அயனிப் பிணைப்பு

கட்டற்ற கலைக்களஞ்சியமான விக்கிப்பீடியாவில் இருந்து.
தாவிச் செல்லவும்: வழிசெலுத்தல், தேடல்
சோடியமும் புளோரினும் அயனிகளால் பிணைந்து சோடியம் புளோரைடு உருவாதல். சோடியம் ஓர் நிலையான இலத்திரன் அமைப்பைப் பெற, தனது மிகவும் வெளிப்புறத்திலுள்ள இலத்திரனை இழக்க விடுபட்ட இலத்திரன் புளோரின் அணுவுடன் வெப்ப வெளியேற்றத்துடன் இணைகிறது. இவ்வாறு எதிர் எதிர் மின்னூட்டுக்களைப் பெற்ற அயனிகள் ஒன்றையொன்று கவர்கின்றன.

அயனிப் பிணைப்பு (ionic bond) அல்லது மின்மவணுப் பிணைப்பு என்பது எதிர்மின்னி இழப்பாலோ ஏற்பாலோ எதிரெதிர் மின்னூட்டம் பெற்ற இரு அயனிகளுக்கிடையே (மின்மவணுக்களுக்கு இடையே) நிலைமின் கவர்ச்சியால் உருவாகும் வேதியியற் பிணைப்பு ஆகும். அயனிப் பிணைப்புகள் ஓர் நேர்மின் அயனிக்கும், பொதுவாக ஓர் உலோகம் (மாழை), எதிர்மின் அயனிக்கும், பொதுவாக ஓர் அலோகம் (மாழையிலி) இடையே உருவாவதாகும். தூய அல்லது முழுவதுமான அயனிப் பிணைப்பு இருக்க இயலாது: அனைத்து அயனிப் பிணைப்பு சேர்மங்களும் பல்வேறளவுகளில் சகப் பிணைப்பு (பகிர்வுப் பிணைப்பு) கொண்டுள்ளன. எனவதயனிப்பிணைப்பு என்பது சகப் பிணைப்புத் தன்மையை விட (பகிர்வுப் பிணைப்புத் தன்மையைவிட) அயனிப்பிணைப்புத் தன்மை கூடுதலாக உள்ளவை என்று கூறுவது பொருந்தும். இரு அயனிகளுக்கும் உள்ள மின்னூட்டுக்களின் வேறுபாடு கூடுதல் ஆக ஆக சகப் பிணைப்பை விட அயனிப் பிணைப்புத் தன்மை கூடுகிறது. பகுதி அயனிப் பிணைப்பாகவும் பகுதி சகப் பிணைப்பாகவும் உள்ள பிணைப்புகள் முனைவுறு சகப் பிணைப்புகள் (முனைவுறு பகிர்வுப் பிணைப்பு) என அழைக்கப்படுகின்றன.

அயனிப் பிணைப்புச் சேர்வைகளின் பண்புகள்[தொகு]

திடநிலையில் மின்கடத்தா அயனிச் சேர்மங்கள் உருகிய நிலையில் அல்லது கரைசல்களில் மின்கடத்தியாக விளங்குகின்றன. இவற்றிற்கு பொதுவாக உயர்ந்த உருகுநிலை இருக்கும். பெரும்பாலும் நீரில் இவை கரையும்.

உருவாக்கம்[தொகு]

உறுதியான இலத்திரன் நிலையமைப்பை அடைவதற்காக குறைந்தளவு மின்னெதிர்த்தன்மை உடைய அணு இலத்திரனை வெளியேற்றும் போது அயன் பிணைப்பு உருவாதல் ஆரம்பமாகின்றது. இவ்வாறு நேர் மின்னேற்றம் உடைய கற்றயன் உருவாகும். (ஏனெனில் அணு எதிர்மின்னியை/ எதிர்மின்னிகளை இழந்து விட்டதால் அணுவில் உள்ள நேர்மின்னிகளின் எண்ணிக்கை எதிர்மின்னிகளின் எண்ணிக்கையை விட அதிகமாகும்.) இவ்வாறு வெளியேற்றப்படும் இலத்திரனை மின்னெதிர்த்தன்மை அதிகமுள்ள (அனேகமாக ஒரு அல்லுலோகம்) அணுவால் ஏற்றுக்கொள்ளப்பட்டு மறை மின்னேற்றமுடைய அனயன்கள் (ஏனெனில் அணு எதிர்மின்னியை/ எதிர்மின்னிகளை ஏற்றுக்கொண்டதால் அணுவில் உள்ள எதிர்மின்னிகளின் எண்ணிக்கை நேர்மின்னிகளின் எண்ணிக்கையை விட அதிகமாகும்) உருவாக்கப்படும். இவ்வாறு எதிர்மின்னிகளை இழப்பதாலும், பெற்றுக்கொள்வதாலும் உறுதியான இலத்திரன் நிலையமைப்பை அயன் பிணைப்பில் பங்குகொள்ளும் அணுக்கள் பெற்றுக்கொள்கின்றன. உதாரணமாக மேலே அசைவூட்டல் படத்தில் காட்டப்பட்ட அயன் பிணைப்புத் தாக்கத்தை நோக்குவோம். 2,8,1 ([Ne] 3s1) என்ற இலத்திரன் நிலையமைப்புடைய சோடியம் ஒரு இலத்திரனை இழந்து அருமன் வாயுவான நியோனுக்குரிய நிலையமைப்பை அடைகின்றது. 2,7 ([He] 2s22p6) என்ற எதிர்மின்னி கட்டமைப்புடைய புளோரீன் சோடியத்திலிருந்து கிடைக்கப்பெறும் எதிர்மின்னியை ஏற்றுக்கொண்டு 2,8 என்ற நியோனுக்குரிய எதிர்மின்னி கட்டமைப்பை அடைகின்றது. சோடியம் அயனும் புளோரீன் அயனும் எதிரெதிர் மின்னேற்றத்தைக் கொண்டிருப்பதால் இவை இரண்டும் மின்னேற்ற விசையால் ஈர்க்கப்பட்டு சோடியம் புளோரைட்டு என்ற அயன் சேர்வை உருவாகின்றது.

Na + F → Na+ + F → NaF

பொதுவாக அயன் பிணைப்பு உருவாவதற்கு அயன் பிணைப்பை உருவாக்கும் அணுக்களுக்கிடையிலான மின்னெதிர்த்தன்மை வித்தியாசம் 2.1க்கும் அதிகமாக இருத்தல் வேண்டும்.

வெளி இணைப்புகள்[தொகு]

"http://ta.wikipedia.org/w/index.php?title=அயனிப்_பிணைப்பு&oldid=1664211" இருந்து மீள்விக்கப்பட்டது