உயிரணு ஆற்றல் பரிமாற்றம்
உயிரணு ஆற்றல் பரிமாற்றம் (கலச் சுவாசம் அல்லது உயிரணுச் சுவாசம்) என்பது உடலிலுள்ள உறுப்புக்களிலுள்ள உயிரணுக்களில், குருதியில் இருந்து பெறப்படும் ஆக்சிசன் பயன்படுத்தப்பட்டு, ஊட்டச் சத்துக்கள் வளர்சிதைமாற்றத்திற்குட்பட்டு உடலுக்குத் தேவையான ஆற்றலை உற்பத்தி செய்வதுடன் காபனீரொட்சைட்டு கழிவாக பெறப்படுவதுமாகும். இவ்வகையில் அனைத்து உடற் தொழிற்பாடுகளுக்கும் அவசியமான ஆற்றல் அல்லது சக்தி உற்பத்தி செய்யப்படுகிறது. இது குருதி மூலம் உடல் உறுப்புக்கள் அல்லது இழையங்கள் அல்லது உயிரணுக்களுக்கு கொண்டு வரப்படும் ஆக்சிசனானது, ஊட்டச் சத்துக்களில் இருக்கும் உயிர் வேதியியல் ஆற்றலை, உடலால் நேரடியாகப் பயன்படுத்தப்படக் கூடிய Adenosine triphosphate (ATP) சக்தியாக மாற்றும் நிகழ்வாகும்.
ஆக்சிசனானது பின்வரும் பல தொடர் நிகழ்வுகள் மூலம் உயிரணுக்களால் பெறப்படுகிறது.
1.காற்றோட்டம் : ஆக்சிசன் மிகுந்த காற்று மூச்சிழுத்தல் (inhalation) மூலம் நுரையீரலினுள் பெறப்படுகிறது. 2. O2 பரவல் : நுரையீரல்களின் நுண்ணறைகளிலிருந்து ஆக்சிசன், குருதி மயிர்த்துளைக்குழாய்கள் அல்லது இரத்தத் தந்துகிகளினுள் உள்ள இரத்தத்தில் பரவும்.
3. O2 கடத்துதல் : நுரையீரல் சிரையூடாக (அல்லது நுரையீரல் நாளத்தினூடாக) ஆக்சிசன் மிகுந்த இரத்தம் இதயத்தின் இடது மேலறையினுள் சென்று, பின் இடது கீழறைக்குக் கடத்தப்படும்.
4. O2 கொண்டு செல்லல் : குருதியில் கலந்துள்ள ஆக்சிசன் ஆனது, இடது இதயக் கீழறையிலிருந்து மகாதமனி அல்லது பெருநாடி என அழைக்கப்படும் நாடி மூலம் எடுத்துச் செல்லப்பட்டு, பின்னர் பல தமனிகளாலும் (நாடிகளாலும்) உடலின் பல பாகங்களுக்கும் கடத்தப்பட்டு, இறுதியில் தந்துகி வலைப்பின்னல்களால் (குருதி மயிர்த்துளைக்குழாய்களால்) ஆக்சிசன் உடலின் பல உயிரணுக்களுக்கும் பரப்பப்படும். திசுக்களின் (அல்லது இழையங்களின்) தந்துகிகளிலிருந்து ஆக்சிஜன் குளுக்கோசு போன்ற ஊட்டச் சத்துக்களோடு, உடல் உயிரணுக்களுக்கு பரவும்.
அந்த ஆக்சிசனே இந்த உயிரணு ஆற்றல் மரிமாற்றத்தில் பயன்படுத்தப்பட்டு, ஆற்றலை உற்பத்தி செய்வதுடன், காபனீரொட்சைட்டையும், நீரையும் வெளியேற்றும். இந்த காபனீரொட்சைட்டு மீண்டும் வெளியேறுவது பின்வரும் தொடர் நிகழ்வினால் நடைபெறும்.
1. CO2 கடத்துதல்: உயிரணுக்களிலிருந்து மயிர்த்துளைக் குழாய்களினுள் பரவும் கார்பன்டைஆக்ஸைடு, சிரைகள் (அல்லது நாளங்களூடாக) இதயத்துக்கு கடத்தப்படும். இதயத்தின் வலது மேலறைக்கு வரும் குருதி, வலது கிழறைக்குள் சென்று, பின் அங்கிருந்து நுரையீரல் தமனி மூலம் நுரையீரலுக்கு எடுத்துச் செல்லப்பட்டும்.
2. CO2, O2 இடமாற்றம்: நுரையீரல் நுண்ணறைகளிலிருந்து கார்பனீரொட்சைட்டு மூச்செறிதல் (exhalation) மூச்சுக் குழாய், பின்னர் மூக்கின் வழியாக வெளியேறும்.
