளரவ டாக்டர் பட்டம் (டி.லிட்) வழங்கிச் சிறப்பித்தல்.
  • 1993 - ஜெர்மனி நாட்டில் நடைபெற்ற தமிழ் மாநாட்டிற்குச் சென்று, பின்னர் பிரான்சு நாட்டுக்கும் சென்று வருதல்.
  • 1994 - அந்தமான் தலைநகர் போர்ட்பிளேரில் வி.ஜி.பி உலகத்தமிழ்ச்சங்க இரண்டாவது மாநாட்டுக்குத் தலைமை ஏற்றல். சென்னையில் குன்றக்குடி அடிகளார் தலைமையில் ஆற்றிய உரை இவர்தம் இறுதி உரையாக முடிதல். திசம்பர் 19 - அதிகாலை சென்னையில் தம் பரு உடலைத் துறந்து புகழுடம்பு பெறுதல்.
  • 1997 - தமிழக முதல்வர் திரு. கருணாநிதி அவர்களால் திருச்சியில் துவக்கிய அரசு மருத்துவக் கல்லூரிக்கு கி. ஆ. பெ.யின் பெயர் சூட்டப்பட்டது.
  • 2000 - கி. ஆ. பெ. விசுவநாதம் விருது அவர்களின் பெயரில் தமிழ்நாடு அரசின் தமிழ் வளர்ச்சித் துறையின் கீழ் இயங்கும் தமிழ் வளர்ச்சி இயக்ககம் மூலம் தமிழ்நெறியில் தமிழ்த் தொண்டாற்றும் ஒருவருக்கு ஆண்டுதோறும் வழங்கப்படுகிறது.
  • 2010 - இவரது நினைவில் ஐந்து ரூபாய் தபால் தலை இந்திய தபால் துறை சார்பில் வெளியிடப்பட்டது.[5]

இயற்றிய நூல்கள்[தொகு]

  1. அறிவுக்கதைகள்
  2. அறிவுக்கு உணவு
  3. ஆறு செல்வங்கள்
  4. எண்ணக்குவியல்
  5. எது வியாபாரம்? எவர் வியாபாரி?
  6. எனது நண்பர்கள்
  7. ஐந்து செல்வங்களும் ஆறு செல்வங்களும்
  8. தமிழ் மருந்துகள்
  9. தமிழ்ச்செல்வம்
  10. தமிழின் சிறப்பு
  11. திருக்குறள் கட்டுரைகள்
  12. திருக்குறள் புதைபொருள் - பாகம் 1
  13. திருக்குறள் புதைபொருள் - பாகம் 2
  14. திருக்குறளில் செயல்திறன்
  15. நபிகள் நாயகம்
  16. நல்வாழ்வுக்கு வழி
  17. நான்மணிகள்
  18. மணமக்களுக்கு
  19. மாணவர்களுக்கு
  20. வள்ளலாரும் அருட்பாவும்
  21. வள்ளுவர்
  22. வள்ளுவரும் குறளும்
  23. வானொலியிலே

மேற்கோள்கள்[தொகு]

  1. http://www.tamilvalarchithurai.org/a/schemes/10 தமிழ்வளர்ச்சித்துறை வெளியீடு, பக்கம் 3
  2. http://thamizhagam.net/nationalized%20books/Ki.A.Pe.Viswanatham.html
  3. http://dinamani.com/weekly_supplements/tamil_mani/article716011.ece
  4. http://www.newsalai.com/details/Tamil-patriot-viswanatham-remembered-on-this-day.html#sthash.au2K0vJ2.dpuf
  5. http://www.indiapost.gov.in/Stamps2010.aspx

வெளியிணைப்புகள்[தொகு]

"https://ta.wikipedia.org/w/index.php?title=கி._ஆ._பெ._விசுவநாதம்&oldid=2507716" இருந்து மீள்விக்கப்பட்டது