ச. வே. சுப்பிரமணியன்

ச. வே. சுப்பிரமணியன்
2-ஆவது இயக்குநர், உலகத் தமிழாராய்ச்சி நிறுவனம்
பதவியில் 1972 - 1985
முன்னையவர்	கா. மீனாட்சிசுந்தரம்
பின்னவர்	ஏ. என். பெருமாள்
தனிப்பட்ட விவரங்கள்
பிறப்பு	(1929-12-31)31 திசம்பர் 1929 வீரகேரளம்புதூர், பழைய திருநெல்வேலி மாவட்டம், மதராசு தலைமாகாணம், பிரித்தானிய இந்தியா (தற்போது தென்காசி மாவட்டம், தமிழ்நாடு, இந்தியா)
இறப்பு	12 சனவரி 2017(2017-01-12) (அகவை 87) திருநெல்வேலி, தமிழ்நாடு, இந்தியா
இளைப்பாறுமிடம்	தமிழூர்
பெற்றோர்	இராமலக்குமி (தாய்) சு. சண்முகவேலாயுதம் (தந்தை)
முன்னாள் மாணவர்	அண்ணாமலைப் பல்கலைக்கழகம் (இளங்கலை) கேரளா பல்கலைக்கழகம் (முனைவர்)
பணி	பேராசிரியர், எழுத்தாளர், தமிழறிஞர்

ச. வே. சுப்பிரமணியன் (S. V. Subramanian, திசம்பர் 31, 1929 - சனவரி 12, 2017), தமிழக எழுத்தாளரும் தமிழறிஞரும் ஆவார். திருவனந்தபுரம் பல்கலைக்கழகக் கல்லூரியில் விரிவுரையாளராகவும், துறைத்தலைவராகவும் பணியாற்றியுள்ளார். சென்னை, உலகத் தமிழாராய்ச்சி நிறுவனத்தில் இயக்குநராகவும் பணியாற்றியுள்ளார். இவர் எழுதிய தமிழ் நிகண்டுகள் எனும் நூல் தமிழ் வளர்ச்சித் துறையின் 2008 ஆம் ஆண்டிற்கான சிறந்த நூல்களில் அகராதி, கலைக்களஞ்சியம், கலைச் சொல்லாக்கம், ஆட்சித் தமிழ் வகைப்பாட்டில் பரிசு பெற்றிருக்கிறது.

இளமைப் பருவம்

இவர் திருநெல்வேலி மாவட்டம் வீரகேரளம்புதூரில் இராமலக்குமி - சு. சண்முகவேலாயுதம் ஆகியோருக்குப் பிறந்தவர். விக்கிரமசிங்கபுரத்தில் உள்ள புனித இருதய மேல்நிலைத் தொடக்கப் பள்ளியிலும், அம்பாசமுத்திரம் தீர்த்தபதி உயர்நிலைப் பள்ளியிலும் கல்வி பயின்றார். இடைநிலைக் கல்வியை ம.தி.தா. இந்துக் கல்லூரியில் பயின்று, 1950-53 இல் அண்ணாமலைப் பல்கலைக்கழகத்தில் பயின்று இளங்கலை (சிறப்பு) பட்டம் பெற்றார். முனைவர் பட்டத்தைக் கேரளப் பல்கலைக்கழகத்தில் ஆய்வு செய்து பெற்றார்.

பணி

1953-56 காலப்பகுதியில் தூத்துக்குடி வ.உ.சி.கல்லூரியில் 1953-56 தமிழ் பயிற்றுநராகப் பணியைத் தொடங்கி, பின்னர் பாளையங்கோட்டை தூய சவேரியார் கல்லூரியிலும், திருவனந்தபுரம் பல்கலைக்கழகக் கல்லூரியிலும் விரிவுரையாளராகப் பணியாற்றினார். பின்னர் கேரளப் பல்கலைக்கழகத்தின் தமிழ்த் துறைத்தலைவராகப் பணியாற்றினார்.

சென்னை உலகத் தமிழாராய்ச்சி நிறுவனத்தில் இயக்குநராகப் பணிபுரிந்து அரிய ஆய்வு நூல்களை வெளியிட்டுள்ளார். இவர் இதுவரை தமிழில் 54, ஆங்கிலத்தில் 5, மலையாளத்தில் ஒன்று என 60 நூல்களை எழுதியுள்ளார். பல கருத்தரங்குகளிலும் உரையாற்றியுள்ளார். உலக நாடுகள் பலவற்றிற்கும் சென்று ஆய்வுகள் மேற்கொண்டார்.

நெல்லை மாவட்டம், பாபநாசத்தில் 1969 இல் திருவள்ளுவர் கல்லூரியை உருவாக்கினார்.

நூல்கள்

ஆண்டு	தலைப்பு	வகை	பதிப்பகம்
1964	இலக்கிய நினைவுகள்
1966	சிலப்பதிகாரம் வஞ்சிக்காண்டம் (மலையாளம்)	மொழிபெயர்ப்பு
1967	இலக்கணத்தொகை எழுத்து
1969	காந்தி கண்ட மனிதன்
1970	இலக்கணத்தொகை சொல்
1972	இலக்கியக் கனவுகள்
	சிலம்பின் சில பரல்கள்
	Grammar of Akananuru
1973	Studies in Tamil Language and Literature
1974	மாந்தர் சிறப்பு
	மொழிக்கட்டுரைகள்
1975	தமிழில் விடுகதைகள்
	Descriptive Grammar of Chilappathikaram
1976	அடியார்க்கு நல்லார் உரைத்திறன்
	ஒன்று நன்று
1977	சிலம்பும் சிந்தாமணியும்
	வீரசோழியம் குறிப்புரையுடன்
1978	இலக்கணத்தொகை யாப்பு,பாட்டியல்
	இலக்கிய உணர்வுகள்
	கம்பன் கற்பனை
	தொன்னூல் விளக்கம் குறிப்புரையுடன்
1979	காப்பியப் புனைதிறன்
	குவலயானந்தம் சந்திரலோகம்
1980	கூவநூல்
	பிரபந்த தீபம்
1981	கம்பனும் உலகியல் அறிவும்
1982	கம்பன் இலக்கிய உத்திகள்
	பாரதியார் வாழ்க்கைக் கொள்கைகள்
	Studies in Tamilology
1984	இலக்கிய வகையும் வடிவும்
	இளங்கோவின் இலக்கிய உத்திகள்
	திராவிட மொழி இலக்கியங்கள்
1986	இளங்கோவும் கம்பனும்
1992	தொல்காப்பியப் பதிப்புகள்
	நல்வாழ்க்கை
1993	சிலப்பதிகாரம் மங்கலவாழ்த்துப் பாடல்
	தமிழர் வாழ்வில் தாவரம்
1995	மனிதம்
1996	மனமும் உயிரும்
1998	சிலப்பதிகாரம் தெளிவுரை
	தொல்காப்பியம் திருக்குறள் சிலப்பதிகாரம்
	தொல்காப்பியம் தெளிவுரை
1999	தமிழ் இலக்கிய வரலாறு
2001	சிலப்பதிகாரம் அரங்கேற்று காதை
	சிலப்பதிகாரம் இசைப்பாடல்கள்
	சிலப்பதிகாரம் மூலம்
	திருக்குறள் நயவுரை
2002	கானல்வரி உரை
	சிலப்பதிகாரம் குன்றக்குரவை உரை
	திருமுருகாற்றுப்படை தெளிவுரை
	பத்துப்பாட்டு உரை
2003	தமிழில் விடுகதைக் களஞ்சியம்
2004	உடல் உள்ளம் உயிர்
	கம்பன் கவித்திறன்
	Tolkappiyam in English
2006	சங்க இலக்கியம்
	மெய்யப்பன் தமிழகராதி
2007	தமிழ் இலக்கண நூல்கள்
	பதினெண் கீழ்க்கணக்கு நூல்கள்
	பன்னிரு திருமுறைகள்

விருதுகள்

இராசா சர் முத்தையா செட்டியார் நினைவுப் பரிசில் உள்ளிட்ட பல பரிசில்களைப் பெற்றுள்ளார். தொல்காப்பியச் செம்மல், கம்பன் விருது, கி. ஆ. பெ. விசுவநாதம் விருது உள்ளிட்ட விருதுகளும் பெற்றுள்ளார்.

மறைவு

4 சனவரி 2017 அன்று சாலையில் நடந்து சென்றபோது வண்டி மோதியதில் காயமடைந்த சுப்பிரமணியன், திருநெல்வேலி மாநகரிலுள்ள ஒரு தனியார் மருத்துவமனையில் சேர்க்கப்பட்டார். எனினும் மருத்துவம் பலனின்றி 12 சனவரி அன்று காலை இசீநே 6:00 மணியளவில் காலமானார். அவர் உடல், தமிழூரில் பொதுமக்கள் வணக்கத்துக்காக வைக்கப்பட்டது. தமிழறிஞர்கள், ஆய்வு மாணவர்கள், தமிழ்ச் சங்கத்தினர் உள்ளிட்டோரும் மரியாதை செலுத்தினர். மறுநாள் இறுதிச் சடங்குகளுக்குப்பின் அவருக்குச் சொந்தமான தோட்டத்திலேயே அவர் உடல் அடக்கம் செய்யப்பட்டது.

வாழ்க்கை வரலாறுகள்

இவரது வாழ்க்கை வரலாறு "தமிழ் ஞாயிறு" என்னும் பெயரிலும், "சாதனைச்செம்மல்.ச.வே.சு" என்னும் பெயரிலும் நூலாக வெளிவந்துள்ளது.

சான்றுகள்

• இலக்கிய இணையம் - பேராசிரியர் மு. சாயபு மரைக்காயர் இஸ்லாமியத் தமிழ் இலக்கியக்கழகம் 2011

வெளி இணைப்புகள்

• தமிழுக்காக உழைத்தவர்... தமிழுக்காகவே வாழ்ந்தவர்... தமிழ் அறிஞர் ச.வே.சு நினைவு பகிர்வு !