ஏ. டி. மூர்த்தி
ஏ. டி. மூர்த்தி | |
|---|---|
 | |
| ஐக்கிய இராச்சியத்திற்கான இலங்கையின் உயர்ஸ்தானிகர் | |
| பதவியில் ஜனவரி 1981 – மே 1984 | |
| முன்னையவர் | நோயல் விமலசேனா |
| பின்னவர் | சந்திரா மொனரவெல |
| பாக்கிஸ்தானுக்கான இலங்கையின் உயர்ஸ்தானிகர் | |
| பதவியில் 1978–1981 | |
| தனிப்பட்ட விவரங்கள் | |
| பிறப்பு | 10 ஆகத்து 1928 மட்டக்களப்பு மாவட்டம், இலங்கை |
| இறப்பு | 1 ஏப்ரல் 2008 (அகவை 79) இலண்டன், ஐக்கிய இராச்சியம் |
| முன்னாள் மாணவர் | இலங்கைப் பல்கலைக்கழகம், கொழும்பு |
| தொழில் | இராஜதந்திரி |
| இனம் | இலங்கைத் தமிழர் |
அரம்பமூர்த்தி தட்சிணாமூர்த்தி (Arambamoorthy Decshinamoorthy, 10 ஆகஸ்ட் 1928 – 1 ஏப்ரல் 2008) ஒரு முன்னணி இலங்கைத் தமிழ் இராஜதந்திரி ஆவார். இவர் ஐக்கிய இராச்சியத்திற்கான இலங்கையின் உயர்ஸ்தானிகராகப் பணியாற்றியவர்.
ஆரம்பகால வாழ்க்கை மற்றும் குடும்பம்
[தொகு]மூர்த்தி 1928 ஆகஸ்ட் 10 அன்று கிழக்கு இலங்கையின் மட்டக்களப்பு மாவட்டத்தில் பிறந்தார்.[1] இவர் மட்டக்களப்பு சிவானந்தா வித்தியாலயம் மற்றும் யாழ்ப்பாணக் கல்லூரி ஆகியவற்றில் கல்வி பயின்றார்.[1] பள்ளிப் படிப்பை முடித்த பின்னர், கொழும்பிலுள்ள இலங்கைப் பல்கலைக்கழகத்தில் இணைந்து, 1948-ஆம் ஆண்டில் பொருளாதாரத்தில் இளங்கலைப் பட்டம் பெற்றார்.[1]
மூர்த்தி 1959-ஆம் ஆண்டில் பி. ஸ்ரீசந்தராஜாவின் மகளான சுசீலாவை மணந்தார்.[1]இத்தம்பதியருக்கு உமா, இமா என்ற இரு மகள்களும், ஸ்ரீ அகிலவன் என்ற ஒரு மகனும் இருந்தனர்.[1]
தொழில் வாழ்க்கை
[தொகு]மூர்த்தி 1953-ஆம் ஆண்டில் இலங்கையின் வெளிநாட்டுச் சேவையில் இணைந்தார்; இவருடைய முதல் இராஜதந்திரப் பணி இந்தோனேசியாவின் ஜகார்த்தாவில் அமைந்தது.[1]1957-ஆம் ஆண்டில் சீனாவின் பெய்ஜிங் நகரில் உள்ள இலங்கைத் தூதரகத்தின் பொறுப்பாளராகவும் நியமிக்கப்பட்டார். அங்கு இவர் மாவோ சேதுங் மற்றும் சூ என்லாய் போன்ற உலகத் தலைவர்களைச் சந்தித்தார்.[1]
1961 முதல் 1963 வரை இலண்டனில் உள்ள இலங்கை உயர்ஸ்தானிகராலயத்தில் முதல் செயலாளராகப் பணியாற்றினார்.[1] இக்காலகட்டத்தில், மூர்த்தியும் சுசீலாவும் கிரேஸ் இன் (Gray's Inn) நிறுவனத்தில் சட்டம் பயின்றனர்.[1] இவர் 1965-ஆம் ஆண்டில் வழக்கறிஞராக முறைப்படிப் பதிவு செய்து கொண்டார்.[1]
மூர்த்தி பின்னர் பல்வேறு இராஜதந்திரப் பதவிகளில் பணியாற்றினார்: மேற்கு செர்மனியில் முதல் செயலாளர், தாய்லாந்தில் தூதரகக் காரியாதிகாரி, ஆசியா மற்றும் தூரக் கிழக்கிற்கான ஐக்கிய நாடுகளின் பொருளாதார ஆணையத்தின் (ECAFE) நிரந்தரப் பிரதிநிதி மற்றும் ஈராக்கிற்கான தூதரகக் காரியாதிகாரி (1970) ஆகிய பொறுப்புகளை வகித்தார்.[1] 1976-இல் கொழும்பில் நடைபெறவிருந்த ஐந்தாவது அணிசேரா நாடுகளின் உச்சிமாநாட்டை ஒருங்கிணைக்கும் பணிகளுக்காக, 1974-ஆம் ஆண்டில் அவர் இலங்கை திரும்பினார்.[1]
1978-ஆம் ஆண்டில் பாக்கிஸ்தானுக்கான உயர்ஸ்தானிகராக நியமிக்கப்பட்டார் (இவரே ஈரானுக்கான தூதராகவும் கூடுதல் பொறுப்பு வகித்தார்).[1] 1979 ஈரானியப் புரட்சிக்குப் பிறகு, ஈரானில் அமெரிக்கப் பணயக்கைதிகளை விடுவிக்க இலங்கை அரசாங்கம் மேற்கொண்ட சமாதான முயற்சிகளில் மூர்த்தி மிக முக்கியப் பங்கு வகித்தார்.[1]
1981-ஆம் ஆண்டில் மூர்த்தி ஐக்கிய இராச்சியத்திற்கான இலங்கை உயர்ஸ்தானிகராக நியமிக்கப்பட்டார்.[2] இக்காலகட்டத்தில், இலங்கையில் தமிழர்களுக்கு எதிரான வன்முறைகள் தீவிரமடைந்து, 1983-ஆம் ஆண்டின் கறுப்பு ஜூலை இனக்கலவரங்களில் உச்சக்கட்டத்தை அடைந்தது.[1]
இதன் காரணமாக, ஐக்கிய இராச்சியத்தில் வசித்த சிங்களப் புலம்பெயர்ந்தோர் , தமிழ் அதிகாரியான மூர்த்திக்குப் பதிலாக ஒரு பௌத்த சிங்களவரை உயர்ஸ்தானிகராக நியமிக்க வேண்டும் என்று இலங்கை அரசுக்கு அழுத்தம் கொடுத்துப் பிரச்சாரத்தைத் தொடங்கினர்.[3] இங்கிலாந்திலுள்ள சிங்களச் சங்க உறுப்பினர் ஒருவரிடமிருந்து இவருக்குக் கொலை மிரட்டல் கடிதமும் வந்தது. அதேநேரம், இலங்கையில் தமிழர்களுக்கு எதிராகக் கடுமையான பாகுபாடு எதுவும் இல்லை என்பதற்கான சான்றாகத் தனது நியமனத்தைக் காட்டி உலக அரங்கில் பிரகடனம் செய்யுமாறு இலங்கை அரசாங்கம் மூர்த்திக்கு உத்தரவிட்டது.[1] ஆனால், உண்மைக்கு மாறான அத்தகைய அறிவிப்பை வெளியிட மறுத்த மூர்த்தி, 1984-ஆம் ஆண்டில் தனது பதவியை இராஜினாமா செய்தார்.[1]
இராஜினாமாவிற்குப் பிறகு, மூர்த்தியும் அவரது குடும்பத்தினரும் ஐக்கிய இராச்சியத்திலேயே தங்கிவிட்டனர்.[4] இவர் 2008 ஏப்ரல் 1 அன்று இலண்டனில் காலமானார்.[1]
வெளி இணைப்புகள்
[தொகு]மேற்கோள்கள்
[தொகு]- 1 2 3 4 5 6 7 8 9 10 11 12 13 14 15 16 17 18 Farrell, Tom (19 May 2008). "Obituary: AT Moorthy". தி கார்டியன். https://www.theguardian.com/world/2008/may/19/srilanka.
- ↑ "The History of the High Commission". High Commission of Sri Lanka, London. Archived from the original on 2015-03-03. Retrieved 2015-02-02.
- ↑ "The London Hilton Jamboree". Tamil Times IV (11): 12. September 1985. பன்னாட்டுத் தர தொடர் எண்:0266-4488. http://noolaham.net/project/32/3142/3142.pdf.
- ↑ "The chimes of peace". The Sunday Times (Sri Lanka). 11 August 2002. http://www.sundaytimes.lk/020811/plus/9.html.
