திருக்காளத்தி நாதர் உலா

கட்டற்ற கலைக்களஞ்சியமான விக்கிப்பீடியாவில் இருந்து.
(திருக்காளத்திநாதர் உலா இலிருந்து வழிமாற்றப்பட்டது)
Jump to navigation Jump to search

திருக்காளத்திநாதர் உலா கவிராச பிள்ளை எழுதிய 16 ஆம் நூற்றாண்டு நூல். இந்த நூலின் பெயர் சில ஏடுகளில் காளத்தியாள்வார் உலா [1] என்று உள்ளது. இது சொற்சுவையும், பொருட்சுவையும் கொண்ட நூல். [2]

நூலில் சொல்லப்படும் செய்திகள்[தொகு]

  • சிவன் ஐம்பூதமாய் விளங்குகிறான். [3]
  • காளத்தியில் சிவன் ஒலி தரும் காற்றாக விளங்குகிறான்.
  • காளத்தி ஆற்றூர் வளநாட்டின் பகுதி
  • காலத்திக்கு மூன்று சோழர்கள் விக்கிரம சோழன், குலோத்துங்கன், இராசேந்திர சோழன் திருப்பணி செய்தனர். அதனால் இவ்வூருக்கு மும்முடிச் சோழபுரம் என்னும் பெயரும் உண்டு.
  • வரகுண பாண்டியன் இவ்வூரை வழிபட்டான்
  • நக்கீர தேவ நாயனார் பாடிய கயிலைபாதி காளத்திபாதி அந்தாதி என்னும் நூலை நினைவுகூர்கிறார்.
  • அணு, துடி, கலை, காட்டை, கணம், மாத்திரை, எல்லை, கடிகை, நண்பகல், காலை, உச்சி, அந்தி, திதி, வாரம், நட்சத்திரம், யோகம், கரணம், ஓரை, மாதம், உவா, வருடம், உகம், கற்பம், சங்காரம் – முதலான கால கால-அளவைப் பெயர்கள் இந்த நூலில் குறிப்பிடப்பட்டுள்ளன.
  • பச்சை, வடம், கலை, மேற்கட்டி, சிறுபாகை, அணைபாகு, சட்டை, கச்சு, பவந்தம், துப்பட்டி, துண்டம், கோவணம், போர்வை, வேட்டி – முதலானவை நூலில் குறிப்பிடப்பட்டுள்ள பருத்தி ஆடைகள்.
  • கடல், கழிநீர், ஏரி, நீர்க்குளம், கால்வாய், துரவு-கிணறு, நீர் வற்றாத தடாகம், மடு, கேணி, வாடவி, ஆறை, அகழ், ஊற்று, ஓடை – என்னும் நீர்நிலைகளின் பெயர் தொனிக்குமாறு பாடல்கள் பாடப்பட்டுள்ளன.
  • பெதும்பைப் பருவத்தில் கழங்காடுதலும், மங்கைப் பருவத்தில் அம்மானையாடுதலும் சொல்லப்படுகின்றன.

கருவிநூல்[தொகு]

  • மு. அருணாசலம், தமிழ் இலக்கிய வரலாறு, பதினாறாம் நூற்றாண்டு, மூன்றாம் பாகம், பதிப்பு 2005

அடிக்குறிப்பு[தொகு]

  1. காளத்தி ஆள்வா = காளத்தி நாதர்
  2. சிவபெருமான் உலா வரும்போது கண்டு காமுற்ற மங்கை தன் தோழியரிடம் ‘இவர் எம்மை ஆள்வாரோ’ என வினவ, அவர்கள் ‘நீ காமுறுவது தகாது’ எனக் கூறும் பகுதி இந்த நூலின் நயத்துக்கு ஓர் எடுத்துக்காட்டு

    -கோதையே
    வண்டு இலங்கும் மேனியிலை வாழும் மடவாரைக்
    கண்டிலையோ, நெஞ்சம் கரந்தாயோ – பண்டு நீ
    கற்ற கலை எல்லாம் கழன்ற கலையுடனே
    அற்றவோ? நின்னை அவர் கொண்டால் – உற்று அணைக்க
    மாமியார் உண்டோ, மலையிற் பெருநீலி
    ஆம் அவளும் சக்களத்தி ஆகாளோ? – காமிக்கை
    தோல் சேலைக்கோ, பிச்சைச் சோற்றுக்கோ, ஓட்டுக்கோ
    மேல் சாம்பல் பூச்சுக்கோ, சுடலை வீட்டிற்கோ – நாற் சந்தி
    அம்பலத்துக்கோ, எலும்பின் ஆபரணம் பூணுகைக்கோ
    வெம் பணி மாலைக்கோ, பேய் வேலைக்கோ, - சம்பந்தம்
    நல் இடத்தில் சோதித்தாய் நம் போலியர் இருக்கும்
    இல் அறத்துக்கு இத்தனையும் ஏற்குமோ

  3. ஆரூரிலே புவியாய், ஆனைக்காவில் புனலாய்
    சீரூர் அருணையிலே செந்தீயாய்ப் – பேர் ஊரும்
    ஏகாம்பரத்தில் இயங்கு ஒலியாய்த் தன் ஊரில்
    ஆகாயமாய் நுற்கும் ஆடலான் இந்நூலில் வரும் கண்ணிகள்