ஜோதி பட்

கட்டற்ற கலைக்களஞ்சியமான விக்கிப்பீடியாவில் இருந்து.
ஜோதி பட்
பிறப்புஜோதிந்திர மன்சங்கர் பட்
12 மார்ச்சு 1934 (1934-03-12) (அகவை 90)
பவநகர், குசராத்து
அரசியல் இயக்கம்பரோடா குழுமம்[1]
வாழ்க்கைத்
துணை		ஜோத்ஸ்னா பட்
விருதுகள்பத்மசிறீ (2019)[2]

ஜோதி பட் (Jyoti Bhatt) என்று அழைக்கப்படும் ஜோதிந்திர மன்சங்கர் பட் (மார்ச் 12, 1934) ஒரு இந்திய கலைஞராவார். ஓவியம் மற்றும் அச்சுத் தயாரிப்பில் நவீனத்துவ பாணியிலும், கிராமப்புற இந்திய கலாச்சாரத்தின் புகைப்பட ஆவணங்களிலும் மிகவும் பிரபலமானவர். இவர் வடோதரா, மகாராஜா சயாஜிராவ் பல்கலைக்கழகத்தின் என். எஸ். பிந்த்ரேவிடம் ஓவியத்தையும், கே. ஜி. சுப்ரமணியனிடமிருந்து நுண்கலையையும் படித்தார். பின்னர் இவர் ராஜஸ்தானில் பனஸ்தாலி வித்யாபீடத்தில் இத்தாலிய பிரெஸ்கோ பாணியையும் சுவர் ஓவியமும் பயின்றார். 1960களின் முற்பகுதியில் இத்தாலியின் நாபொலியிலுள்ள அகாடெமியா டி பெல்லி ஆர்ட்டி பள்ளியிலும், நியூயார்க்கில் உள்ள பிராட் நிறுவனத்திலும் படித்தார். [3] இவருக்கு 2019 இல் பத்மசிறீ விருது வழங்கப்பட்டது. [2]

தொழில்[தொகு]

பட் தனது ஆரம்பகால படைப்புகளில் ஒரு கியூபிச செல்வாக்கிலிருந்து ஒரு இலகுவான மற்றும் வண்ணமயமான பாப் கலைக்கு நகர்ந்தார். இது பெரும்பாலும் பாரம்பரிய இந்திய நாட்டுப்புற வடிவமைப்புகளிலிருந்து அதன் உருவங்களை ஈர்த்தது. இவர், வண்ணங்கள் மற்றும் எண்ணெய் ஓவியங்கள் உட்பட பலவிவற்றில் பணியாற்றினாலும், இவரது அச்சு தயாரித்தல் தான் இறுதியில் இவருக்கு அதிக கவனத்தை ஈர்த்தது. 1966 ஆம் ஆண்டில், நியூயார்க்கில் புரூக்ளினிலுள்ள பிராட் நிறுவனத்தில் இவர் பெற்ற இன்டாக்லியோ செயல்முறை குறித்த முழுமையான அறிவோடு வடோதராவுக்குத் திரும்பினார். இவரது இன்டாக்லியோ மீதான உற்சாகம் ஜெராம் படேல், பூபன் காகர், குலாம்முகம்மது ஷேக் போன்ற பிற கலைஞர்களும் இதே செயல்முறையை எடுக்க காரணமாக அமைந்தது. இவரும், வடோதராவிலுள்ள நுண்கலை பீடத்தில் இவரது தோழர்களும், பின்னர் இந்திய கலையின் " பரோடா பள்ளி" என்று அறியப்பட்டனர். [4]

1960களின் பிற்பகுதியில், குசராத்தி நாட்டுப்புற கலையின் புகைப்படங்களை எடுக்கும் பணி இவரிடம் ஒப்படைக்கப்பட்டது. ஆரம்பத்தில், இந்தப் பணி ஒரு கருத்தரங்கிற்காக செய்யப்பட்டது. ஆனால் இது விரைவில் பாரம்பரிய இந்திய கைவினை மற்றும் வடிவமைப்பு பணிகளை ஆவணப்படுத்தும் கலைஞரின் விருப்பங்களில் ஒன்றாக மாறியது. கிராமப்புற குசராத்தின் காணாமல் போன கலைகள் ஒரு மையமாக மாறியது. ஒரு கிராமம் மற்றும் பழங்குடி வடிவமைப்புகள் பற்றிய இவரது விசாரணைகள் நிச்சயமாக இவரது அச்சுத் தயாரிப்பில் இவர் பயன்படுத்திய அம்சங்களை பாதித்திருந்தாலும், இவர் தனது ஆவணப்பட புகைப்படங்களை ஒரு கலை வடிவமாக கருதுகிறார். இவரது புகைப்படங்கள் அவற்றின் சொந்த தகுதியின் அடிப்படையில் மதிப்பிடப்பட்டுள்ளன. [5]

மகாராஜா சயாஜிராவ் பல்கலைக்கழகத்தின் நுண்கலை பீடத்தில் ஆசிரியராக நீண்ட காலமாக இருந்த இவர், பல்கலைக்கழகத்தின் பரிணாமம், அதன் ஆசிரிய மற்றும் மாணவர்களின் கலை நடவடிக்கைகள் மற்றும் வடோதராவின் கட்டடக்கலை ரீதியாக குறிப்பிடத்தக்க கட்டிடங்களை புகைப்படம் எடுத்துள்ளார். இந்தியக் கலையின் " பரோடா பள்ளி" தொடர்பான மிகச் சிறந்த புகைப்பட ஆவணங்கள் இந்த மிகப்பெரிய படைப்புக் குழுவாகும். [6]

இவரது அச்சுப் பணிகள் கலைஞர்களுடன் அதிகம் தொடர்புடையவை. இவரது செதுக்கல்கள், இன்டாக்லியோக்கள் மற்றும் திரை அச்சிடுகள் இந்திய கலாச்சாரத்திலிருந்து உருவாகும் அடையாளங்களின் தனிப்பட்ட மொழியை மீண்டும் மீண்டும் ஆராய்ந்தன: மயில், கிளி, தாமரை, பகட்டான இந்திய தெய்வங்கள், பெண் தெய்வங்கள், பழங்குடி மற்றும் கிராம வடிவமைப்புகளில் முடிவில்லாத வேறுபாடுகள் ஆகியவை. சமீபத்தில் இவர் மின்னணு தொழில்நுட்பம், முப்பரிமாண ஒளிப்படவியல் ஆகியவற்றில் கவனம் செலுத்துகிறார்.

நியூயார்க்கின் நவீன கலை அருங்காட்சியகம், வாசிங்டன் டி.சியின், சிமித்சோனிய நிறுவனம், இலண்டனின் பிரித்தானிய அருங்காட்சியகம் ,பெங்களூரின், கலை மற்றும் புகைப்பட அருங்காட்சியகம் உட்பட பல சர்வதேச தொகுப்புகளில் இவரது படைப்புகள் உள்ளன. [7]

சொந்த வாழ்க்கை[தொகு]

ஜோதி பட் தனது கல்லூரி ஆண்டுகளில் ஒரு மட்பாண்ட ஓவியரான ஜோத்ஸ்னா பட்டை சந்தித்தார். பின்னர் இவர்கள் திருமணம் செய்து கொண்டனர். இவர்கள் வதோதராவில் வசித்து வந்தனர். [8] இவர்களுக்கு ஜெய் என்ற மகள் இருந்தார். [2] ஜோத்ஸ்னா பட் ஒரு சுட்டாங்கல் ஓவியக் கலைஞராகவும், மட்பாண்ட ஓவியப் பேராசிரியராகவும் இருந்தார். இவர் 2020 இல் இறந்தார். [9]

மேற்கோள்கள்[தொகு]

  1. ↑ "His name is listed as Baroda Group of Artists' fifth annual exhibition of paintings by". Asia Art Archive.
  2. ↑ 2.0 2.1 2.2 "Padma Awards 2019 announced". pib.nic.in. பார்க்கப்பட்ட நாள் 2019-01-27.
  3. ↑ Amrita Gupta Singh, Jyoti Bhatt: Parallels that Meet, Delhi Art Gallery, 2007 ISBN 978-81-904957-0-7
  4. ↑ Nilima Sheikh, Contemporary Art In Baroda, Tulika Publishers, 1997, ISBN 81-85229-04-X
  5. ↑ Amrita Jhaveri, A Guide to 101 Modern and Contemporary Indian Artists, India Book House, 2005 ISBN 81-7508-423-5
  6. ↑ Contemporary Art In Baroda, Tulika Publishers, 1997, ISBN 81-85229-04-X
  7. ↑ Jyoti Bhatt: Parallels that Meet, Delhi Art Gallery, 2007 ISBN 978-81-904957-0-7
  8. ↑ "Jyotsna Bhatt | Gallery Ark" (in அமெரிக்க ஆங்கிலம்). 2019-12-23. பார்க்கப்பட்ட நாள் 2020-07-12.
  9. ↑ "Renowned ceramic artist Jyotsna Bhatt passes away". The Indian Express (in ஆங்கிலம்). 2020-07-11. பார்க்கப்பட்ட நாள் 2020-07-12.

வெளி இணைப்புகள்[தொகு]

"https://ta.wikipedia.org/w/index.php?title=ஜோதி_பட்&oldid=3214289" இலிருந்து மீள்விக்கப்பட்டது