கதிராமங்கலம் காளஹஸ்தீசுவரர் கோயில்

கதிராமங்கலம் காளஹஸ்தீசுவரர் கோயில் தஞ்சாவூர் மாவட்டத்தில் உள்ள சிவன் கோயிலாகும்.

அமைவிடம்

இக்கோயில் தஞ்சாவூர் மாவட்டம் கதிராமங்கலத்தில் அமைந்துள்ளது. இவ்வூர் கதிர்வேய்ந்த மங்கலம் என்றும் அழைக்கப்படுகிறது.

இறைவன், இறைவி

இக்கோயிலின் மூலவராக காளஹஸ்தீசுவரர் உள்ளார். இறைவி ஞானாம்பிகை ஆவார். காளஹஸ்தி செல்ல முடியாதவர்கள் இக்கோயிலில் வந்து இறைவனை தரிசித்துவிட்டுச் செல்கின்றனர். அவ்வாறு வரும்போது அங்கு செல்லும் பலன் கிடைப்பதாக நம்புகின்றனர். இவ்வூருக்குத் தென் காளஹஸ்தி என்ற சிறப்புப் பெயரும் உண்டு.

அமைப்பு

மிருகண்டு முனிவர் மற்றும் இக்கோயிலைக் கட்டிய குலோத்துங்க சோழனின் சிற்பங்கள் இக்கோயிலில் உள்ளன. சிவமல்லிகாவனம் எனப்பெயர் பெற்ற இக்கோயிலில் சிவமல்லிகாவுக்கு தனி சிலை உள்ளது. அம்மன் சன்னதி தனியாக உள்ளது.

திருவிழாக்கள்

மகா சிவராத்திரி, மார்கழி திருவாதிரை போன்றவை இக்கோயிலில் நடைபெறும் திருவிழாக்களாகும்.