சீயசு

கட்டற்ற கலைக்களஞ்சியமான விக்கிப்பீடியாவில் இருந்து.
(ஜீயஸ் இலிருந்து வழிமாற்றப்பட்டது)
தாவிச் செல்லவும்: வழிசெலுத்தல், தேடல்
சியுசு
Jupiter Smyrna Louvre Ma13.jpg
இடம் ஒலிம்பசு மலைச்சிகரம்
துணை எரா மற்றும் பலர்
பெற்றோர்கள் குரோனசு மற்றும் ரியா
சகோதரன்/சகோதரி எசுடியா, ஏடிசு, ஈரா, பொசைடன், டிமடர்
குழந்தைகள் ஏசசு, ஏரெசு, ஏதெனா, அப்போலோ, ஆர்டமீசு, அஃப்ரோடிட், டார்டானசு, டயோனைசசு, எய்லெய்தையா, என்யோ, எரிசு, எபே, எர்மிசு, எராகில்சு, டிராயின் எலன், எஃபீசுடசு, பெர்சியுசு, மினாசு, மூசுகள், ஓரேக்கள், மொய்ரய்கள், கிரேசுகள்

சீயசு பண்டைக் கிரேக்கம்Ζεύς என்பவர் கிரேக்க புராணக் கதைகளில் வரும் வானம் மற்றும் இடியின் கடவுள் ஆவார். இவர் ரோம புராணக் கதைகளில் வரும் யூபிடருக்கு சமமானவர். ஒலிம்பிய மலையில் இருக்கும் சீயசு அனைத்து கடவுள்களுக்கும் அரசர் ஆவார். இவர் குரோனசு மற்றும் ரியா என்னும் டைடன்களின் கடைசி மகன் ஆவார். இவருக்கு பல மனைவிகள் இருந்தாலும் அவர்களுள் ஈரா முக்கியமானவராக கருதப்படுகிறார். மேலும் சீயுசு பல பெண்கள் மேல் மோகம் கொண்டார். அவர்கள் மூலம் சீயுசிற்குப் புகழ்பெற்ற பல கடவுள்கள் மற்றும் வீரர்கள் பிறந்தனர்.

பிறப்பு[தொகு]

தன் பிள்ளைகளால் தனக்கு அழிவு வரும் என்பதை குரோனசு தன் பெற்றோரான யுரேனசு மற்றும் கயாவின் மூலம் அறிந்து கொண்டார். அதனால் தனக்குப் பிறந்த எரா, எசுடியா, டிமடர், பொசைடன் மற்றும் ஏட்சு ஆகிய ஐந்து குழந்தைகளையும் விழுங்கி விட்டார். ஆறாவது குழந்தையான சீயசை ரியா காப்பாற்ற நினைத்தார் அதனால் ஒரு கல்லில் துணியைச் சுற்றி குழந்தை என்று கூறி குரோனசை ஏமாற்றிவிடுகிறார். பிறகு க்ரீட் தீவில் உள்ள இடா மலைச்சிகரத்தின் குகையில் சீயசை மறைத்து வைத்தார் ரியா. அதன் பிறகு கயா அவரை வளர்த்ததாக சொல்லப்படுகிறது.

கடவுள்களின் அரசன்[தொகு]

சீயசின் தேர்.

சீயசு ஆடவனாக வளர்ந்ததும் தன் தந்தை குரோனசின் வயிற்றை கிழித்து தன் சகோதரர்களை விடுவித்தார். சில கதைகளில் ஓசனசின் மகள் மெட்டிசு குரோனசிற்கு மருந்து கலந்த பானத்தை கொடுத்ததாகவும் அதனால் அவர் வாந்தி எடுத்ததன் மூலம் சீயசின் சகோதரர்கள் விடுபட்டதாகவும் கூறப்படுகிறது. பிறகு சீயசு பாதாள உலகமான டார்டரசுக்குச் சென்றார். அங்கு காவலன் கேம்பேயை கொன்று, குரோனசின் சகோதரர்களான கைகான்ட்சுகள், எகாடோஞ்சிர்கள் மற்றும் சைக்ளோப்சுகள் ஆகியவர்களை விடுவித்தார்.

இதற்கு பரிசாக சைக்ளோப்சுகள் இடி ஆயுதத்தை சீயசிற்கு வழங்கினர். பிறகு சீயசு தன் சகோதரர்கள் மற்றும் குரோனசின் சகோதரர்களுடன் சேர்ந்து குரோனசையும் மற்ற டைட்டன்களையும் வீழ்த்தினான். இவர்களிடையே நடந்த போர் டைடனோமாச்சி என அழைக்கப்படுகிறது. தோற்ற டைட்டன்கள் அனைவரும் டார்டரசுக்குச் சென்றுவிட்டனர். அட்லசு என்ற டைட்டனுக்கு மட்டும் வானத்தை தாங்கும் தண்டனை கொடுக்கப்பட்டது.

போருக்குப் பிறகு சீயசு தன் சகோதரர்களுடன் உலகை பகிர்ந்து கொண்டார். அதன்படி வானம் சீயசுக்கும், கடல் பொசைடனுக்கும் பாதாளம் ஏட்சுக்கும் கிடைத்தது.

பிறகு கயாவின் அரக்கப் பிள்ளைகளான டைஃபோன் மற்றும் எச்சிட்னாவுடன் சீயசு போரிட்டார். டைஃபோனை வெற்றி கொண்ட பிறகு அவரை ஏட்னா மலைச்சிகரத்தின் கீழ் அடைத்து வைத்தார். ஆனால் எசிட்னா மற்றும் அவர் பிள்ளைகளை சீயசு உயிருடன் விட்டுவிட்டார்.

சீயசு மற்றும் ஈரா[தொகு]

ஈரா என்பவள் சீயசின் சகோதரியும் மனைவியும் ஆவாள். ஈராவின் மூலம் ஏரெசு, எபே மற்றும் எஃபீசுடசுக்கு சீயசு தந்தையானார். சீயசு மோகத்தால் பல பெண்களுடன் உறவாடினார். அவர்கள் மற்றும் அவர்களின் குழந்தைகள் மீது ஈரா பொறாமை கொண்டதாக பல புராணக் கதைகள் உள்ளன.

சீயசை ஈராவிடம் இருந்து பிரிக்க நினைத்த சிறு கடவுள் எக்கோ அவரை செல்லவிடாமல் பேசிக்கொண்டே இருக்கிறார். இதை அறிந்து கோபப்படும் ஈரா, மற்றவர்களின் சொற்களை எக்கோ எதிரொலிக்குமாறு சாபம் வழங்கினார்.

சீயசின் காம விளையாட்டுக்கள்[தொகு]

டைட்டன்களான கோயசு மற்றும் ஃபோபே ஆகியோரின் மகள் லெடோ. அவள் அழகில் மயங்கிய சீயசு அவளுடன் உறவாடினான். லெடோ மூலம் அப்போலோ மற்றும் ஆர்டமீசு ஆகிய இரட்டை குழந்தைகளின் தந்தையானார் சீயசு. இவர்கள் பிற்காலத்தில் சூரிய மற்றும் சந்திர கடவுள்களாயினர்.

அரசன் தெசிதியுசின் மகள் லெடா. அவள் மீது காமம் கொண்ட சீயசு அன்னம் உருவில் வந்து அவளுடன் உறவாடினார். லெடா மூலம் எலன், கிளைடெம்னெசுட்ரா, கேசுடர், போலக்சு ஆகிய குழந்தைகளின் தந்தையானார் சீயசு. பிற்காலத்தில் சீயசு காசுடர் மற்றும் போலக்சு ஆகிய இருவரையும் வானத்தில் மிதுனம் என்னும் விண்மீன் கூட்டமாக அமர்த்தினார்.

சீயசு(அன்னம்) மற்றும் லெடா

அரசன் ஆக்ரீசியசின் மகள் தானே. அவள் மீது காமம் கொண்டார் சீயசு. அவள் சிறையில் இருந்ததால் அவள் மீது தங்க மழையாக பொழிந்து சீயசு உறவாடினார். அதன் மூலம் தானேவிற்கு மாவீரன் பெர்சியுசு பிறந்தான். இவன் பிற்காலத்தில் கார்கோன் சகோதரிகளுள் ஒருவரான மெடுசாவின் தலையைக் கொய்தான்.

எலக்ட்ரியோனின் மகள் அல்கிமி மேல் காமம் கொண்ட சீயசு அவள் கணவனான அம்ஃபிட்ரியோனின் உருவத்தில் வந்து அவளுடன் உறவாடினார். அதன் மூலம் மாவீரன் எராகில்சு பிறந்தான். இவன் பின்னாளில் பல சாகசங்கள் புரிந்தான்.

லைகாவோனின் மகள் காலிசுடோ. அவள் மீது காமம் கொண்ட சீயசு ஈராவின் பார்வையில் இருந்து தப்பிப்பதற்காக சந்திர கடவுள் ஆர்டமீசின் உருவில் வந்து காலிசுடோவுடன் உறவாடினார். அதன் மூலம் ஆர்கசு என்பவன் பிறந்தான். பிறகு உண்மையறிந்த ஈரா காலிசுடோவை கரடியாக மாறும்படி சாபமிடுகிறார். இறுதியாக சீயசு காலிசுடோ மற்றும் ஆர்கசை வானத்தில் விண்மீன் கூட்டமாக வைக்கிறார்.

ஏக்னோர் என்னும் அரசனின் மகள் யூரோப்பா. அவள் மீது காமம் கொண்ட சீயசு வெள்ளைக் காளையாக மாறி அவளை தூக்கிக் கொண்டு கிரீட் தீவிற்கு சென்றார். பிறகு தன் சுயரூபத்திற்கு மாறி யூரோப்பாவுடன் உறவாடினார். அதன் மூலம் மினோசு, ரடமந்தைசு மற்றும் சர்பெடான் ஆகியோர் பிறந்தனர். இவர்கள் மூவரும் பிற்காலத்தில் இறப்பின் நீதிபதிகளாயினர்.

டிரோசு மற்றும் கெல்லிர்வோயேவின் மகன் கானிமிடெ. அவன்மீது காமம் கொண்ட சீயசு கழுகு உருவம் கொண்டு அவனை ஒலிம்பிய மலைக்கு கடத்திச் சென்று உறவாடினார். பிறகு அவனுக்கு சாகா வரம் மற்றும் என்றும் இளமையாக இருக்கும் வரத்தை சீயசு அருளினார். பிறகு அவனை வானத்தில் கும்பம் என்னும் விண்மீன் கூட்டமாக அமர்த்தினார்.

சீயசு மற்றும் பிற கடவுள்கள் ஒற்றுமை[தொகு]

சீயசு ரோமக் கடவுளான யூபிடர், எகிப்திய கடவுள் அம்மோன், இந்துக் கடவுள் தேவேந்திரன் ஆகியோருடன் ஒப்பிடப்படுகிறார். மேலும் கிறித்தவ புனித நூலான பைபிளில் வரும் பார்னபாசு என்பவர் சீயசுடன் ஒப்பிடப்படுகிறார்.

"https://ta.wikipedia.org/w/index.php?title=சீயசு&oldid=2180401" இருந்து மீள்விக்கப்பட்டது