உப்பு

கட்டற்ற கலைக்களஞ்சியமான விக்கிப்பீடியாவில் இருந்து.
தாவிச் செல்லவும்: வழிசெலுத்தல், தேடல்
சாக்கடலுக்கு அருகில் உப்புப் படிவுகள்
பாக்கித்தானின் கேவ்ரா உப்பு சுரங்கத்தில் இருந்து கிடைத்த சிவப்பு பாறை உப்பு

உப்பு (Salt) என்பது NaCl என்ற மூலக்கூற்று வாய்ப்பாடு கொண்ட ஒரு கனிமமாகும். இதனுடைய வேதியியல் பெயர் சோடியம் குளோரைடு என்பதாகும். மேசை உப்பு, பாறைஉப்பு, ஆலைட்டு என்ற பெயர்களாலும் இதை அழைக்கிறார்கள். வேதிச் சேர்மங்களின் வகைப்பாட்டில் உப்புகள் என்ற மிகப்பெரிய வகையில் சோடியம் குளோரைடு என்ற இவ்வுப்பும் அடங்கும். கடல் நீரில் அதிக அளவில் உப்பு காணப்படுகிறது. கடல் நீரின் பிரதானமான கனிமப் பகுதிக்கூறும் இதுவேயாகும். கடலின் மேற்பரப்பு நீரில் ஒரு லிட்டருக்கு 35 கிராம் திடப்பொருள்கள் 3.5% உவர்ப்புத் தன்மையுடன் கலந்துள்ளன.

பொதுவாக உப்பு மனித வாழ்விற்கு அவசியமான ஒன்றாகும். மற்றும் உவர்ப்பு என்பது அடிப்படையான மனித சுவைகளில் ஒன்றாகும். உப்பு மிக பழமையானதும் எங்கும் நிறைந்திருக்கக் கூடிய உணவுகளில் ஒன்றாகும்,.மேலும் உப்பு உண்ணுவதற்கான முக்கிய உணவு முறை ஆகும். உணவுப் பொருள்களுடன் உப்பைச் சேர்ப்பது மிக முக்கியமான உணவு பாதுகாப்பு முறைகளில் ஒன்றாகும். சுமார் 8,000 ஆண்டுகளுக்கு முன்னர் உப்பு எடுக்கும் செயல்முறை வழக்கத்தில் இருந்ததாக ஆரம்பகால சான்றுகள் கூறுகின்றன. லக்கள் வாழ்ந்ததாகக் கருதப்படும் இன்றைய ருமேனியாவில் இருந்த நீரூற்றின் கொதி நீரில் இருந்து உப்பு பிரித்தெடுக்கப்பட்டதாக அறியப்படுகிறது. சீனாவிலும் இதே காலகட்டத்தில் உப்புத் தொழில் நடைபெற்றதாக ஆதாரங்கள் கூறுகின்றன. பண்டைய எபிரெயர்கள், கிரேக்கர்கள், ரோமர்கள், பைசண்டைன்கள், ஐத்தியர்கள், எகிப்தியர்கள் மற்றும் இந்தியர்கள் ஆகியோரால் உப்பு ஒரு பரிசுப் பொருளாகவும் கொடுக்கப்பட்டுள்ளது. வர்த்தகம் செய்வதற்குரிய ஒரு முக்கியமான வியாபாரப் பொருளாகவும் உப்பு மாறியது. மத்தியகிழக்கு கடல் வழியாக படகு மூலம் கொண்டு செல்லப்பட்டது. சிறப்பாக உப்பு சாலைகள் அமைக்கப்பட்டு உப்பு வேறு இடங்களுக்குக் கொண்டு செல்லப்பட்டது. ஒட்டக வணிகர்கள் மூலம் சகாரா பாலைவனம் முழுவதும் பல்வேறு பகுதிகளுக்கான உப்பு போக்குவரத்து நடைபெற்றது. உப்புப் பற்றாக்குறை மற்றும் உலகளாவிய தேவை காரணமாக நாடுகளுக்கு இடையே போர்கள் நிகழ்ந்தன. வரி வருவாயை உயர்த்துவதற்காகவும் உப்பு பயன்படுத்தப்பட்டது. பல்வேறு மத விழாக்களில் உப்பு பயன்படுத்தப்படுகிறது. மேலும் இது கலாச்சார மற்றும் பாரம்பரிய முக்கியத்துவத்தையும் கொண்டுள்ளது.

உப்பு சுரங்கங்களில் இருந்து உப்பெடுக்கும் செயல்முறை செயலாக்கப்படுகிறது, மற்றும் கடற்பகுதி நீர் (கடல் உப்பு) மற்றும் கனிம வளம் நிறைந்த நீரூற்று, ஆழமற்ற குளங்களில் உள்ள குளத்து நீர் போன்றவை ஆவியாக்கப்பட்டு உப்பு தயாரிக்கப்படுகிறது. எரிசோடா, குளோரின் போன்றவை உப்பிலிருந்து தயாரிக்கப்படும் முக்கியமான தொழிற்சாலை வேதிப் பொருள்களாகும். பாலிவினைல் குளோரைடு, நெகிழிகள், காகிதக்கூழ் மற்றும் பல்வேறு வேதிப் பொருள்கள் தயாரிப்பதற்குரிய தொழிற்சாலை செயல்முறைகள் உப்பை அடிப்படையாகக் கொண்டிருக்கின்றன. ஆண்டுதோறும் உலகத்தில் உற்பத்தியாகும் 200 மில்லியன் டன்கள் உப்பில் வெறும் 6% உப்பு மட்டுமே மனிதப் பயன்பாட்டுக்கு உதவுகிறது. ஏனைய உப்பு விவசாயத்திற்கும், தண்ணீர் பதப்படுத்தவும், வெண்பனியை அகற்றுவதற்கும் பயன்படுகிறது.

உண்ணக்கூடிய கடல் உப்பு, மேசை உப்பு போன்றவை கட்டியாகாமல் இருக்க அவற்றுடன் சில சேர்க்கைப் பொருள்கள் சேர்க்கப்படுகின்றன. அயோடின் குறைபாட்டை நீக்க உப்பானது அயோடினாக்கம் செய்யப்படுகிறது. சமயலுக்கு உப்பு பயன்படுவதோடு சமையல் சார்ந்த செயல்முறைகள் பலவற்றிலும் உப்பை பயன்படுத்துகிறார்கள். சோடியம் மனித உடல்நலத்திற்கு அத்தியாவசியமான ஒருஊட்டச்சத்துத் தனிமம் ஆகும். இது மின்பகுளியாகவும் சவ்வூடுபரவுதலுக்குறிய கரைபொருளாகவும் பயன்படுகிறது [1][2][3].அதிக அளவிலான உப்பை உட்கொள்ளுதல் குழந்தைகள் மற்றும் பெரியவர்களுக்கு பல்வேறு இதய நோய்களுக்கு காரணமாகும் இரத்த அழுத்தம் போன்ற பாதிப்புகள் ஏற்படும். உப்பினால் தோன்றும் இது போன்ற ஆரோக்கியத்திற்கு கேடான விளைவுகள் நீண்ட காலமாக ஆய்வு செய்யப்பட்டுள்ளன. இதன் விளைவாக வளர்ந்த நாடுகளில் உள்ள பல உலக சுகாதார அமைப்புகள் மற்றும் வல்லுநர்கள் பிரபலமான உப்பு உணவுகளை உட்கொள்வதை குறைக்க பரிந்துரை செய்கின்றனர்[3][4]. பெரியவர்கள் ஒரு நாளைக்கு 2,000 மி.கி. அளவுக்கும் குறைவாக சோடியம் குளோரைடு உட்கொள்வதை உலக சுகாதார நிறுவனம் பரிந்துரைக்கிறது, இது ஒரு நாளைக்கு 5 கிராம் உப்புக்கு சமமானதாகும் [5].

மேலும் படிக்க[தொகு]

மேற்கோள்கள்[தொகு]

  1. Scientific Report of the 2015 Dietary Guidelines Advisory Committee. US Department of Agriculture. 2015. பக். 7. Archived from the original on 18 April 2016. https://web.archive.org/web/20160418002033/http://health.gov/dietaryguidelines/2015-scientific-report/PDFs/Scientific-Report-of-the-2015-Dietary-Guidelines-Advisory-Committee.pdf. 
  2. "Sodium intake in populations: assessment of evidence". Institute of Medicine of the National Academies (2013). மூல முகவரியிலிருந்து 19 October 2013 அன்று பரணிடப்பட்டது. பார்த்த நாள் 17 October 2013.
  3. 3.0 3.1 "Most Americans should consume less sodium". Salt. Centers for Disease Control and Prevention. மூல முகவரியிலிருந்து 19 October 2013 அன்று பரணிடப்பட்டது. பார்த்த நாள் 17 October 2013.
  4. "EFSA provides advice on adverse effects of sodium". European Food Safety Authority (22 June 2005). மூல முகவரியிலிருந்து 30 June 2016 அன்று பரணிடப்பட்டது. பார்த்த நாள் 9 June 2016.
  5. "WHO issues new guidance on dietary salt and potassium". WHO (31 January 2013). மூல முகவரியிலிருந்து 20 July 2016 அன்று பரணிடப்பட்டது.

புற இணைப்புகள்[தொகு]

"https://ta.wikipedia.org/w/index.php?title=உப்பு&oldid=2517065" இருந்து மீள்விக்கப்பட்டது