பிரதாப் சிங் கியானி
பிரதாப் சிங் கியானி | |
|---|---|
 | |
| பிறப்பு | 1855 லாகூர், பஞ்சாப், பிரித்தானிய இந்தியா |
| இறப்பு | 20 சூலை 1920 |
பிரதாப் சிங் கியானி (Pratap Singh Giani) (அல்லது பார்தாப் சிங் கியானி, 1855–1920) ஒரு சீக்கியக் கல்வியாளர், அறிஞர், அழகிய கையெழுத்துக் கலைஞர் ஆவார்.[1]
வாழ்க்கை
[தொகு]இவர் 1855-இல் இலாகூரைச் சேர்ந்த பாய் பாக் சிங் கியானியின் மகனாகப் பிறந்தார். சிறுவயதிலேயே பார்தாப் சிங் பஞ்சாபி, உருது சமஸ்கிருத மொழிகளைக் கற்றுக்கொண்டதுடன், சீக்கிய மத நூல்களையும் பயின்றார். 1884-இல், பஞ்சாபின் பதவியிறக்கப்பட்ட சீக்கிய ஆட்சியாளரான மகாராஜா துலீப் சிங்கிற்கு குரு கிரந்த் சாகிப் நூலை வாசித்துக் காட்டவும், அவரை மீண்டும் சீக்கிய மதத்திற்கு மாற்றவும், தாக்கூர் சிங் சந்தன்வாலியாவுடன் இங்கிலாந்து சென்றார்.[2] பார்தாப் சிங் ஆறு மாதங்கள் இங்கிலாந்தில் தங்கினார். இந்தியா திரும்பியதும், அமிர்தசரசில் உள்ள குருத்வாரா கௌல்சாரில் 'கிரந்தி'யாக (மத நூல் வாசிப்பவர்) பணியாற்றினார். மகாராஜா துலீப் சிங் இந்தியா திரும்பவிருந்த நிலையில், இவரை வரவேற்க மும்பை செல்லும் நோக்கத்துடன், தாக்கூர் சிங் மற்றும் இவரது மகன்களுடன் பார்தாப் சிங் டெல்லிக்குச் சென்றார். ஏடனில் துலீப் சிங் தடுத்து வைக்கப்பட்ட செய்தியைக் கேட்டதும், தாக்கூர் சிங் பாண்டிச்சேரிக்குச் செல்ல, பார்தாப் சிங் அமிர்தசரசிற்குத் திரும்பினார். அமிர்தசரஸில் இருந்தபடி, துலீப் சிங்கிற்கு ஆதரவான தாக்கூர் சிங்கின் கடிதங்களை இவரது நம்பிக்கைக்குரியவர்கள் மற்றும் நண்பர்களிடையே விநியோகிக்கும் பணியை பார்தாப் சிங் ரகசியமாகச் செய்தார். 1887-ஆம் ஆண்டின் இறுதியில், இவர் அமிர்தசரஸில் கைது செய்யப்பட்டு லாகூர் சிறைக்கு அனுப்பப்பட்டார். சிறையிலிருந்து தப்பிய அவர், ஒரு சாதுவாக மாறி, புனித மனிதர்களின் துணையுடன் நாட்டின் பல்வேறு பகுதிகளுக்குப் பயணம் செய்தார்.
அத்தகைய ஒர் பயணத்தின்போது, சீக்கிய புனித நூலை ஆங்கிலத்தில் மொழிபெயர்க்கும் பணியில் ஈடுபட்டிருந்த மேக்ஸ் ஆர்தர் மெக்காலிஃப் என்பவரை அவர் சந்திக்கும் வாய்ப்பு கிடைத்தது.
இவரது புலமையால் ஈர்க்கப்பட்ட மெக்காலிஃப், தனது மொழிபெயர்ப்புப் பணியில் இவர் தனக்கு உதவ வேண்டும் என்று விரும்பினார். "பாவா ஈஷர் தாஸ்" என்ற புனைபெயரில் தன்னை அறிமுகப்படுத்திக்கொண்டிருந்த பிரதாப் சிங், பின்னர் தனது உண்மையான அடையாளத்தை அவரிடம் வெளிப்படுத்தினார். மெக்காலிஃப் அவருக்காக அரசாங்கத்திடம் பரிந்துரை செய்து, 1889-ஆம் ஆண்டு ஜனவரி மாதத்தில் இவர் மீதான கைது வாரண்டுகளை ரத்து செய்யச் செய்தார்.
பிரதாப் சிங் அமிர்தசரஸில் உள்ள பாபா அடல் பகுதிக்கு அருகிலுள்ள கௌல்சார் என்னுமிடத்தில் ஒர் வீட்டில் குடியேறினார். மேலும் பல ஆண்டுகளாக அகால் புங் முன்பாக அமர்ந்து புனித நூலின் கருத்துகளை விளக்கும் 'கதா' எனும் சமயச் சொற்பொழிவுகளை நிகழ்த்தி வந்தார்.
சிறந்த கையெழுத்துக் கலைஞர் ஒருவரான பிரதாப் சிங், குரு கிரந்த் சாஹிபின் பல பிரதிகளைத் தன் கையால் எழுதினார். அவற்றில் மிகவும் புகழ்பெற்றது ஹரிமந்திர் சாஹிபில் இன்றும் பாதுகாத்து வைக்கப்பட்டுள்ள பிரதியாகும். 1908-இல் நிறைவு செய்யப்பட்ட இந்தப் பிரதி, 25க்கு 28 அங்குல அளவுள்ள பெரிய காஷ்மீரி காகிதத் தாள்களில் தடித்த குர்முகி எழுத்துக்களால் எழுதப்பட்டுள்ளது. இது ஹரிமந்திர் சாஹிபின் முதல் தளத்தில் வைக்கப்பட்டுள்ளது. இங்கு குரு கிரந்த் சாஹிபின் இடைவிடாத பாராயணமான 'அகண்ட் பாத்' நிகழ்வுகளுக்கு இது பயன்படுத்தப்படுகிறது. சிவப்பு, நீலம் மற்றும் மஞ்சள் நிற இரட்டை விளிம்புகளுடன் கூடிய 1527 தாள்கள் (அதாவது 8054 பக்கங்கள்) கொண்ட இந்தப் முழுப் பிரதியும் கியானி பிரதாப் சிங்கின் கைப்பட எழுதப்பட்டது; இது 'வட்டே பாபா ஜி' (பெரிய அளவிலான புனித நூல்) என்று அழைக்கப்படுகிறது. நூலின் இறுதியில், ஒரு தனித் தாளில் அதை எழுதியவரின் பெயர் குறிப்பிடப்பட்டுள்ளது. கியானி பிரதாப் சிங்கால் எழுதப்பட்ட புனித நூல்களின் பிற பிரதிகள் பாபா அடல் மற்றும் நாந்தேடில் உள்ள தக்த் ஸ்ரீ ஹசூர் சாஹிப் ஆகிய இடங்களிலும் பாதுகாக்கப்படுகின்றன.
1902-இல், லாகூரில் உள்ள 'சீஃப்ஸ் காலேஜ்' என்றும் அழைக்கப்படும் 'ஐச்சிசன் கல்லூரியில்' பிரதாப் சிங் 'கிரந்தி'யாகவும் (மதப் பணியாளர்) ஆசிரியராகவும் சேர்ந்தார். கல்லூரிப் பதிவுகளின்படி, இவர் ஆரம்பத்தில் மாதம் 5 ரூபாய் ஊதியத்தில் பணியமர்த்தப்பட்டார்; பின்னர் 1904 முதல் இவரது ஊதியம் மாதம் 50 ரூபாயாக உயர்த்தப்பட்டது. 1920-இல் இவர் இறக்கும் வரை இக்கல்லூரியில் சீக்கிய மத ஆசிரியராகப் பணியாற்றினார்.
மரபு
[தொகு]'பஞ்சாப ஃபைன்' இதழின் ஆகஸ்ட் 1916 பதிப்பின்படி, அவர் 'சனாதன் சிங் சபா'வின் (இது 'அமிர்தசரஸ் சிங் சபா' என்றும் குறிப்பிடப்படுகிறது) முதல் செயலாளராக இருந்தார். 1876-இல் முதன்முதலில் வெளியான சீக்கிய நாளிதழான 'அகால் பிரகாஷ்' -இன் ஆசிரியராகவும் இவர் செயல்பட்டார். மேஜர் இவான்ஸ் பெல் எழுதிய 'தி அனக்ஸேஷன் ஆஃப் தி பஞ்சாப் அண்ட் மகாராஜா துலீப் சிங்' என்ற நூலை இவர் பஞ்சாபி மொழியில் மொழிபெயர்த்ததாகவும் கூறப்படுகிறது. பிரதாப் சிங் 1920 ஜூலை 20 அன்று லாகூரில் காலமானார்.
பிரதாப் சிங்கின் மகன் கர்தார் சிங் கியானி அமிர்தசரஸில் வழக்கறிஞராகப் பணியாற்றினார்; பின்னர் அவர் 'சீக்கிய குருத்வாரா நீதி ஆணையத்தின்' உறுப்பினராகவும் இருந்தார். அவரது பேரன்களான ஹரிந்தர் சிங் கியானி, நரிந்தர் சிங் கியானி ஆகியோர் சண்டிகர், அமிர்தசரஸில் உள்ள பஞ்சாப், ஹரியானா உயர் நீதிமன்றத்தில் வழக்கறிஞர்களாகப் பணியாற்றினர். இவரது கொள்ளுப்பேரன் ஹர்பிரீத் சிங் கியானி ஒரு வழக்கறிஞர், பாரிஸ்டர் ஆவார். இவர் தற்போது இந்தியாவில் உள்ள பஞ்சாப் மற்றும் ஹரியானா உயர் நீதிமன்றத்திலும், இங்கிலாந்து, வேல்ஸிலும் வழக்கறிஞராகப் பணியாற்றி வருகிறார்.
மேற்கோள்கள்
[தொகு]- ↑ The encyclopaedia of Sikhism. Vol. 2. Harbans Singh. Patiala: Punjabi University. 1992–1998. p. 82. ISBN 0-8364-2883-8. OCLC 29703420.
{{cite cite book}}: CS1 maint: others (link) - ↑ "Maharaja Duleep Singh (Son of Maharaja Ranjit Singh ) (1838-1893) – SikhHistory.in" (in அமெரிக்க ஆங்கிலம்). Retrieved 2022-06-07.