சோலை வேங்கை

இருவித்திலைத் தாவரத் தொகுதியைச் சேர்ந்த சோலை வேங்கை யுஃபோர்பியேசிக் குடும்பத்தைச் சார்ந்தது. இப்பெரிய தாவரக் குடும்பத்தில் ஏறத்தாழ 300 பேரினங்களும் 7,500 சிற்றினங்களும் உள்ளன. சோலை வேங்கையைத் தொண்டி மலைப்பூவரசு என்றும் குறிப்பிடுவர்.

வாழ்விடம்: சோலை வேங்கை மேற்குத் தொடர்ச்சி மலை, தக்காணப்பீடபூமி,ஆந்திரம், கர்நாடகம், கேரளம் ஆகிய பகுதிகளில் 1500மீ. உயரம் வரை உள்ள மலைச்சாரல்களிலும் பள்ளத்தாக்குகளிலும் காணப்படும்.

இலைகள்: மாற்று இலையடுக்கம், அகங்கை வடிவ முக்கூட்டு இலை, இலைவிளிம்பு அரை வட்ட வடிவான வளைவுகள் உடையது. நீள் முட்டை வடிவானது; 10-15 செ.மீ. நீளம் பெற்றது.

மஞ்சரி: கிளைத்த நுனிவளர் மஞ்சரி இலை கோணத்தில் காணப்படும்.

மலர்கள்: ஒருபால் மலர்கள். ஈரில்லம் உடையவை. ஆண்பூக்கள் ஒரு தனித் தாவரத்திலும் பெண்பூக்கள் வேறொரு தனித் தாவரத்திலும் இருக்கும்.

கனி: உருண்டையானது; சதைப்பற்றுள்ளது. 3 அல்லது 4 அறைகளும் இரு தடுப்புகள் கொண்ட கனி உட்தோலும் உண்டு.

விதைகள்: நீள் சதுர முக்கோணமானவை. விதைத்தோல் ஓடு போன்றது. முளைசூழ்தசை பற்றுடையது. வித்திலை தட்டையானது. முட்டை வடிவானது.

பயன்கள்: விட்டங்கள், சட்டங்கள், பலகைகள் செய்ய மிகுதியாகப் பயன்படுகின்றது. இலைகளில் வைட்டமின் மிகுந்துள்ளமையால் மருத்துவப் பயன் உண்டு.