கோனேரியப்பன் ஐயங்கார்
கோனேரியப்பன் ஐயங்கார் | |
|---|---|
| பிறப்பு | கி.பி. 17-ஆம் நூற்றாண்டு தமிழ்நாடு, இந்தியா |
| இறப்பு | கி.பி. 17-ஆம் நூற்றாண்டு ஸ்ரீரங்கம், திருச்சிராப்பள்ளி மாவட்டம் |
| தேசியம் | இந்தியர் |
| பணி | பக்திப் புலவர், சமய எழுத்தாளர் |
| அறியப்படுவது | சீரங்கநாயகியார் ஊசல் திருநாமம் |
கோனேரியப்பன் ஐயங்கார் கி.பி. 17-ஆம் நூற்றாண்டில் வாழ்ந்த ஒரு வைணவப் பக்திப் புலவர் ஆவார். வைணவ சமயத்தின் புகழ்பெற்ற 'அஷ்ட பிரபந்தத்' தொகுப்பைப் பாடிய தத்துவக் கவிஞரான பிள்ளைப்பெருமாள் ஐயங்காரின் திருப்பேரன் ஆவார். திருவரங்கம் பெரிய கோயிலின் தாயாரான சீரங்கநாச்சியாரைப் போற்றி இவர் இயற்றிய சீரங்கநாயகியார் ஊசல் திருநாமம் என்னும் சிற்றிலக்கிய நூல் மூலம் இவர் அறியப்படுகிறார்.
வாழ்க்கை வரலாறு
[தொகு]கோனேரியப்பன் ஐயங்கார் வைணவ அந்தணர் மரபில் பிறந்து திருவரங்கத்தில் வாழ்ந்து வந்தார். இவருடைய பாட்டனார் பிள்ளைப்பெருமாள் ஐயங்கார் அரங்கநாதப் பெருமானுக்குப் பாடிய ஊசல் பாட்டின் நயத்தையும், அதன் தெய்வீக அதிசயத்தையும் கண்டு வியந்து, தானும் அதுபோன்றதொரு பக்திப் பனுவலைத் தாயாருக்குச் சாத்த வேண்டும் என்ற ஆசையினால் இவரால் இந்நூல் இயற்றப்பட்டது.
இவர் புகழ்பெற்ற வைணவ ஆச்சாரியரான கூரத்தாழ்வானின் இளைய குமாரரான வேத வியாச பட்டர் சீராமப் பிள்ளை என்பவரைத் தன் ஆசாரியனாக ஏற்று, அவரது பாதங்களை வணங்கித் தன் கவிப் பணியைச் செய்துள்ளார்.
இலக்கியப் பங்களிப்பு
[தொகு]தன் பாட்டனார் பிள்ளைப்பெருமாள் ஐயங்கார் திருவரங்கநாதருக்கு 32 பாடல்களில் 'சீரங்கநாயகர் ஊசல் திருநாமம்' பாடியதற்கு இணையாக, கோனேரியப்பன் ஐயங்கார் சீரங்கநாயகி தாயாரை முதன்மைப் படுத்தித் தனித்து ஒரு நூலைப் பாடினார்.
நூலின் இறுதியில் உள்ள தற்சிறப்புப் பாயிரப் பாடலில் இவர் தன் பின்னணியை இவ்வாறு குறிப்பிடுகிறார்:
"தார்அங்கத் திருவரங்கர்க்கு ஊசல் பாடிச் சாத்தினான் பேரனெனும் தன்மை யாலும் ஆருங்கண்டே தெளியும் அவன் சொல் பாட்டின் அதிசயத்தை அறிவன்என்னும் ஆசை யாலும் பாரெங்கும் புகழ்வேத வியாச பட்டர் பதம்பணி கோனேரியப்பன் புன்சொல் லாகச் சீரங்க நாயகியார்க்கு ஒருபத் தைந்து திருஊசல் திருநாமம் செப்பி னானே!"
கவிதைச் சிறப்பு
[தொகு]தன் பாட்டனாரைப் போலவே எளிய மற்றும் இனிமையான சந்த நயத்துடன் கூடிய தமிழ் சொற்களைக் கையாளுவதில் வல்லவராக விளங்கினார். சீரங்கநாயகி தாயார் ஊஞ்சலில் ஆடும்போது அவளது வளையல்கள், சிலம்புகள், மேகலைகள் மற்றும் வேதங்கள் யாவும் ஒலியெழுப்பி ஆர்ப்பரிக்கும் காட்சியை இவர் பாடியுள்ள விதம் பக்தி இலக்கியங்களில் சிறப்பான ஒன்றாகக் கருதப்படுகிறது.