அறுவகைப் பெயர்ச்சொற்கள்
ஒரு பொருளின் பெயரைக் குறிப்பது பெயர்ச்சொல். பெயர்ச்சொல் ஆறு வகைப்படும்.[1][2][3]
அறுவகைப் பெயர்ச்சொற்கள்:
- பொருட்பெயர்
- இடப்பெயர்
- காலப்பெயர்
- சினைப்பெயர்
- குணப்பெயர் (பண்புப்பெயர்)
- தொழிற்பெயர்
பொருட்பெயர்[தொகு]
பொருளைக்குறிக்கும் பெயர் பொருட்பெயர். இது உயிருள்ள பொருள்கள், உயிரற்ற பொருள்கள் என இருவகைப்படும்.
எடுத்துக்காட்டு:
- உயிருள்ள பொருட்களைக் குறிக்கும் பெயர்கள்:
- குமரன், தென்னை, செம்பருத்தி, வெள்ளாடு...முதலியன.
- உயிரற்ற பொருட்களைக் குறிக்கும் பெயர்கள்:
- நாற்காலி, அடுப்பு, தட்டு, மண், நீர், காற்று...முதலியன.
இடப்பெயர்[தொகு]
ஓரிடத்தைக் குறிப்பது இடப்பெயர்.
எடுத்துக்காட்டு:
- வீடு, தெரு, பள்ளி, கோவில், காடு, மலை...முதலியன.
காலப்பெயர்[தொகு]
காலத்தைக் குறிக்கும் பெயர் காலப்பெயர்.
எடுத்துக்காட்டு:
- நொடி, மணி, கிழமை, வாரம், ஆண்டு...முதலியன.
சினைப்பெயர்[தொகு]
முழுமையான ஒன்றின் பகுதிகளைக் குறிக்கும் பெயர் சினைப்பெயர். சினை என்றால் உறுப்பு என்று பொருள்.
எடுத்துக்காட்டு:
- கண், விரல், இலை, கனி, விதை, கொம்பு...முதலியன.
குணப்பெயர்[தொகு]
நிறம், அளவு, சுவை, வடிவம் ஆகியவற்றின் அடிப்படையில் வழங்கப்படும் பெயர் குணப்பெயர். இது பண்புகளைக் குறிப்பதால் பண்புப்பெயர் எனவும் வழங்கப்படும்.
எடுத்துக்காட்டு:
- கருமை, வெண்மை, இனிப்பு, உவர்ப்பு, அன்பு, வட்டம், சதுரம், ...முதலியன.
தொழிற்பெயர்[தொகு]
செய்யும் தொழிலைக் குறிக்கும் பெயர் தொழிற்பெயர்.
எடுத்துக்காட்டு:
- எழுதுதல், ஆடல், படித்தல், கற்பித்தல்...முதலியன
மேற்கோள்கள்[தொகு]
- ↑ மாநிலக் கல்வியியல் ஆராய்ச்சி மற்றும் பயிற்சி நிறுவனம் (2015). தமிழ்நாடு அரசுப் பாடநூல் ,ஏழாம் வகுப்பு ,இரண்டாம் பருவம் ,தமிழ். இலக்கணம்: தமிழ்நாடு அரசு , பள்ளிக்கல்வித் துறை.. பக். 32,33,34.
- ↑ சொல்வகை-பெயர்ச்சொல், தமிழிணையக் கல்விக்கழகம்
- ↑ அறுவகைப் பெயர் சொற்கள், கூகுள் புக்சு