கசல் தாலிவால்

கசல் தாலிவால்
பிறப்பு	குன்ராஜ் சிங் தாலிவால் 1982 பாட்டியாலா, பஞ்சாப், இந்தியா
தேசியம்	இந்தியர்
பணி	திரைக்கதை எழுத்தாளர், உரையாடல் எழுத்தாளர், பொதுப் பேச்சாளர், செயற்பாட்டாளர்
அறியப்படுவது	ஏக் லட்கி கோ தேகா தோ அயிசா லகா, லிப்ஸ்டிக் அண்டர் மை புர்கா

கசல் தாலிவால் (Gazal Dhaliwal பிறப்பு 1982) என்பவர் ஓர் இந்தியத் திரைக்கதை, உரையாடல் எழுத்தாளர், பொதுப் பேச்சாளர், திருநங்கை உரிமைச் செயற்பாட்டாளர் ஆவார். ஏக் லட்கி கோ தேகா தோ அயிசா லகா, லிப்ஸ்டிக் அண்டர் மை புர்கா உள்ளிட்ட திரைப்படங்கள், இணையத் தொடர்களில் பணியாற்றியதன் மூலம் பரவலாக அறியப்படுகிறார்.

ஆரம்ப வாழ்க்கையும் கல்வியும்

கசல் தாலிவால் 1982ஆம் ஆண்டு பஞ்சாப் மாநிலத்தின் பாட்டியாலா நகரில் பிறந்தார். சிறு வயதிலிருந்தே தன்னைப் பெண்ணாக உணர்ந்ததாக பல நேர்காணல்களில் தெரிவித்துள்ளார். பாலின அடையாளம் தொடர்பான சிக்கல்களால் பள்ளிப் பருவத்தில் பல்வேறு சமூக மற்றும் உளவியல் சவால்களை எதிர்கொண்டார்.

இவர் மாலவியா தேசிய தொழில்நுட்ப நிறுவனம் , ஜெய்ப்பூரில் இரசாயனப் பொறியியல் படித்தார். பின்னர் இன்போசிசு நிறுவனத்தில் மென்பொருள் பொறியாளராகப் பணியாற்றினார். திரைப்படத் துறையில் இருந்த ஆர்வம் காரணமாக அந்தப் பணியை விட்டு மும்பை நகருக்குச் சென்று சேவியர்தகவல் தொடர்பு கல்லூரியில் திரைப்படத் தயாரிப்பு தொடர்பான கல்வி பயின்றார்.

2007ஆம் ஆண்டில் பாலின மாற்று அறுவைச் சிகிச்சை மேற்கொண்டார்.

பணிவாழ்க்கை

திரைப்பட எழுத்தாளராகத் தனது வாழ்க்கையைத் தொடங்கிய கசல் தாலிவால், 2016ஆம் ஆண்டு வெளியான வாசிர் திரைப்படத்தில் கூடுதல் உரையாடல் எழுத்தாளராகப் பணியாற்றினார்.

அதனைத் தொடர்ந்து லிப்ஸ்டிக் அண்டர் மை புர்கா (2016) திரைப்படத்திற்கு உரையாடல்கள் எழுதினார். கரிப் கரிப் சிங்கிள் (2017) திரைப்படத்தில் திரைக்கதை மற்றும் உரையாடல்களை இணைந்து எழுதினார். 2019ஆம் ஆண்டு வெளியான ஏக் லட்கி கோ தேகா தோ அயிசா லகா திரைப்படத்தின் திரைக்கதை, உரையாடல்கள் இவருக்கு பரவலான பாராட்டைப் பெற்றுத் தந்தன.

சமூகச் செயற்பாடு

கசல் தாலிவால் இந்தியாவின் குறிப்பிடத்தக்க திருநங்கை உரிமை செயற்பாட்டாளர்களில் ஒருவராகக் கருதப்படுகிறார். ஆமிர் கான் தொகுத்து வழங்கிய சத்யமேவ ஜெயதே நிகழ்ச்சியில் பங்கேற்று தனது வாழ்க்கை அனுபவங்களைப் பகிர்ந்துகொண்டார்.

2016ஆம் ஆண்டில் அமெரிக்க அரசுத் துறையால் நடத்தப்பட்ட சர்வதேச வருகைதரும் தலைவர்கள் என்ற திருநங்கை உரிமைகள் தொடர்பான பரிமாற்றத் திட்டத்தில் இந்தியக் குழுவின் உறுப்பினராகப் பங்கேற்றார்.