தமிழ்நாட்டில் மூன்றாவது முனை அரசியல்
| இக்கட்டுரை தொடரின் ஒரு பகுதியாகும் |
| தமிழ்நாடு அரசியல் |
|---|
 |
தமிழ்நாட்டில் மூன்றாவது முனை அரசியல் என்பது, மாநில அரசியல் வரலாற்றில் பல்வேறு கால கட்டங்களில் ஆதிக்கம் செலுத்திய இரண்டு முக்கிய அரசியல் கட்சிகள் அல்லது கூட்டணிகளுக்கு மாற்றாக உருவாகிய கட்சிகள், கூட்டணிகள் மற்றும் அரசியல் முயற்சிகளை குறிக்கும் ஒரு கருத்தாகும். ஆட்சிக் கட்சி மற்றும் முக்கிய எதிர்க்கட்சிக்கு அப்பாற்பட்ட சக்திகள் தனித்த அரசியல் பாதையை உருவாக்கும் முயற்சிகள் பொதுவாக “மூன்றாவது முனை” என அழைக்கப்படுகின்றன; இத்தகைய முயற்சிகள் 1960கள் முதல் தொடர்ந்து இடம்பெற்று, மாநில அரசியலில் குறிப்பிடத்தக்க தாக்கத்தை ஏற்படுத்தி வருகின்றன.
வரையறை
[தொகு]தமிழ்நாட்டில் “மூன்றாவது முனை” அரசியல் என்பது, ஒரு குறிப்பிட்ட காலகட்டத்தில் ஆதிக்கம் செலுத்தும் இரண்டு முக்கிய அரசியல் அணிகளுக்கு அப்பாற்பட்டு உருவாகும் கட்சிகள் அல்லது கூட்டணிகளை குறிக்கும் ஒரு விளக்கக் கருத்தாகும். இத்தகைய அரசியல் அமைப்புகள், ஆட்சி மற்றும் முக்கிய எதிர்க்கட்சிக்கு மாற்றாகத் தேர்தல் அரசியலில் தங்களை நிலைநிறுத்த முயற்சிப்பதாகப் பொதுவாகக் கருதப்படுகின்றன.
“மூன்றாவது முனை” என்பது நிரந்தரமான ஒரே அமைப்பைக் குறிக்கும் பதமாக இல்லாது, காலகட்டத்திற்கேற்ப மாறுபடும் அரசியல் கூட்டணிகள் அல்லது தனித்தக் கட்சிகளை குறிக்கும் பொதுப்பெயராகப் பயன்படுத்தப்படுகிறது.
இத்தகைய கட்சிகள் மற்றும் கூட்டணிகள், தேர்தல் முடிவுகளில் வாக்கு பங்கீட்டை பாதிப்பதன் மூலம் மாநில அரசியலில் தாக்கத்தை ஏற்படுத்துகின்றன.
வரலாறு
[தொகு]தமிழ்நாட்டின் அரசியல் வரலாறு, விடுதலைக்குப் பிறகு பல்வேறு கட்டங்களாக மாற்றமடைந்துள்ளது. ஆரம்ப காலத்தில் இந்திய தேசிய காங்கிரசு கட்சி மாநில அரசியலில் ஆதிக்கம் செலுத்தியது. ஆனால் 1960களில் திராவிட இயக்கத்தின் எழுச்சி, மொழி மற்றும் சமூக அடையாள அரசியலின் வளர்ச்சி ஆகியவை மாநில அரசியலில் பெரிய மாற்றத்தை ஏற்படுத்தின.
1965ஆம் ஆண்டு நடந்த இந்தித் திணிப்பு எதிர்ப்புப் போராட்டங்கள் மற்றும் அதனைத் தொடர்ந்து உருவான அரசியல் சூழ்நிலைகள், திராவிட முன்னேற்றக் கழக கட்சியின் வளர்ச்சிக்கு முக்கிய காரணமாக அமைந்தன. 1967ஆம் ஆண்டு நடைபெற்ற சட்டமன்றத் தேர்தலில் திமுக, காங்கிரசு கட்சியை தோற்கடித்து ஆட்சியை கைப்பற்றியது; இது தமிழ்நாட்டில் தேசிய கட்சிகளின் ஆதிக்கம் முடிவடைந்து மாநில அரசியல் தொடங்கிய முக்கிய திருப்புமுனையாகக் கருதப்படுகிறது.
1972ஆம் ஆண்டு, திமுகவிலிருந்து பிரிந்த ம. கோ. இராமச்சந்திரன், அனைத்திந்திய அண்ணா திராவிட முன்னேற்றக் கழகத்தினை உருவாக்கினார். அதன் பின்னர், திமுக மற்றும் அஇஅதிமுக ஆகிய இரு கட்சிகளும் தமிழ்நாட்டின் அரசியலில் முக்கிய துருவங்களாக உருவெடுத்து, 1967க்குப் பின்னர் மாநில அரசியலில் இவ்விரு கட்சிகளில் ஒன்றே ஆட்சியை பிடிக்கும் நிலை உருவானது.
1980கள் முதல் 2000கள் வரை, தமிழ்நாட்டின் அரசியல் போட்டி பெரும்பாலும் திமுக மற்றும் அதிமுக ஆகிய இரு கட்சிகளை மையமாகக் கொண்டு நடைபெற்றது. இந்த காலகட்டத்தில் கூட்டணி அரசியல் முக்கிய பங்கு வகித்தது; தேசிய கட்சிகள் மற்றும் பிற மாநில கட்சிகள், இந்த இரு முக்கிய அணிகளுடன் இணைந்து தேர்தலில் பங்கேற்றன.
1990களிலிருந்து, இந்த இரு கட்சிகளின் ஆதிக்கத்திற்கு மாற்றாக பல புதிய கட்சிகள் உருவாகத் தொடங்கின. 1994ஆம் ஆண்டு மறுமலர்ச்சி திராவிட முன்னேற்றக் கழகம் (ம்திமுக), 1996ஆம் ஆண்டு தமிழ் மாநில காங்கிரசு (தமகா) போன்ற கட்சிகள் முக்கிய அரசியல் மாற்றங்களை ஏற்படுத்தின. இக்கட்சிகள், தனித்த அரசியல் அடையாளத்துடன் செயல்பட்டாலும், பெரும்பாலும் கூட்டணி அரசியலின் ஒரு பகுதியாகவே இருந்தன.
2000களுக்குப் பின்னர், நடிகர்கள் மற்றும் புதிய தலைமுறை அரசியல் இயக்கங்கள் மூன்றாவது முனை அரசியல் முயற்சிகளை வலுப்படுத்தின. தேசிய முற்போக்குத் திராவிடக் கழகம் (தேமுதிக), மக்கள் நீதி மய்யம் (மநீம) போன்ற கட்சிகள், திமுக - அதிமுக இரு துருவ அரசியலுக்கு மாற்றாக தங்களை நிலைநிறுத்த முயன்றன. இருப்பினும், இத்தகைய கட்சிகள் பெரும்பாலும் நிலையான தனித்த கட்சிகளாக மாறாமல், தேர்தல் முடிவுகளின் தாக்கத்தை ஏற்படுத்தும் துணை சக்திகளாகவே இருந்து வந்துள்ளன.
2016க்குப் பிறகு, முக்கிய அரசியல் தலைவர்களின் மறைவுடன், தமிழ்நாட்டில் புதிய அரசியல் சூழ்நிலை உருவானது. புதிய கட்சிகள் மற்றும் அரசியல் முயற்சிகள் மீண்டும் உருவாகி, “மூன்றாவது முனை” அரசியல் பற்றிய விவாதங்களை அதிகரித்தன. இருப்பினும், மாநில அரசியலில் இரண்டு முக்கிய அணிகள் மையமாக இருக்கும் போக்கு தொடர்ந்துவருகிறது.
ஆண்டு வாரியான கட்சிகள் பட்டியல்
[தொகு]தமிழ்நாட்டில் “மூன்றாவது முனை” அரசியல் சூழலில் உருவான அல்லது மாற்று அரசியல் முயற்சிகளை மேற்கொண்ட முக்கிய கட்சிகள்:
| ஆண்டு | கூட்டணி | கட்சி(கள்) | கூட்டணி (அ) கட்சித் தலைவர் | முதல் தேர்தல் | வென்ற இடங்கள் | வாக்கு விழுக்காடு | மொத்த வாக்குகள் | துவங்கப்பட்ட காரணம் |
|---|---|---|---|---|---|---|---|---|
| 1949 | - | திராவிட முன்னேற்றக் கழகம் (திமுக) | கா. ந. அண்ணாதுரை | சென்னை மாநிலத்தில் இந்திய நாடாளுமன்றத் தேர்தல், 1957 | 8 / 41 |
- | - | காங்கிரசு கட்சி ஆதிக்கத்திற்கும் அன்றைய சூழலில் நிலவிய சமூக அநீதிகளுக்கு எதிராகவும் உருவானது. சந்தித்த முதல் தேர்தலில் சுயேட்சைகளாக போட்டியிட்டனர். |
| 1972 | - | அனைத்திந்திய அண்ணா திராவிட முன்னேற்றக் கழகம் (அதிமுக) | ம. கோ. இராமச்சந்திரன் | தமிழ்நாடு சட்டமன்றத் தேர்தல், 1977 | 130 / 200 |
30.36% [1] | 5,194,876 | திமுக தலைமையுடன் ஏற்பட்ட மோதலால், அக்கட்சிக்கு எதிராக துவங்கப்பட்டது. பெரும்பாலான நிர்வாகிகள் திமுகவிலிருந்து விலகி இக்கட்சியில் சேர்ந்தனர். போட்டியிட்ட முதல் தேர்தலிலேயே ஆட்சியைப் பிடித்தது. |
| 1989 | - | பாட்டாளி மக்கள் கட்சி (பமக) | ச. இராமதாசு | தமிழ்நாடு சட்டமன்றத் தேர்தல், 1991 | 1 / 194 |
5.89% | 145,982 | வன்னியர் சமூக மக்களின் முன்னேற்றத்திற்காக தொடங்கப்பட்ட வன்னியர் சங்கமானது, பின்னாளில் அரசியல் கட்சியாக மாற்றப்பட்டது. |
| 1994 | - | மறுமலர்ச்சி திராவிட முன்னேற்றக் கழகம் (மதிமுக) | வைகோ | தமிழ்நாடு சட்டமன்றத் தேர்தல், 1996 | 0 / 177 |
5.78% | 1,569,168 | திமுக தலைமையுடன் ஏற்பட்ட கருத்து வேறுபாட்டால் வெளியேற்றப்பட்டு அக்கட்சிக்கு எதிராக துவங்கப்பட்டது. பெரும்பாலான நிர்வாகிகள் திமுகவிலிருந்து விலகி இக்கட்சியில் சேர்ந்ததால் பெரும் எதிர்பார்ப்பு இருந்தது. |
| 1996 | - | தமிழ் மாநில காங்கிரசு (தமாகா) | ஜி. கே. மூப்பனார் | தமிழ்நாடு சட்டமன்றத் தேர்தல், 1996 | 39 / 40 |
9.30% | 2,526,474 | அதிமுக - காங் கூட்டணிக்கு எதிராக காங் கட்சியின் ஒரு பிரிவினர்கள் திரு. மூப்பனார் தலைமையில் இக்கட்சி துவங்கப்பட்டது. பெரும்பாலான நிர்வாகிகள் காங். கட்சியிலிருந்து விலகி இக்கட்சியில் சேர்ந்ததால் பெரும் எதிர்பார்ப்பு இருந்தது. |
| 2005 | தனித்து | தேசிய முற்போக்குத் திராவிடக் கழகம் (தேமுதிக) | விசயகாந்து | தமிழ்நாடு சட்டமன்றத் தேர்தல், 2006 | 1 / 234 |
8.38% | 2,764,223 | திமுக - அதிமுக கட்சிகளின் ஆதிக்கத்திற்கு எதிராக நடிகர் விஜயகாந்த் தனது ரசிகர் நற்பணி மன்றத்தினை கட்சியாக மாற்றினார். பெரும் எதிர்பார்ப்பு இருந்தது. |
| 2010 | தனித்து | நாம் தமிழர் கட்சி (நாதக) | சீமான் | தமிழ்நாடு சட்டமன்றத் தேர்தல், 2016 | 0 / 234 |
1.10% | 458,104 | ஈழப் போரின் போது ஈழம் வாழ் தமிழர்களை காக்கத் தவறைய திமுக-காங் கட்சிகளை எதிர்த்து தமிழ்த் தேசியக் கருத்தியலை முன்னிறுத்தி இயக்குநரும் நடிகருமான சீமானால் 2010இல் துவங்கப்பட்ட இயக்கமானது 2016ஆம் ஆண்டு சட்டமன்றத் தேர்தலையொட்டி கட்சியாக மாற்றப்பட்டு தேர்தலை சந்தித்தது. |
| 2016 | மக்கள் நலக் கூட்டணி (மநகூ)[2] |
|
விசயகாந்து | தமிழ்நாடு சட்டமன்றத் தேர்தல், 2016 | 0 / 234 |
6.1% | 2,621,297 | திமுக, அதிமுக கட்சிகளின் ஆதிக்கம் மற்றும் எதேச்சதிகாரப் போக்கினை எதிர்த்து, மேற்குறிப்பிட்ட கட்சிகளின் கூட்டணியில் இருந்து வெளியேறிய கட்சிகள் மாற்றுக் கூட்டணியை கட்டமைத்து தேர்தலை சந்தித்தனர். |
| 2018 | தனித்து | மக்கள் நீதி மய்யம் (மநீம) | கமல்ஹாசன் | 2019 இந்தியப் பொதுத் தேர்தல் | 0 / 37 |
3.72% | 1,575,620 | திமுக - அதிமுக கட்சிகளின் ஆதிக்கத்திற்கும், ஊழல், கையூட்டிற்கு எதிராகவும் திராவிடம், தமிழ்த் தேசியம், இந்துத்துவம், பொதுவுடைமை, வலதுசாரி, இடதுசாரி என அனைத்துக் கருத்தியல் கோட்பாடுகளையும் உள்ளடக்கிய முரண்பட்ட மையக் கோட்பாடு ஒன்றினை அறிவித்த நடிகர் திரு. கமல்ஹாசன் தனது ரசிகர் நற்பணி மன்றத்தினை கட்சியாக மாற்றினார். பெரும் எதிர்பார்ப்பு இருந்தது. |
| 2018 | தனித்து | அம்மா மக்கள் முன்னேற்றக் கழகம் (அமமுக) | டி. டி. வி. தினகரன் | 2019 இந்தியப் பொதுத் தேர்தல் | 0 / 38 |
5.38% | 2,206,108 | அஇஅதிமுக முன்னாள் தலைவர் ஜெ. ஜெயலலிதா மறைவையொட்டி ஏற்பட்ட உட்கட்சிப் பூசல்களால் பெரும்பாலான நிர்வாகிகள் வெளியேறி 2018இல் இக்கட்சி துவங்கப்பட்டது. மேலும் அதிமுகவை மீட்கும் வரை இந்த பெயரில் செயல்படுவோம் என்றும் தெரிவிக்கப்பட்டது. |
| 2024 | தனித்து | தமிழக வெற்றிக் கழகம் (தவெக) | விஜய் | தமிழ்நாடு சட்டமன்றத் தேர்தல், 2026 | - | - | - | திமுகவின் ஆதிக்கத்தை எதிர்த்து விஜய் மக்கள் இயக்கம் என்ற தனது ரசிக மன்றத்தினை மாற்றி திராவிடம், தமிழ்த் தேசியம் என இரண்டு முரண்பட்ட கோட்பாடுகளை உள்ளடக்கி ஊழல் கையூட்டிற்கு எதிராக இக்கட்சி துவங்கப்பட்டது. பெரும் எதிர்பார்ப்பு இருந்தது. |
அரசியல் முக்கியத்துவம்
[தொகு]தமிழ்நாட்டில் “மூன்றாவது முனை” அரசியல், மாநில அரசியலில் நிலவும் இரு முக்கிய அரசியல் அணிகளுக்கு மாற்றாக வாக்காளர்களுக்கு கூடுதல் தேர்வுகளை வழங்கும் ஒரு முக்கிய அம்சமாகக் கருதப்படுகிறது. இத்தகைய கட்சிகள் மற்றும் கூட்டணிகள், ஆட்சியை நேரடியாக கைப்பற்ற முடியாதபோதிலும், தேர்தல் போட்டியின் அமைப்பை மாற்றுவதிலும், வாக்கு பங்கீட்டை பாதிப்பதிலும் முக்கிய பங்கு வகிக்கின்றன.
குறிப்பாக, மூன்றாவது முனை அரசியல் அமைப்புகள் வாக்கு பிரிப்பாளராக அல்லது ஆட்சியை பிடிக்கும் கட்சியை தீர்மானிப்பவராக செயல்படுகின்றன. சில நேரங்களில், இத்தகைய கட்சிகள் தனித்துப் போட்டியிட்டு முக்கிய கட்சிகளின் வாக்குகளைப் பிரிப்பதன் மூலம் தேர்தல் முடிவுகளில் மறைமுக தாக்கத்தை ஏற்படுத்துகின்றன; மற்ற வேளைகளில், கூட்டணி அரசியலில் இணைந்து ஆட்சியமைப்பில் தீர்மானிப்பான பங்காற்றுகின்றன.
1990களிலிருந்து, தமிழ்நாட்டில் கூட்டணி அரசியல் அதிகரித்ததுடன், சிறிய மற்றும் நடுத்தர கட்சிகளின் முக்கியத்துவமும் உயர்ந்துள்ளது. குறிப்பாக, தேர்தல் முன் மற்றும் தேர்தல் பிந்தைய கூட்டணிகள் உருவாகும் போது, இத்தகைய கட்சிகள் முக்கிய அரசியல் அணிகளின் வெற்றியை தீர்மானிக்கும் வகையில் செயல்பட்டுள்ளன.
மேலும், மூன்றாவது முனை அரசியல், புதிய அரசியல் கருத்துகள், நிர்வாக அணுகுமுறைகள் மற்றும் சமூக பிரதிநிதித்துவத்தை முன்வைக்கும் ஒரு தளமாகவும் விளங்குகிறது. நடிகர்கள் அல்லது சமூக அடிப்படையிலான தலைவர்களின் அரசியல் நுழைவு, இந்த முனையின் ஒரு தனிச்சிறப்பாகக் கருதப்படுகிறது.
இருப்பினும், தமிழ்நாட்டில் நீண்ட காலமாக நிலவி வரும் இரு துருவ அரசியல் அமைப்பு, வலுவான கட்சி அமைப்புகள் மற்றும் தலைமை மையப்படுத்தப்பட்ட அரசியல் காரணங்களால், மூன்றாவது முனை அரசியல் பல நேரங்களில் நிலையான ஆட்சித் மாற்றாக உருவாக முடியாமல் இருந்துள்ளது.
மேலும் பார்க்க
[தொகு]மேற்கோள்கள்
[தொகு]- ↑ 1977 Tamil Nadu Election Results, Election Commission of India பரணிடப்பட்டது 2016-03-04 at the வந்தவழி இயந்திரம் accessed April 19, 2009
- ↑ "People's Welfare Front will be a political alliance on October 5". The Hindu. 3 அக்டோபர் 2015. Retrieved 1 சனவரி 2016.