களை
கட்டற்ற கலைக்களஞ்சியமான விக்கிபீடியாவில் இருந்து.
களை என்பது, குறித்த சந்தர்ப்பங்களில் பிரச்சினைகளைக் கொடுக்கும், மனிதனால் உருவாக்கப்பட்ட தோட்டங்கள், புல்தரைகள், வயல்கள் போன்ற சூழல்களில் வளரும் தேவையற்ற தாவர வகைகளைக் குறிக்கும். பொதுவாக இச் சொல் வேகமாகப் பெருகும் தாயக மற்றும் பிற இடத்துத் தாவரங்களைக் குறிக்க இச்சொல் பயன்படுகின்றது.
பல காரணங்களால் களைகள் தேவையற்றனவாகக் கருதப்படலாம். பார்வைக்கு அழகற்றனவாக இருத்தல்; சூரிய ஒளியைத் தடுப்பதனாலும், மண்ணிலிருக்கும் ஊட்டச் சத்துக்களுக்குப் போட்டியிடுவதனாலும் பிற தாவரங்களின் வளர்ச்சிக்குக் குந்தகமாக இருத்தல் என்பன இவற்றுட் சில. இவை நோய்க் கிருமிகளுக்கு இடம் கொடுத்து, பிற பயிர்களுக்குத் தொற்றை ஏற்படுத்தி அவற்றின் தரம் குறைவதற்குக் காரணமாகவும் அமையக்கூடும். சில களைகள் முட்களைக் கொண்டுள்ளன, வேறு சில தொடும்போது அரிப்பை உண்டாக்குவனவாக இருக்கின்றன, வேறு சிலவற்றின் பகுதிகள் உடலிலோ ஆடைகளிலோ ஒட்டிக்கொண்டு விடுகின்றன. இதனாலும் இக் களைகள் விரும்பப்படாதன ஆகின்றன.
