டிடிஎஸ் நிறுவனம்

டிடிஎஸ் நிறுவனம்

டிடிஎஸ் நிறுவனம் (Digital Theater Systems - DTS Inc) என்பது சுற்று ஒலித் தொழில்நுட்ப வளர்ச்சியில் முக்கிய பங்கு வகிக்கும் ஒரு அமெரிக்க பல்லூடக இசைத் தொழில்நுட்ப நிறுவனம் ஆகும். இது ஸ்டீவன் ஸ்பீல்பெர்க்கின் 'ஜுராசிக் பார்க்' திரைப்படத்தின் மூலம் உலக அளவில் பெரும் கவனம் பெற்றது.

டிடிஎஸ்-ஜுராசிக் பார்க்

1993 ஆம் ஆண்டு வெளியான ஜுராசிக் பார்க் திரைப்படம், நவீன காலத் திரைப்படத் தயாரிப்பில் ஒரு மைல்கல்லாகக் கருதப்படுகிறது. அந்த காலகட்டத்தில் திரைப்படங்களின் காட்சிகள் எண்ணிம முறையில் முன்னேறியிருந்தாலும், ஒலிக் தரம் இன்னும் பழைய முறையிலேயே இருந்தது. இதனை மேம்படுத்தும் நோக்கில், ஸ்டீவன் ஸ்பில்பேர்க் ஒரு புதிய ஒலி அமைப்பைத் தேடினார். அதன் விளைவாக உருவானதே டிஜிட்டல் தியேட்டர் சிஸ்டம்ஸ் எனப்படும் தொழில்நுட்பம் ஆகும். ஜுராசிக் பார்க் திரைப்படமே இந்தத் தொழில்நுட்பத்தைப் பயன்படுத்தி திரையரங்குகளில் வெளியான முதல் திரைப்படம் என்பது குறிப்பிடத்தக்கது. இந்தத் தொழில்நுட்பம் ஒலியை மிகத் தெளிவாகவும், பல திசைகளிலிருந்து கேட்பது போன்ற உணர்வையும் வழங்குகிறது. இதன் மூலம் நேயர்கள் ஒரு குறிப்பிட்ட சூழலில் நேரடியாக இருப்பது போன்ற ஒலியனுபவத்தைப் பெற முடிகிறது.

சிறு ஒலிகள்

டி.டி.எஸ் தொழில்நுட்பம் ஒலியை மிகவும் துல்லியமாகவும், அதிகத் தரத்துடனும் வழங்குகிறது. இது ஒரு தனித்த வட்டில் (CD-ROM) பதிவு செய்யப்பட்டு, திரையரங்குகளில் உள்ள படச்சுருளோடு ஒத்திசைக்கப்பட்டு இயக்கப்பட்டது. இதனால் டைனோசர்களின் கர்ஜனை மற்றும் காட்டில் ஏற்படும் சிறு ஒலிகள் கூட பார்வையாளர்களுக்கு மிகவும் தத்ரூபமாகக் கேட்கும் வசதி உருவானது. ஜுராசிக் பார்க் திரைப்படம் மிகப்பெரிய வெற்றியைப் பெற்றதைத் தொடர்ந்து, உலகெங்கிலும் உள்ள திரையரங்குகள் இந்த ஒலி அமைப்பை நிறுவத் தொடங்கின. இந்தத் தொழில்நுட்பத்தின் வளர்ச்சியில் ஸ்டீவன் ஸ்பீல்பெர்க் ஒரு முதலீட்டாளராகவும் செயல்பட்டார். இன்று நாம் திரையரங்குகளில் அனுபவிக்கும் உயர்தர ஒலிச் சூழலுக்கு இந்தப் படமும், இந்தத் தொழில்நுட்பமுமே அடிப்படைத் தொடக்கமாக அமைந்தன.

திரைப்படத் துறையில் டி.டி.எஸ் தொழில்நுட்பத்தின் வருகைக்குப் பிறகு, ஒலிப் பொறியியல் துறையில் பெரும் மாற்றங்கள் நிகழ்ந்தன. இது திரைப்படக் காட்சிகளுக்கு ஒரு புதிய உயிர் கொடுத்ததுடன், பார்வையாளர்களைக் கதையின் உள்ளே இழுத்துச் செல்லும் அனுபவத்தை வழங்கியது. ஜுராசிக் பார்க் திரைப்படம் வெளியாவதற்கு முன்னதாகவே சுமார் ஆயிரம் திரையரங்குகள் இந்த வசதியை ஏற்படுத்திக் கொண்டன. இது திரைப்பட விநியோகம் மற்றும் ஒலியியல் தொழில்நுட்பம் சார்ந்த ஒரு புரட்சிகரமான இணைப்பாக இன்றும் போற்றப்படுகிறது.

ஆராய்ச்சி

ஆரம்பத்தில் திரைப்படங்களுக்கான பல்வழி ஒலி முறைகளை உருவாக்குவதே இதன் முதன்மை நோக்கமாக இருந்தது, பின்னர் தொலைக்காட்சி, வீட்டு பொழுதுபோக்கு அமைப்புகள், கணினி சாதனங்கள், கைப்பேசி சாதனங்கள் போன்ற பல துறைகளுக்கும் ஒலி தொடர்பான தொழில்நுட்பங்களை வழங்கத் தொடங்கியது. டிடிஎஸ் நிறுவனம் உருவாக்கிய ஒலி முறைகள் தெளிவான உரையாடல், ஆழமான பின்னணி ஒலி, திசை சார்ந்த ஒலி அனுபவம் ஆகியவற்றை வழங்குவதற்காக அறியப்பட்டன. திரைப்பட அரங்குகளில் ஒலி தரத்தை மேம்படுத்தும் நோக்கில் இதன் தொழில்நுட்பங்கள் பயன்படுத்தப்பட்டன. இந்த நிறுவனம் ஒலி குறியீட்டு முறை, ஒலி சுருக்க முறை, ஒலி மீளுருவாக்க முறை போன்ற பல தொழில்நுட்பங்களை ஆராய்ச்சி செய்து உருவாக்கியது. மேலும் கார் உள்பகுதி ஒலி அமைப்புகள் மற்றும் கைப்பேசி சாதனங்களில் ஒலி அனுபவத்தை மேம்படுத்தும் தீர்வுகளையும் வழங்கியது. காலப்போக்கில் இந்த நிறுவனம் எச்.டி-ரேடியோ மற்றும் இதர நவீன எண்ணிம முறை ஒலி நுட்பங்களையும் உள்ளடக்கித் தனது சேவைகளை விரிவுபடுத்தியுள்ளது.

தற்போது இந்த நிறுவனம் எக்ஸ்பெரி (Xperi) எனும் பெரிய குழுமத்தின் ஒரு அங்கமாகச் செயல்பட்டு வருகிறது. உலகெங்கிலும் உள்ள மின்னணு சாதனத் தயாரிப்பாளர்களுடன் இணைந்து, மேம்படுத்தப்பட்ட ஒலித் தரத்தை நுகர்வோருக்கு வழங்குவதை இது முதன்மை நோக்கமாகக் கொண்டுள்ளது. தொடர்ச்சியான ஆராய்ச்சி மற்றும் கண்டுபிடிப்புகள் மூலம், மின்னணுத் திரை ஊடகத் துறையில் ஒலித் தொழில்நுட்பத்தின் தரத்தை உயர்த்துவதில் இந்த நிறுவனம் முக்கியப் பங்காற்றி வருகிறது. இதன் தொழில்நுட்பங்கள் உலகளாவிய தரக்கட்டுப்பாடுகளுக்கு உட்பட்டு மிகத் துல்லியமான முறையில் வடிவமைக்கப்படுகின்றன.