சர்வதேச இயற்பியல் ஆண்டு 2005
2005 ஆம் ஆண்டை சர்வதேச இயற்பியல் ஆண்டு (World year of Physics 2005) என ஐக்கிய நாடுகள் அவை அறிவித்தது. 1905 ஆம் ஆண்டில் அல்பர்ட் ஐன்ஸ்டீன் முக்கியத்துவம் வாய்ந்த மூன்று ஆய்வு முடிவுகளை வெளியிட்டதன் நூற்றாண்டு நிறைவைக் குறிக்கும் வகையில் 2005ஆம் ஆண்டு சர்வதேச இயற்பியல் ஆண்டாகக் கொண்டாடப் பட்டது. சார்பியல் கொள்கை, பிரவுனியன் இயக்கம், ஒளி மின் விளைவு ஆகிய இந்த மூன்று ஆய்வு முடிவுகளும் அறிவியல் பெரும் தாக்கத்தை ஏற்படுத்தின.
இயற்பியல் ஐன்ஸ்டீனின் கண்டுபிடிப்புகள் உருவாக்கிய பெரும் மாற்றங்கள் குறித்து இவ்வாண்டில் பன்னாட்டு அளவில் விவாதிக்கப்பட்டது. மேலும் 21 ஆம் நூற்றாண்டில் இயற்பியல் சந்திக்கவிருக்கும் சவால்கள் குறித்தும் நடப்பாண்டில் கருத்துப் பரிமாற்றம் சர்வதேச அளவில் மேற் கொள்ளப்பட்டன. பல்வேறு அறிவியல் துறைகளில் இயற்பியல் நிகழ்த்தி வரும் மாற்றங்கள் பற்றியும் உலக அறிவியல் அறிஞர்கள் விவாதித்தார்கள்.
