டானியல் புவர் நினைவு நூலகம், மதுரை
டானியல் புவர் நினைவு நூலகம் (Daniel Poor Memorial Library) இந்தியாவின் தமிழ்நாட்டில் மதுரை நகரில் உள்ள அமெரிக்கன் கல்லூரியின் வளாகத்தில் அமைந்துள்ள ஒரு நூற்றாண்டு பழமையான கல்லூரி மைய நூலகமாகும். பெரும்பாலும் சுருக்கமாக இது டிபிஎம் நூலகம் என்று அழைக்கப்படுகிறது. இது ஜூன் 28, 1915 ஆம் நாளன்று அதிகாரப்பூர்வமாக அதன் செயல்பாடுகளைத் தொடங்கியது.
வரலாறு[தொகு]
அமெரிக்க வாரியத்தைச் சேர்ந்த முன்னோடி மிஷனரிகளில் ஒருவரான டானியல் புவர் 1816 ஆம் ஆண்டில் யாழ்ப்பாணத்தில் அமெரிக்க இலங்கை மிஷனைத் தொடங்கியவர் ஆவார். அவர் 1835 ஆம் ஆண்டில் அப்போது மதுரா என்று அழைக்கப்பட்ட மதுரையில் நிறுவப்பட்ட அமெரிக்க மதுரா மிஷனின் நிறுவனர்களில் ஒருவராகவும் இருந்தார். டாக்டர் டானியல் புவரின் பேத்தி சாமுவேல் ஏ மோர்மன் 1926 ஜனவரி 26 ஆம் நாளன்று அமெரிக்க மிஷனரிகள் வாரியத்திற்கு $ 25,000 நன்கொடை அளித்து நூலக கட்டிடத்தை கட்டியெழுப்ப முக்கிய நபராக இருந்து செயலாற்றினார். [1] 1914 ஆம் ஆண்டிற்கும் 1920 ஆம் ஆண்டிற்கும் இடையில், ஜே.ஏ. சாண்டர்ஸ் அதன் முதல் நூலகராக பணியாற்றினார். அப்போது அவர் கல்லூரி நூலகத்தை நிறுவினார். இந்த கட்டிடம் முதலில் ஒரு தரை தளம் மட்டும் கொண்டு அமையும் வகையில் திட்டமிடப்பட்டது, இதில் சுமார் 50,000 தொகுதிகளை வைப்பதற்கான ஒரு இருப்பு அறை, ஒரு சிறிய அருங்காட்சியகம் மற்றும் ஒரு ஆசிரியர் அறை ஆகியவற்றைக் கொண்டிருக்கும் அளவு திட்டமிடப்பட்டது. முதல் தளத்தில் ஒரு நூலக ஆய்வு அறை மற்றும் இரண்டு விரிவுரையாற்றலுக்கான அறைகள் இருந்தன. தற்போது இந்த கட்டிடத்தில் ஒரு இருப்பு அறை, ஒரு குறிப்பு பிரிவு, ஒரு வாசிப்பு அறை, தொழில்நுட்ப பிரிவு மற்றும் கணினிமயமாக்கப்பட்ட மாணவர் அணுகல் அட்டவணை அமைப்பு ஆகிய வசதிகள் உள்ளன. நூலகத்தில் உள்ள இருப்பறையில் 76,000 க்கும் மேற்பட்ட தொகுதிகள் உள்ளன.
இலக்கு[தொகு]
"திறன்கள், எதிர்பார்ப்புகளில் மாறுபட்ட பல்வேறு வாடிக்கையாளர்களுக்கு சேவைகளை வழங்குதல் மற்றும் அமெரிக்கன் கல்லூரியில் உள்ள அனைத்து உறுப்பினர்களிடையே நம்பிக்கை, ஆதரவு மற்றும் ஊக்கத்தின் சூழ்நிலையை உருவாக்குதல்". என்பது இதன் இலக்காக அமைந்தது.
நோக்கு[தொகு]
"அமெரிக்கன் கல்லூரியில் உள்ள பயனர்களின் அறிவுசார் ஆர்வத்தையும் தகவல் தேவைகளையும் பூர்த்தி செய்ய உரிய தொகுப்புகள், சேவைகள், சூழலை உண்டாக்குதல்" என்பது இதன் நோக்காக அமைந்தது.
பிந்தைய முன்னேற்றங்கள்[தொகு]
முதல் தளத்தில் தற்போதைய இதழ்கள், குறிப்பிட்ட கால இதழ்களின் முழுத்தொகுதிகள் மற்றும் ஒரு சிறிய அரிய நூலகத் தொகுப்புகள் ஆகியவை உள்ளன. 1987-1988 ஆம் ஆண்டில் கட்டப்பட்ட மெஸ்ஸானைன் தளம் மட்டுமே அக்காலகட்டத்தில் கட்டிடத்தில் சேர்க்கப்பட்ட ஒரே கட்டட அமைப்பு ஆகும். இந்த வசதியின் மூலமாக நூல்களை வைக்கும் இடம் இரு மடங்கு அதிகரித்துள்ளது. மேலும் வாசிப்பு அறைக்கான இடத்தை விரிவுபடுத்த உதவியது. இணைய உலாவல் மையம், பார்வை குன்றிய மாணவர்களுக்கான பேசும் புத்தக நூலகம், வாசகர்கள் கிளப், முழுமையாக வைஃபை இயக்கப்பட்ட மற்றும் சிசிடிவி உள்ளிட்ட பல வசதிகள் இங்கு தற்போது உள்ளன.
பார்வையாளர்கள்[தொகு]
டானியல் புவர் நினைவு நூலகத்திற்கு வந்து பார்வையிட்ட பிரபலமான பார்வையாளர்கள் ரவீந்திரநாத் தாகூர், ராபர்ட் ஏ. மில்லிகன் (ராபர்ட் ஏ. மில்லிகன் 1923 ஆம் ஆண்டில் இயற்பியலுக்கான நோபல் பரிசு பெற்ற, ரவிக்கப்பட்ட ஒரு அமெரிக்க சோதனை இயற்பியலாளர், எஸ்.ஆர். ரங்கநாதன், கான் சாஹிப், சி.என். அண்ணாதுரை, வி.வி.கிரி, மு. கருணநிதி, கவிஞர் சுப்பிரமணிய பாரதி மற்றும் பலர் ஆவர்.
சேகரிப்புகள்[தொகு]
இந்த நூலகத்தில் அரிய பழமையான பொருட்கள், தொல்பொருள் கலைப்பொருட்கள் மற்றும் பாண்டியர் மற்றும்சோழர் காலங்களைச் சேர்ந்த பண்டைய நாணயங்கள் ஆகியவை உள்ளன. திருவாசகம், மணிமேகலை போன்றவற்றின் பல பண்டைய பனை ஓலைச்சுவடிகளின் கையெழுத்துப்படிகள் இங்கு அரிய காப்பகங்கள் பிரிவின் கீழ் பாதுகாத்து வைக்கப்பட்டுள்ளன. [2]
இந்திய அரசாங்கத்துக்கும் அமெரிக்க மிஷனரிகளுக்கும் இடையிலான முக்கியமான கடிதங்கள் இங்கு பாதுகாத்து வைக்கப்பட்டுள்ளன. நாயக்கர் காலத்தைச் சேர்ந்த மரச் செதுக்கல்கள், விஷ்ணு மற்றும் பிற இந்து கடவுள்களின் ஐந்து உலோக வெண்கல சிலைகள், இந்தோனேசிய மரச் செதுக்கல்கள் மற்றும் 1000 ஆண்டுகளுக்கும் மேலான மர சிலைகள் போன்றவை இங்குள்ள சேகரிப்பில் சிலவாகும். [3]
இங்கு இந்தத் தொகுப்புகள் சரியான ஆவணப்படுத்தப்படாமல் உள்ளன. மேலும் பல கலைப்பொருட்கள் தவறாகக் கையாளப்பட்டதாகத் தெரிகிறது மற்றும் சிலவற்றைக் காணவில்லை. [4]
மேலும் காண்க[தொகு]
குறிப்புகள்[தொகு]
- ↑ "Archived copy". Archived from the original on 2011-06-13. பார்க்கப்பட்ட நாள் 2010-09-18.
{{cite web}}: CS1 maint: archived copy as title (link) - ↑ http://www.thehindu.com/features/metroplus/society/history-of-a-100yearold-library-in-madurai/article7582873.ece
- ↑ http://www.thehindu.com/features/metroplus/society/history-of-a-100yearold-library-in-madurai/article7582873.ece
- ↑ http://www.thehindu.com/features/metroplus/society/history-of-a-100yearold-library-in-madurai/article7582873.ece