கு. பத்மநாபன்
கு. பத்மநாபன் K. Pathmanaban | |
|---|---|
 மலேசிய சுகாதார துணை அமைச்சர் | |
| பதவியில் 1981–1990 | |
| முன்னையவர் | சுலைமான் டாவூட் |
| பின்னவர் | முகமது பரித் அரிபின் |
| மலேசிய மனிதவள துணை அமைச்சர் | |
| பதவியில் 1974–1981 | |
| முன்னையவர் | அப்துல்லா மஜீத் |
| பின்னவர் | சக்காரியா அப்துல் ரகுமான் |
 தெலுக் கெமாங் மக்களவைத் தொகுதி | |
| பதவியில் 1974–1990 | |
| முன்னையவர் | புதிய தொகுதி |
| பின்னவர் | மாரிமுத்து தங்கவேலு  பாரிசான்;  மஇகா |
| தனிப்பட்ட விவரங்கள் | |
| பிறப்பு | 10 ஜூன் 1937 புக்கிட் பெர்த்தாம் தோட்டம், லிங்கி, நெகிரி செம்பிலான் |
| இறப்பு | 9 சூன் 2001 (வயது 64) பந்தாய் மருத்துவ மையம், கோலாலம்பூர் |
| குடியுரிமை | மலேசியர் |
| தேசியம் |  மலேசியா |
| அரசியல் கட்சி | மஇகா |
| துணைவர் | டத்தின் பிரேமா |
| பிள்ளைகள் | பிரவீன்; பிரசாந்த்; பிரமோகன் |
| கல்வி | ஆர்வர்டு பல்கலைக்கழகம், (முதுகலை வணிக மேலாண்மை) (1970). |
| பணி | அரசியல்வாதி |
கு. பத்மநாபன் அல்லது பத்மநாபன் குஞ்சம்பு (ஆங்கிலம்: K. Pathmanaban அல்லது Pathmanaban Kunjamboo; மலாய்: K. Pathmanaban; சீனம்: 路径班) (10 சூன் 1937 – 9 சூன் 2001) (வயது 64) என்பவர் ஒரு மலேசிய அரசியல்வாதி; 1981 முதல் 1990 வரை மலேசிய சுகாதார துணை அமைச்சர்;[1] 1974 முதல் 1981 வரை மலேசிய தொழிலாளர் துறை துணை அமைச்சர்; 1974 முதல் 1990 வரை தெலுக் கெமாங் மக்களவைத் தொகுதியின் நாடாளுமன்ற உறுப்பினராகப் பணியாற்றினார்.
இவர் மலேசிய இந்தியர் காங்கிரசு கட்சியின் உதவித் தலைவரும், மலாக்கா மணிப்பால் மருத்துவக் கல்லூரியின் (MILA University) நிறுவனரும் ஆவார்.[2] மலேசிய இந்தியர்களுக்கான இவரின் சேவைகளையும் பங்களிப்புகளையும் நினைவுகூரும் வகையில் நெகிரி செம்பிலான், ரொம்பின் நகரில் உள்ள ஒரு தமிழ்ப்பள்ளிக்கு டத்தோ கு. பத்மநாபன் தேசிய வகை தமிழ்ப்பள்ளி என பெயர் சூட்டப்பட்டு உள்ளது.[3]
வாழ்க்கை
[தொகு]நெகிரி செம்பிலான், லிங்கி வட்டாரத்தின் புக்கிட் பெர்த்தாம் தோட்டத்தில் பிறந்த பத்மநாபன்; மிகச் சாதாரண, பின்தங்கிய குடும்பச் சூழலில் வளர்ந்தவர். அவரின் தந்தையார் குஞ்சம்பு, தொடக்கக் கல்விக்காக பத்மநாபனைத் தமிழ்ப்பள்ளிக்கு அனுப்பினார்.[4]
பின்னர் மலாயா பல்கலைக்கழகத்தில் பட்டப் படிப்பிற்குச் சென்றார். அப்போது தமிழ்மொழியை ஒரு பாடமாக எடுத்துப் படித்தார். மலாயா பல்கலைக்கழகத்தில் முதன் முதலாக இந்திய ஆய்வியல் துறை தொடங்கப்பட்டபோது, அதன் தொடக்க ஆண்டிலேயே, அந்தத் துறையில் சேர்ந்து படித்தார்.[4]
1959-ஆம் ஆண்டில் பட்டப் படிப்பை முடித்த பத்மாநாபன், அரசாங்கத் துறையில் சேர்ந்தார். மலேசிய அரசாங்க நிதியுதவியைப் பெற்று அமெரிக்காவில் உள்ள ஆர்வர்டு பல்கலைக்கழகத்தின் பொது நிர்வாகத் துறையில் முதுகலை வணிக மேலாண்மை பட்டமும் பெற்றார். 1974-ஆம் ஆண்டு மலேசியப் பொதுத் தேர்தலில் போட்டியிடும் வரை, தொழிலாளர் அமைச்சிலும்; பின்னர் பிரதமர் துறையின் பொருளாதார திட்டமிடல் பிரிவிலும் பணியாற்றினார்.[4]
தெலுக் கெமாங் மக்களவைத் தொகுதி
[தொகு]1974-ஆம் ஆண்டில் மஇகா-தேசிய முன்னணி சார்பில் தெலுக் கெமாங் மக்களவைத் தொகுதி உறுப்பினராகத் தேர்ந்தெடுக்கப்பட்ட பத்மாநாபன், 1990-ஆம் ஆண்டு வரை அந்தத் தொகுதியைத் தற்காத்துக் கொண்டார்.[4]
1990-ஆம் ஆண்டு மலேசியப் பொதுத் தேர்தலில் அவருக்கு தெலுக் கெமாங் மக்களவைத் தொகுதியில் மீண்டும் போட்டியிட வாய்ப்பு வழங்கப்படவில்லை. அதைத் தொடர்ந்து அரசியலில் இருந்தும் அவர் விலகிக் கொண்டார்.[4] அரசியலில் இருந்து ஒதுங்கிய பின்னர், சில வணிக முயற்சிகளிலும் பல சமூகச் சேவைகளிலும் பத்மாநாபன் ஈடுபட்டார்.
மணிப்பால் மருத்துவக் கல்லூரி
[தொகு]மலேசிய நாட்டின் முன்னணி மருத்துவக் கல்லூரிகளில் ஒன்றாகத் திகழும் மணிப்பால் மருத்துவக் கல்லூரி; மலேசியாவில் முதல் தனியார் மருத்துவக் கல்லூரியாக உருவாக்கப்படுவதற்கு பத்மாநாபன் பெரும் முயற்சிகளை எடுத்துக் கொண்டார். மலேசிய சுகாதார துணை அமைச்சராக பணியாற்றிய அனுபவத்தைக் கொண்டு மணிப்பால் மருத்துவக் கல்லூரி மலேசியாவில் செயல்பட அடித்தளம் அமைத்துத் தந்தார்.[4][5]
இந்தியா-மலேசியா இரு நாடுகளுக்கு இடையிலான இரட்டை மருத்துவத் திட்டத்திற்கு, மலேசியப் பிரதமர் மற்றும் இந்தியப் பிரதமர்; மற்றும் இரு அரசாங்கங்களின் ஒப்புதலைப் பெறுவதில் பத்மாநாபன் மிக முக்கியப் பங்கு வகித்தார். மருத்துவக் கல்லூரியை அமைப்பதன் முக்கிய நோக்கம், குறிப்பாக இந்திய வம்சாவளியைச் சேர்ந்த மலேசியர்களுக்கு, மலிவு விலையில் உயர்தர மருத்துவக் கல்வி வாய்ப்புகளை வழங்குவதாகும்.
மலேசிய இந்தியர்களின் உரிமைகள்
[தொகு]மலேசிய இந்தியர்களின் உரிமைகள்; மற்றும் அவர்களின் கல்வித் துறை உரிமைகள்; ஆகியவற்றுக்காக பத்மநாபன் தீவிரமாகப் போராடியுள்ளார். மலேசிய இந்தியர் சமூகத்தை மேம்படுத்துவதில் கல்வியின் முக்கியத்துவத்தை அவர் வலியுறுத்தி வந்தார். மஇகாவின் கல்விக் குழுவிற்குத் தலைமை தாங்கிய அவர், அரசுப் பல்கலைக்கழகங்களால் நிராகரிக்கப்பட்ட அனைத்து மாணவர்கள் பற்றிய தகவல்களையும் சேகரித்தார்.
வெட்டுநிலை புள்ளியைத் (cut-off point) தவறவிட்ட மலேசிய இந்தியர் மாணவர்களுக்கு கூடுதல் இடங்களைப் பெறுவதற்காக, மலேசிய இந்தியர் காங்கிரசு பிரதிநிதிககுடன் பத்மநாபன், மலேசியாவின் ஒவ்வொரு பல்கலைக்கழகத் துணைவேந்தரையும் சந்தித்தார்.[6] அந்த வகையில் மலேசிய இந்தியர் மாணவர்கள் பலருக்கு மலேசியப் பொதுப் பல்கலைக்கழகங்களில் இடம் கிடைத்தன.
மஇகா தலைவர் துன் ச. சாமிவேலு அவர்களுடன் ஏற்பட்ட கருத்து வேறுபாடுகளின் காரணமாக பத்மநாபன் அரசியலில் இருந்து ஓய்வு பெற்றார் என்றும் அறியப்படுகிறது.
இறப்பு
[தொகு]டத்தோ கு. பத்மநாபன் சிறுநீரகம் மற்றும் கல்லீரல் செயலிழப்பு காரணமாக கோலாலம்பூரில் உள்ள பந்தாய் மருத்துவ மையத்தில் சூன் 9, 2001 அன்று அதிகாலை 1 மணியளவில்; தம்முடைய 64-ஆவது பிறந்த நாளைக் கொண்டாட ஒரே ஒரு நாள் எஞ்சியிருந்த நிலையில் காலமானார்.[4]
அவரின் உடல் செராஸ் புறநகர்ப் பகுதியில் உள்ள இந்து தகன மையத்தில் தகனம் செய்யப்பட்டது. இறுதிச் சடங்குகள் போர்ட்டிக்சன் நகரில் நடைபெற்றன.
நினைவு
[தொகு]மலேசிய இந்தியர் வரலாற்றில் தடம் பதித்தவர்களில் டத்தோ கு. பதபநாபன் அவர்களும் ஒருவராவார். மலேசிய இந்தியர்களின் நினைவுகளில் என்றும் நீங்கா இடம் பெற்றுள்ளார்.
மேற்கோள்கள்
[தொகு]- ↑ "MALAYSIAN DEPUTY MINISTER OF HEALTH DATUK K PATHMANABAN". www.nas.gov.sg. Retrieved 2 February 2026.
- ↑ "Milestones & History". MILA University. Archived from the original on 17 January 2025. Retrieved 17 January 2025.
- ↑ "SJKT Dato' K. Pathmanaban is setting a strong example in the Tamil school community". www.instagram.com. Retrieved 2 February 2026.
- 1 2 3 4 5 6 7 "டத்தோ கு. பத்மநாபன்: அறிவாற்றல் – அரசியல் விசுவாசம் – சமூக நோக்கு – ஒருங்கிணைந்த மகத்தான தலைவர் | Selliyal - செல்லியல்". Selliyal. 12 June 2022. Retrieved 2 February 2026.
- ↑ "Manipal University College Malaysia (MUCM); It was through the vision of Dr. Ramdas Pai, Chancellor of Manipal University, and the instrumental efforts of the late Datuk K Pathmanaban". MUCM ICON-IPEPC. Retrieved 2 February 2026.
- ↑ Samy Vellu and the Blue Book
மேலும் காண்க
[தொகு]வெளி இணைப்புகள்
[தொகு]| தொகுதிகள் | |
|---|---|
நெகிரி செம்பிலான் மாநிலம்: 8 மக்களவைத் தொகுதிகள் | |
