சீயோன் தேசியப் பூங்கா

சீயோன் தேசியப் பூங்கா Zion National Park
IUCN வகை II (தேசிய வனம்)
அமைவிடம்	Washington, Kane, and Iron counties, Utah, United States
கிட்டிய நகரம்	Springdale, Utah(south), Orderville, Utah (east) and Cedar City, Utah near Kolob Canyons entrance
ஆள்கூறுகள்	37°18′0″N 113°3′0″W
பரப்பளவு	1,46,598 acres (593 கிமீ2), 1,43,035.07 acres (579 கிமீ2) federal
நிறுவப்பட்டது	July 31, 1909
வருகையாளர்கள்	2,697,182 (in 2007)
நிருவாக அமைப்பு	National Park Service

Zion Canyon as seen from the top of Angels Landing at sunset

சீயோன் தேசியப் பூங்கா (Zion National Park) தென்மேற்கு ஐக்கிய அமெரிக்காவின் யூட்டாவில் அமைந்துள்ள ஒரு தேசியப் பூங்காவாகும். செந்நிற நாவஃகோ (Navajo) என்றழைக்கப்படும் மணற்பாறையினால் ஆன 24 கிமீ(15 மைல் ) நீளமும், 800 மீ வரை (அரை மைல்) ஆழமும் கொண்ட சீயோன் பள்ளத்தாக்கு, 593 சதுர கி.மீ (229-சதுர மைல்) பரப்பு கொண்ட இவ் இயற்கைப் புரவகத்தின் (இத்தேசியப் பூங்காவின்) முக்கிய கவர்ச்சியாகும். கொலராடோ மேட்டுநிலம், கிரேட் பேசின், மஃகாவிப் பாலைநிலம் ஆகிய மூன்றும் சந்திக்கும் இடத்தில் இத்தேசியப் பூங்கா அமைந்துள்ளமை, இப் பூங்காவின் தனித்தன்மை வாய்ந்த புவியியல் சூழமைப்புக்கும், பல்வகைமை கொண்ட நிலைத்திணை (தாவரம்), உயிரினங்களுக்கும் காரணமாக அமைகின்றன. பல வகையான நிலைதிணைகளும், 289 வகையான பறவைகளும், 75 வகை முலையூட்டிகளும் (19 வகை வௌவால்கள் உட்பட), 32 வகை ஊர்வனவும், இங்கு வாழ்கின்றன. இங்குள்ள சிறப்பான விலங்குகளில் மலையரிமா, பெருங்கொம்பாடு, கலிபோர்னியா காண்டோர் என்னும் கழுகு, பொன்னாங்கழுகு முதலியனவற்றைக் குறிப்பிடலாம்.

இப்பகுதியில் மாந்தர் வாழ்க்கை ஏறத்தாழ 8000 ஆண்டுகளுக்கு முன்னர் தொடங்கியது. இவர்கள் அமெரிக்கப் பழங்குடிகள். இவர்களுக்குப் பின்னர் கி.பி. 300 ஆண்டளவில் அவ்வப்போது நாடோடிகளாகத் திரிந்து வாழும் கூடைமுடையும் அனாசாசி (Basketmaker Anasazi) என்னும் இனத்தவர் இங்கு வாழ்ந்தனர். இவர்களுக்குப் பின்னர் கி.பி. 500 ஆண்டளவில் அங்கு நிலையாக வாழத்தொடங்கிய கூடைமுடையும் வர்ச்சின் (கன்னி) அனசாசி பண்பாடு (Virgin Anasazi culture) அங்கு முகிழ்த்தது