சில்ரன் ஆப் ஹெவன்
| சில்ரன் ஆப் ஹெவன் | |
|---|---|
 | |
| இயக்கம் | மஜித் மஜீதி |
| கதை | மசித் மசிதி |
| நடிப்பு | அமீர் பாரூக் ஹஷேமியான், பாஹரே சித்திக்கீ |
| வெளியீடு | 1997 |
| ஓட்டம் | 89 நிமிடங்கள் |
| மொழி | பாரசீகம் |
சில்ரன் ஆப் ஹெவன் (சொர்க்கத்தின் குழந்தைகள்) என்பது 1997 ஆம் ஆண்டு இரான் நாட்டிலிருந்து பாரசீக மொழியில் வெளிவந்த ஒரு குடும்பத் திரைப்படம் ஆகும். இதனை மசித் மசிதி எழுதி இயக்கியிருந்தார். இத்திரைப்படம் சில்ரன் ஆப் ஹெவன் (Children of heaven) என்ற தலைப்பில் ஆங்கிலத்தில் மொழிமாற்றம் செய்து வெளியிடப்பட்டது.[1][2][3]
இப்படம் ஒரு சகோதரன் சகோதரி இடையே நிலவும் அன்பு, சகோதரியின் காலணிகள் தொலைந்து விடுவதால் அவர்களுக்கு ஏற்படும் சங்கடங்கள், அதை சமாளிக்க அவர்கள் கையாளும் ருசிகர உத்திகள், இரானில் நிலவும் சமுதாய ஏற்றத்தாழ்வுகள் ஆகியவற்றை குழந்தைகளின் பார்வையிலிருந்தும் நகைச்சுவையுடனும் சித்தரிக்கிறது. இத்திரைப்படத்திற்கு 1998 ஆம் ஆண்டிற்கான சிறந்த பிற மொழித் திரைப்படத்துக்கான அகாதமி விருது கிடைத்தது.
கதை
[தொகு]ஒன்பது வயதான அலி, தன் தங்கை சாராவின் கிழிந்த காலணிகளைத் தைத்துவிட்டு, மளிகைப் பொருட்கள் வாங்குவதற்காக ஒரு கடைக்குச் செல்கிறான். கடையில் பொருட்களை வாங்கிக்கொண்டிருக்கும் நேரத்தில், வெளியே வைக்கப்பட்டிருந்த சாராவின் காலணிகளை, பழைய பொருட்களைச் சேகரிக்கும் நபர் ஒருவர் குப்பை என நினைத்துத் தவறுதலாக எடுத்துச் சென்றுவிடுகிறார். காலணிகள் காணாமல் போனதை அறிந்து பதற்றமடையும் அலி, அவற்றைத் தேடும் அவசரத்தில் அங்கிருந்த பழங்களைக் கொட்டிவிடவே, கோபமடைந்த கடைக்காரர் அவனை விரட்டியடிக்கிறார்.
தெற்கு டெஹ்ரானில் வசிக்கும் அலியின் குடும்பம் வறுமையின் பிடியில் சிக்கித்தவிக்கிறது. ஐந்து மாத வீட்டு வாடகை மற்றும் மளிகைக்கடைக் கடனால் சிரமப்படும் பெற்றோரிடம், காலணிகள் தொலைந்ததைக் கூற அலி பயப்படுகிறான். எனவே, தங்கை சாராவிடம் நடந்ததைக் கூறி, இதனைப் பெற்றோரிடம் சொல்ல வேண்டாம் என கெஞ்சுகிறான். இருவரும் தங்களுக்குள் ஒரு ரகசிய ஒப்பந்தம் செய்துகொள்கின்றனர்.
அதன்படி, காலையில் சாரா அலியின் காலணிகளை அணிந்து பள்ளிக்குச் செல்வாள். மதியம் அவள் திரும்பி வந்ததும், அதே காலணிகளை வாங்கிக்கொண்டு அலி தனது பள்ளிக்குச் செல்வான். இதனால் அலி தினமும் பள்ளிக்குத் தாமதமாகவே செல்கிறான். அண்ணன், தங்கைக்கிடையே சிறு சிறு சண்டைகளும் ஏற்படுகின்றன. இதற்கிடையே, தேர்வில் அதிக மதிப்பெண் பெற்றதற்காக அலிக்கு ஒரு தங்க நிறப் பேனா பரிசாகக் கிடைக்கிறது. தன் தங்கையைச் சமாதானப்படுத்த அதை அவளுக்கு அன்பளிப்பாகத் தருகிறான்.
சாராவிடம் காலணிகளை வாங்கியதும் அலி எவ்வளவு வேகமாக ஓடினாலும், பள்ளிக்குத் தொடர்ந்து தாமதமாகவே செல்கிறான். முதல் முறை அவனைக் கண்டிக்காமல் விடும் தலைமை ஆசிரியர், அடுத்தடுத்த முறைகளில் கடுமையாக எச்சரிக்கிறார். ஒரு கட்டத்தில் பள்ளியை விட்டே நீக்கிவிடுவதாக மிரட்டுவதுடன், அவனது தந்தையை அழைத்து வருமாறும் கூறுகிறார். இதைக் கேட்டு அழுதுகொண்டிருக்கும் அலியைப் பார்க்கும் அவனது வகுப்பு ஆசிரியர், அலி வகுப்பில் முதல் மாணவன் என்பதைத் தலைமை ஆசிரியரிடம் எடுத்துக்கூறி அவனுக்குக் கடைசி வாய்ப்பு பெற்றுத் தருகிறார்.
ஒருநாள், ரோயா என்ற மாணவி தனது காலணிகளை அணிந்திருப்பதை சாரா கவனிக்கிறாள். பள்ளி முடிந்ததும் அலியும் சாராவும் ரோயாவைப் பின்தொடர்ந்து செல்கின்றனர். ஆனால், ரோயாவின் தந்தை பார்வையற்றவர் என்பதை அறிந்ததும், மனமிறங்கி அமைதியாக அங்கிருந்து திரும்பிவிடுகின்றனர். பின்னர், படிப்பில் கெட்டிக்காரியான ரோயாவுக்கு அவளது தந்தை புதிய ஊதா நிறக் காலணிகளை வாங்கித் தருவதையும், சாராவின் பழைய காலணிகளை அவள் வீசிவிட்டதையும் தோழி மூலம் அறிந்து சாரா பெரும் ஏமாற்றமடைகிறாள்.
கூடுதல் வருமானத்திற்காக, அலியின் தந்தை தோட்ட வேலை செய்யும் உபகரணங்களை இரவலாகப் பெற்றுக்கொண்டு, பணக்காரர்கள் வசிக்கும் வடக்கு டெஹ்ரான் பகுதிக்கு அலியை அழைத்துச் செல்கிறார். பல இடங்களில் வேலை தேடி அலைந்த பிறகு, அலிரேசா என்ற சிறுவனும் அவனது தாத்தாவும் வசிக்கும் வீட்டில் வேலை கிடைக்கிறது. அங்கு கிடைக்கும் ஊதியம் மற்றும் மரியாதையால் மகிழும் தந்தை, சாராவுக்குப் புதிய காலணிகளை வாங்க முடிவு செய்கிறார். ஆனால், துரதிர்ஷ்டவசமாக அவர்கள் திரும்பும் வழியில் மிதிவண்டியின் பிரேக் பழுதாகி விபத்துக்குள்ளாகின்றனர். இதில் மிதிவண்டியும் உடைந்து, தந்தைக்கும் பலத்த காயம் ஏற்படுகிறது.
இதற்கிடையில், சிறுவர்களுக்கான நான்கு கிலோமீட்டர் மாரத்தான் ஓட்டப்பந்தயம் நடைபெறுவதையும், அதில் மூன்றாம் இடம் பிடிப்பவர்களுக்குச் சுற்றுலா மற்றும் 'ஒரு ஜோடி புதிய காலணிகள்' பரிசாக வழங்கப்படும் என்பதையும் அலி அறிந்துகொள்கிறான். சாராவுக்குப் புதிய காலணிகளை வென்று தருவதற்காக அந்தப் பந்தயத்தில் பங்கேற்கிறான். எப்படியாவது மூன்றாம் இடத்தைப் பிடிக்க வேண்டும் என இலக்கு வைத்து ஓடும் அலி, எதிர்பாராத விதமாக முதலாவதாக வந்துவிடுகிறான்.
காலணிகள் கிடைக்காமல் போனதால் பெரும் ஏமாற்றத்துடன், தனக்காகக் காத்திருக்கும் தங்கையிடம் அலி வெறும் கையுடன் திரும்புகிறான். அதே வேளையில், அலியின் தந்தை தங்களின் மிதிவண்டியில் அலிக்கும் சாராவுக்குமான இரண்டு ஜோடி புதிய காலணிகளை (வெள்ளை மற்றும் இளஞ்சிவப்பு) வாங்கிக்கொண்டு வருவதைக் காட்சிப்படுத்துகிறார்கள். படத்தின் இறுதிக் காட்சியில், பந்தயத்தில் ஓடி ஓடிக் கொப்புளங்கள் ஏற்பட்ட தனது கால்களை, பெரும் சோர்வுடன் அலி குளத்து நீரில் நனைத்து ஆசுவாசப்படுத்திக் கொள்கிறான்.
வெளி இணைப்புகள்
[தொகு]- சில்ரன் ஆப் ஹெவன் இணையத்தளம் பரணிடப்பட்டது 2010-02-22 at the வந்தவழி இயந்திரம்
மேற்கோள்கள்
[தொகு]- ↑ "The 71st Academy Awards (1999) Nominees and Winners". oscars.org. Retrieved 20 October 2015.
- ↑ "Miramax Acquires Majid Majidi's 'The Color of Hope'". PR Newswire. Cision. December 13, 2001. Archived from the original on February 15, 2002. Retrieved June 20, 2019 – via Yahoo.com.
- ↑ "Children of Heaven (1999)". Box Office Mojo. 2002-08-28. Retrieved 2012-01-27.