உயிரகச்செதுக்கு

மூளை உயிரகச்செதுக்கு

உயிரகச்செதுக்கு அல்லது துணித்தாய்வு (Biopsy) என்பது நோயை ஆய்வுறுதி செய்ய ஓர் உயிரினத்தின் உடலில் இருந்து உயிரணுக்கள், அல்லது இழையங்கள் அகற்றப்படும் ஒரு மருத்துவ சோதனை அல்லது அப்படியான மருத்துவ சோதனையில் பெறப்படும் மாதிரி ஆகும். இவ்வாறான உயிர்ச்செதுக்கை ஆராய்ந்தறிவதன் மூலம் ஒரு நோய் இருப்பதையோ அல்லது ஒரு நோய் அதிகரிப்பதை உறுதிப்படுத்தவோ முடிகின்றது. இந்த உயிரகச்செதுக்கின் மூலம் பெறப்படும் இழையங்கள் தகுந்த செயல்முறைகளின் பின்னர், ஒரு நோயியலாளரால் நுண்ணோக்கியில் அவதானிக்கப்பட்டு, நோய் பற்றி ஆராயப்படும். அத்துடன் சில வேதியியல் முறையிலும் ஆராயப்படலாம். இது நோயியல் தொடர்பான ஒரு மருத்துவ நடைமுறையாகும்.

கட்டி (tumour) அல்லது ஐயத்துக்கிடமான பகுதி முழுமையாக அகற்றப்படலாம். இது அகழ்ந்தெடுக்கும் உயிரகச்செதுக்கு (Excisional biopsy) எனப்படும். நோய் என்ற ஐயத்துக்கிடமான பகுதியில் ஒரு வெட்டோ, கீறலோ இடப்பட்டு இழையவியல் அமைப்பு பாதுகாக்கப்பட்ட நிலையில் இழையத்தின் ஒரு பகுதி மட்டும் பெறப்படுமாயின் அது கீறல் உயிரகச்செதுக்கு (incisional biopsy) எனப்படும். சில சமயம் இழையவியல் அமைப்பு கருத்தில் கொள்ளப்படாமல் நீர்ம அல்லது திண்ம இழையம் ஊசி மூலம் குற்றி பெறப்படுமாயின் அது ஊசி உறிஞ்சல் உயிரகச்செதுக்கு எனப்படும்.

வரலாறு

அராபிய மருத்துவரான அபுல்காசிம் (1013-1107) என்பவர் மருத்துவ ஆய்வறிவுக்கான உயிரகச்செதுக்கை எடுத்தார். இது தைராய்டு சுரப்பி யில் ஏற்பட்ட ஒரு கழலையிலிருந்து ஊசியால் குற்றி பெறப்பட்ட உயிரகச்செதுக்கு ஆகும்.