உடலோவியம்
 | |
| முதன்மை வகை | உடல் கலை |
|---|---|
| ஆயுட்காலம் | தற்காலிகமானது (சில மணிநேரங்கள் முதல் சில வாரங்கள் வரை) |
| பயன்படுத்தப்படும் பொருட்கள் | இயற்கை வண்ணங்கள், மருதாணி, அக்ரிலிக் மற்றும் இருள் ஒளிரும் வண்ணங்கள் |
| முக்கிய வடிவங்கள் |
|
| நோக்கம் | கலை வெளிப்பாடு, சடங்குகள், திருவிழாக்கள் மற்றும் விளம்பரம் |
உடலோவியம் என்பது மனித தோலின் மீது நேரடியாக ஓவியங்களை வரையும் ஒரு வகையான உடல் கலை வடிவமாகும்.[1] பச்சை குத்துதல் மற்றும் பிற உடல் கலை வடிவங்களைப் போலல்லாமல், உடலோவியம் என்பது தற்காலிகமானது. இது சில மணிநேரங்கள் அல்லது சில வாரங்கள் மட்டுமே நீடிக்கும். முகத்தில் மட்டுமே வரையப்படும் உடலோவியம் முக ஓவியம் என்று அழைக்கப்படுகிறது.[2]
உடலோவியம் என்பது தற்காலிகப் பச்சை குத்தலின் ஒரு வடிவமாகவும் குறிப்பிடப்படுகிறது. உடல் முழுவதும் அல்லது பெரிய அளவில் வரையப்படும் கலை பொதுவாக உடலோவியம் என்று அழைக்கப்படுகிறது. அதே நேரத்தில் சிறிய அல்லது மிகவும் நுணுக்கமான வேலைப்பாடுகள் சில நேரங்களில் தற்காலிகப் பச்சை குத்துதல் என்று அழைக்கப்படுகின்றன.
உடலோவியத்தின் முக்கிய வகைகள்
[தொகு]உடலோவியம் அது பயன்படுத்தப்படும் பொருட்கள், பரப்பளவு மற்றும் நோக்கத்தின் அடிப்படையில் பல வகைகளாகப் பிரிக்கப்படுகிறது. அவற்றுள் முக்கியமானவை பின்வருமாறு:
- முழு உடலோவியம்: மனிதரின் தலை முதல் கால் வரை ஒட்டுமொத்த உடலையும் ஒரு ஓவியத் திரையாகப் பயன்படுத்தி வரையப்படும் கலை வடிவமாகும். இது பெரும்பாலும் கலைத் திருவிழாக்கள் மற்றும் விளம்பரங்களில் பயன்படுத்தப்படுகிறது.
- முக ஓவியம்: கலை வடிவங்களை முகத்தில் மட்டும் சுருக்கிக் வரைவதாகும். இது பொதுவாகக் குழந்தைகள் திருவிழாக்கள், முகமூடி விழாக்கள் மற்றும் விளையாட்டுப் போட்டிகளின் போது ஆதரவாளர்களால் முகத்தில் வரையப்படுகிறது.
- மருதாணி கலை: இயற்கை மருதாணி இலைகளின் கலவையைப் பயன்படுத்தி கைகள் மற்றும் கால்களில் தற்காலிகமாக நுணுக்கமான வடிவங்களை வரையும் பாரம்பரியக் கலையாகும். இது சில வாரங்கள் வரை தோலில் நீடிக்கும்.
- தற்காலிகப் பச்சை குத்துதல்: ஊசிகளைப் பயன்படுத்தாமல், தோலின் மேல் பகுதியில் மட்டும் தற்காலிக வண்ணங்கள் அல்லது ஒட்டிகள் மூலம் வரையப்படும் சிறிய அளவிலான ஓவியங்கள் ஆகும்.
- இருளில் ஒளிரும் உடலோவியம்: புற ஊதாக் கதிர்கள் அல்லது இருட்டில் ஒளிரும் சிறப்பு வண்ணங்களைப் பயன்படுத்தி வரையப்படும் ஓவியங்கள் ஆகும். இவை இரவு விடுதிகள் மற்றும் நவீன கலை நிகழ்ச்சிகளில் பரவலாகப் பயன்படுத்தப்படுகின்றன.
- உடை பாவனை உடலோவியம்: ஆடை ஏதும் அணியாமல், உடலின் மீது ஆடைகளைப் போன்றே துல்லியமாக வண்ண தீட்டி ஏமாற்றுத் தோற்றத்தை உருவாக்கும் ஒரு அதிநவீன உடலோவியக் கலை வடிவமாகும்.
பாரம்பரிய மற்றும் கலாச்சார உடலோவியங்கள்
[தொகு]- பழங்குடி இன உடலோவியம்: உலகின் பல்வேறு பகுதிகளில் உள்ள பழங்குடி மக்கள் தங்களின் கலாச்சாரம், சடங்குகள், போர்முறைகள் மற்றும் ஆன்மீக அடையாளங்களுக்காக உடலின் மீது இயற்கையான மண், சாம்பல் மற்றும் தாவரச் சாறுகளைக் கொண்டு வரையும் பாரம்பரிய முறையாகும்.
- நாடக மற்றும் கதகளி ஒப்பனை: பாரம்பரிய நடனங்கள் மற்றும் நாடகங்களில், கதாபாத்திரங்களின் உணர்ச்சிகளை வெளிப்படுத்த முகத்திலும் உடலிலும் தடிமனான வண்ணக் கலவைகளைக் கொண்டு வரையப்படும் கலை வடிவமாகும்.
உடலோவியம் பெரும்பாலும் பாலினம் மற்றும் தனிப்பட்ட அடையாளம் தொடர்பான சிக்கல்களைக் கையாள்கிறது. இதன் முன்னோடிகள் அவாண்ட்-கார்ட் கலைஞர்கள் ஆவர். 1913 இல் ரஷ்ய எதிர்காலவாதிகள் மாஸ்கோ தெருக்களில் வர்ணம் பூசப்பட்ட முகங்களுடன் ஒரு செயலை நிகழ்த்தினர் பின்னர் "நாம் ஏன் நம்மை நாமே வர்ணம் பூசிக் கொள்கிறோம்?" என்ற அறிக்கையை ரஷ்ய இதழான "ஆர்கஸ்" இல் அச்சிட்டனர்.
மருத்துவப் பயன்பாடுகள்
[தொகு]உடலோவியம், குறிப்பாக உடலின் மீது ஓவியம் வரைவது என்பது மருத்துவத் துறையில் முதன்மையாகக் கல்வி கற்பிப்பதற்காகப் புதிதாக இணைக்கப்பட்ட ஒரு திறமையாகும். காப்ரியல் பிளின் என்பவரின் கூற்றுப்படி, உடலின் உடலியங்கியலைக் கற்றுக்கொள்வதற்கான முதன்மை முறை மனிதப் பிணங்களை ஆராய்வதாகும் என்றாலும், சில மாணவர்கள் இந்த நடைமுறையால் மிகவும் மன உளைச்சலுக்கு ஆளாகிறார்கள் அல்லது தயக்கம் காட்டுகிறார்கள் என்கிறார்.[3]
ஆதாரம்
[தொகு]- ↑ Oxford Dictionary of Modern and Contemporary Art, Oxford University, p. 88
- ↑ Tate. "Body art – Art Term". Tate (in பிரிட்டிஷ் ஆங்கிலம்). Retrieved 2021-08-11.
- ↑ Finn, Gabrielle M (25 September 2018). "Current perspectives on the role of body painting in medical education". Advances in Medical Education and Practice 9: 701–706. doi:10.2147/AMEP.S142212. பப்மெட்:30310345.