ஈரோடு நாகராஜ்
ஈரோடு நாகராஜ் [1] (Erode Nagaraj) என்பவர் ஒரு தொழில்முறை மிருதங்க இசைக் கலைஞராவார். முதலில் பல்லடம் வி. ராமச்சந்திரனிடம் கற்றுக்கொண்ட இவர், 28 ஆண்டுகளுக்கும் மேலாக உமையாள்புரம் கே. சிவராமனின் சீடராக இருந்து வருகிறார்.
இவர் சென்னை மியூசிக் அகாதெமியில் உள்ள தஞ்சாவூர் வைத்தியநாத ஐயர் தாள இசைக்கருவி பள்ளியில் 18 ஆண்டுகளாக விரிவுரையாளராகப் பணியாற்றி வருகிறார். சர்வதேச அளவில் கலைஞர்களுக்கும், மாணவர்களுக்கும் இணைய வழியில் வகுப்புகளையும் நடத்திவருகிறார்.
ஈரோடு நாகராஜ் தனது சிறு வயதிலேயே தாள இசையின் மீது மிகுந்த ஆர்வத்தைக் கொண்டிருந்தார். ஏழு வயதிலேயே பல்லடம் வி. ராமச்சந்திரன் அவர்களிடம் மிருதங்க இசைக் கலையை முறைப்படி கற்கத் துவங்கினார். இவர் சங்கீத கலாநிதி பத்ம விபூஷன் உமையாள்புரம் கே. சிவராமனின் சீடராக ஆனார். 1990 முதல் அவரிடம் பயிற்சி பெற்று வருகிறார். தனது மேம்பட்ட பயிற்சியின் ஒரு பகுதியாக பல சிக்கலான தாளங்களை வாசிக்கக் கற்றுக்கொண்டார்.
ஈரோடு நாகராஜ் தன் பள்ளிப் பருவத்தில் மாவட்ட மற்றும் மாநில அளவிலான போட்டிகளில் தொடர்ந்து கலந்துகொண்டு பல பாராட்டுகளையும் சிறப்புகளையும் பெற்றுள்ளார். 1993 ஆம் ஆண்டில் இவர் சென்னை இசையுலகில் தனது முதல் நிகழ்ச்சியை நடத்தினார். பண்பாட்டுத் துறை இவருக்கு 1994–1996 ஆண்டுகளுக்கான உதவித்தொகையை வழங்கியது. இவர் "ஏ" கிரேடு கலைஞராக, 1994 முதல் அனைத்திந்திய வானொலி (ஏஐஆர்) மற்றும் டிடி சென்னையிலும் நிகழ்ச்சிகளில் இசைத்து வருகிறார். அகில இந்திய வானொலியில் 'மிஸ்ர திரிபுட' (ரெண்டு கலை) என்ற அரிய தாளத்திலும், டிடி சென்னையில் ஆதி தாளத்திலும் இவர் வழங்கிய லய விந்யாசம் (மிருதங்க தனி ஆவர்த்தனம்) கருநாடக இசை உலகில் உள்ள வித்வான்கள், இரசிகர்கள் மற்றும் பிறரால் பாராட்டப்பட்டது. இவர் அகில இந்திய வானொலியின் மும்மூர்த்தி விழாவில் தேசிய இசை நிகழ்ச்சியிலும், ஆகாஷ்வாணி சங்கீத சம்மேளனத்திலும் வாசித்துள்ளார்.
இவர் 1994 முதல் மெட்ராஸ் மியூசிக் அகாதெமி, நாரத கான சபா,[2] ஸ்ரீ கிருஷ்ண கான சபா, இந்தியன் ஃபைன் ஆர்ட்ஸ் சொசைட்டி மற்றும் ஸ்ரீ பார்த்தசாரதி சுவாமி சபா போன்ற அமைப்புகளுக்காக நிகழ்ச்சிகளை நிகழ்த்தியுள்ளார். இவரது சொற்பொழிவு விளக்கங்களும், ஊடாடும் அமர்வுகளும் குறிப்பிடத்தக்க பாராட்டுகளைப் பெற்றுள்ளன.
இவர் விரல் நுட்பங்களையும் லய நுணுக்கங்களையும் கற்பிப்பதில் திறமையானவர், மேலும் இருபதாண்டுகளுக்கும் மேலாக இந்தியாவிலும் வெளிநாட்டிலும் மாணவர்களுக்கு பயிற்சி அளித்து வருகிறார்.[3] இவருக்கு அனைத்து வகையான இசையிலும் ஆர்வம் உண்டு. இவர் மெட்ராஸ் கிரிக்கெட் கிளப்பில், தன் குருவான 'லய ஜோதி' உமையாள்புரம் கே. சிவராமன், ஸ்டீவ் கோல்மன் (சாக்ஸபோன்) மற்றும் விஜய் ஐயர் (ஜாஸ் பியானோ கலைஞர்) ஆகியோருடன் இணைந்து வாசித்தபோது, கொன்னக்கோல் (மிருதங்கத்தில் வாசிக்கப்படும் ஜதிகள் மற்றும் சொற்கோவைகளின் வாய்மொழி உச்சரிப்பு) வழங்கினார் . சங்கீர்ண சாப்பு என்ற அரிய தாளாத்தில் இவரது மிருதங்கம் தனிப்பாடல் சமுத்ரா, லண்டனில் பதிவு செய்யப்பட்டது. ஜிகே ஃபவுண்டேஷன் டிரஸ்ட் 2001 ஆம் ஆண்டு நடைபெற்ற அவர்களின் ஆண்டு விழாவில், புகழ்பெற்ற இசைக்கலைஞர் சங்கீத கலாநிதி பாலக்காடு கே. வி. நாராயணசுவாமியுடன் இணைந்து இவரை கௌரவித்தது. அந்நிகழ்வில் பத்மஸ்ரீ கே.ஜே. யேசுதாஸ் கலைஞர்களை கௌரவித்தார்.
இவர் டிடி பொதிகை, சன் தொலைக்காட்சி, ராஜ் தொலைக்காட்சி, ராஜ் டிஜிட்டல் பிளஸ், வின்-டிவி ஆகியவற்றின் சிறப்பு நிகழ்ச்சிகளில் நிகழ்ச்சிகளை நடத்தியுள்ளார். மிருதங்கம் வாசிப்பதைத் தவிர, ஈரோடு நாகராஜ் ஒரு தீவிர வலைப்பதிவரும் ஆவார்.[4]
முழுநேர தொழில்முறை மிருதங்கக் கலைஞராக இருப்பதோடு மட்டுமல்லாமல், 1998 முதல் 2016 வரை மெட்ராஸ் மியூசிக் அகாதெமியின் தஞ்சாவூர் வைத்தியநாத ஐயர் தாள வாத்தியப் பள்ளியில் விரிவுரையாளராகவும் பணியாற்றியுள்ளார்.
மேற்கோள்கள்
[தொகு]- ↑ Nagaraj, Erode. "EN's Professional Website". Wix. Erode Nagaraj. Retrieved 4 May 2019.
- ↑ Nagaraj, Erode (9 December 2016). "Thani for kApAli - Mohanam". Youtube. Erode Nagaraj. Retrieved 4 May 2019.
- ↑ Nagaraj, Erode (3 October 2007). "Sri Erode Nagaraj teaching Jonathan Singer". Youtube. Erode Nagaraj. Retrieved 4 May 2019.
- ↑ Nagaraj, Erode. "Erode Nagaraj's Blog Page". Blogspot. Erode Nagaraj. Retrieved 4 May 2019.