வொல்வெண்டால் தேவாலயம்
| வொல்வெண்டால் தேவாலயம் | |
|---|---|
 | |
| அடிப்படைத் தகவல்கள் | |
| அமைவிடம் | கொழும்பு, இலங்கை |
| புவியியல் ஆள்கூறுகள் | 6°56′32″N 79°51′32″E / 6.9421°N 79.8590°E |
| சமயம் | இலங்கை கிறித்தவத் திருச்சபை |
| நேர்ந்தளிக்கப்பட்ட ஆண்டு | 6 மார்ச் 1757 |
| செயற்பாட்டு நிலை | பயன்பாட்டில் உள்ளது |
| இணையத் தளம் | www |
வொல்வெண்டால் தேவாலயம் (Wolvendaal Church; டச்சு: Wolvendaalse Kerk) என்பது இலங்கையின் தலைநகரான கொழும்பு நகரின் புறநகர்ப் பகுதியான புறக்கோட்டையில் அமைந்துள்ள ஒரு வரலாற்றுச் சிறப்புமிக்க தேவாலயம் ஆகும். இது இலங்கையிலுள்ள டச்சுக் காலக் கட்டிடங்களுள் மிகவும் முக்கியத்துவம் வாய்ந்தது மட்டுமன்றி, நாட்டில் இன்றும் தொடர்ந்து வழிபாட்டில் இருந்துவரும் பழமையான புரட்டஸ்தாந்து தேவாலயங்களுள் ஒன்றுமாகும்.
வரலாறு
[தொகு]
1736 ஆம் ஆண்டில் டச்சு லங்காவின் ஆளுநராகவிருந்த கஸ்டாஃப் வில்லியம் வான் இம்ஹோஃப், கொழும்பு கோட்டைக்குள் இருந்த பழைய தேவாலயத்தை இடித்துவிட்டு புதிய தேவாலயம் கட்ட டச்சுக் கிழக்கிந்தியக் கம்பனியிடம் அனுமதி கோரினார்.[1] ஆனால் கம்பனி அதற்கு மறுப்புத் தெரிவித்தது. பின்னர் 1743 இல் புதிய ஆளுநராக ஜூலியஸ் வாலண்டைன் ஸ்டெய்ன் வான் கொலினஸ்ஸே பொறுப்பேற்ற பின்னரே இதற்கான தீர்வு எட்டப்பட்டது.
புதிய தேவாலயத்தைக் கோட்டைச் சுவர்களுக்கு வெளியே, அப்போதைய சதுப்பு நிலப் பகுதியில் கட்ட அவர் முடிவெடுத்தார். அக்காலகட்டத்தில் இப்பகுதியில் நரிகள் கூட்டமாகத் திரிந்தன. ஐரோப்பியர்கள் அவற்றை ஓநாய்கள் எனத் தவறாகப் புரிந்துகொண்டதால், இப்பகுதிக்கு 'வொல்வெண்டால்' (ஆதாவது ஓநாய்ப் பள்ளத்தாக்கு) என்ற பெயர் உருவானது.[2][3] நகரத்தையும் துறைமுகத்தையும் தெளிவாகப் பார்க்கக்கூடிய ஒரு சிறிய குன்றின் மீது இந்தத் தேவாலயம் கட்டப்படத் தேர்வு செய்யப்பட்டது.[2]
இத்தேவாலயத்திற்கான அடிக்கல் 1749 இல் நாட்டப்பட்டு, கட்டுமானப் பணிகள் நிறைவடைய எட்டு ஆண்டுகள் எடுத்தன.[4] இறுதியாக 1757 மார்ச் 6 அன்று பொது வழிபாட்டிற்காக இத்தேவாலயம் திறந்து வைக்கப்பட்டது.[2]
கட்டிடக்கலை
[தொகு]
இத்தேவாலயம் கிரேக்கச் சிலுவை (நான்கு பக்கங்களும் சம அளவுள்ள சிலுவை) வடிவில், டோரிக் கட்டடக்கலைப் பாணியில் கட்டப்பட்டுள்ளது. இதன் சுவர்கள் சுமார் 1.5 மீட்டர் (ஐந்து அடி) தடிமன் கொண்டவை. இவை கபோக் எனப்படும் களிமண் இரும்புக்கற்கள், பவளப்பாறைகள் மற்றும் சுண்ணாம்புச் சாந்து ஆகியவற்றைக் கொண்டு வலிமையாகக் கட்டப்பட்டுள்ளன.[3]
கட்டிடத்தின் மையப்பகுதியில் உள்ள உயர்ந்த கூரை ஒரு குவிமாடம் போன்ற அமைப்பைக் கொண்டுள்ளது. இதன் மீது ஒரு கையில் வாளும் மறு கையில் ஏழு அம்புகளும் ஏந்திய, கிரீடம் சூடிய வெண்கலச் சிங்கம் ஒன்று பொருத்தப்பட்டிருந்தது. இது டச்சுக் குடியரசின் ஏழு ஐக்கிய மாகாணங்களைக் குறிப்பதாக அமைந்தது. 1856 இல் ஏற்பட்ட ஒரு கடுமையான மின்னல் தாக்குதலில் இந்தச் சிங்கம் முற்றிலும் அழிந்து, குவிமாடமும் சேதமடைந்தது.[3] பின்னர் அதற்குக் பதிலாக இரும்புக்கூரை அமைக்கப்பட்டது. இந்தத் தேவாலயத்தில் ஒரே நேரத்தில் 1,000 பேர் அமர முடியும்.
தற்போதைய நிலை
[தொகு]
முன்னர் 'டச்சு சீர்திருத்தத் திருச்சபை' என்று அழைக்கப்பட்ட இந்த அமைப்பு, தற்போது இலங்கை கிறித்தவ சீர்திருத்தத் திருச்சபை என்ற பெயரில் இயங்கி வருகிறது. இலங்கையிலுள்ள டச்சு தேவாலயங்களிலேயே, கட்டப்பட்ட நாள் முதல் இன்று வரை தொடர்ந்து வழிபாட்டுப் பயன்பாட்டில் இருக்கும் ஒரே தேவாலயம் வொல்வெண்டால் மட்டுமே ஆகும். இங்கு ஒவ்வொரு ஞாயிற்றுக்கிழமையும் தமிழ், சிங்களம் மற்றும் ஆங்கிலம் ஆகிய மூன்று மொழிகளிலும் வழிபாடுகள் நடத்தப்படுகின்றன.
மேற்கோள்கள்
[தொகு]- ↑ de Bruijn, Max; Raben, Remco (2004). The World of Jan Brandes, 1743–1808. Waanders. p. 234.
- 1 2 3 de Silva, Rajpal Kumar; Beumer, Willemina K.G (1988). Illustrations and Views of Dutch Ceylon 1602–1796. Serendib Publications. p. 255. ISBN 90-04-08979-9.
- 1 2 3 Paranavithana, Dr. K.D. (2011). "Wolvendaal Church – Dutch Reformed Church in Sri Lanka – 360 years of history". Sri Lanka Heritages Foundation. Archived from the original on 3 March 2016. Retrieved 23 June 2014.
- ↑ Van Oers, Ron (2000). Dutch Town Planning Overseas During VOC and WIC Rule. Walberg Pers. p. 107. ISBN 90-57-30104-0.
மேலும் படிக்க
[தொகு]- General Consistory – Dutch Reformed Church in Sri Lanka; Franciscus, S. Douglas (Ed) (1983). Faith of our Fathers: History of the Dutch Reformed Church in Sri Lanka (Ceylon). Pragna Publishers.