ஆண்விழையான்
கே அல்லது ஆண்விழையான் (ஆங்கிலம்: Gay) என்பது முதன்மையாகத் தன்பாலீர்ப்பு இயல்புடைய ஆண்களையோ அல்லது அந்தப் பண்பையோ குறிக்கும் ஒரு சொல்லாகும். இச்சொல் முதலில் "கவலையற்றது", "மகிழ்ச்சியானது" அல்லது "பிரகாசமான மற்றும் கவர்ச்சியானது" என்ற பொருள்களிலேயே ஆங்கிலத்தில் பயன்படுத்தப்பட்டது.[1]
தன்பாலீர்ப்பு ஆண்களைக் குறிக்க இச்சொல்லைப் பயன்படுத்தும் வழக்கம் 19 ஆம் நூற்றாண்டின் பிற்பகுதியிலேயே இருந்தபோதிலும், 20 ஆம் நூற்றாண்டின் நடுப்பகுதியில் தான் இப்பொருள் பெருகிய முறையில் பொதுவானதாக மாறியது.[2] நவீன ஆங்கிலத்தில், தன்பாலீர்ப்புத் தொடர்புடைய சமூகம், நடைமுறைகள் மற்றும் கலாச்சாரங்களைக் குறிக்கும் ஒரு பெயரடையாகவும் பெயர்ச்சொல்லாகவும் இச்சொல் பயன்படுத்தப்படுகிறது.
1960-களில், தன்பாலீர்ப்பு ஆண்கள் தங்களின் பாலியல் நாட்டத்தை விவரிப்பதற்கு மிகவும் விரும்பும் சொல்லாக இது மாறியது.[3] 20 ஆம் நூற்றாண்டின் இறுதி மற்றும் 21 ஆம் நூற்றாண்டின் தொடக்கத்தில், ஒரே பாலின ஈர்ப்பு கொண்ட நபர்களை விவரிப்பதற்கு முதன்மையான எல்ஜிபிடிஐக்யூ (LGBTQ) குழுக்களாலும் ஊடக வழிகாட்டிகளாலும் இச்சொல் பரிந்துரைக்கப்பட்டது; இருப்பினும், இது இப்போதும் பொதுவாக ஆண்களைக் குறிக்கவே பிரதானமாகப் பயன்படுத்தப்பட்டு வருகிறது.[4][5]
எதிர்மறைப் பயன்பாடும் விமர்சனங்களும்
[தொகு]1980களில் இருந்து, உலகின் சில பகுதிகளில் இச்சொல்லின் புதிய, எதிர்மறையான பயன்பாடு ஒன்று பரவலாகக் காணப்பட்டது. குறிப்பாக இளைய தலைமுறையினரிடையே, இச்சொல் ஏளனம் செய்யும் நோக்கோடும் (எ.கா: "குப்பை" அல்லது "முட்டாள்"), சில நேரங்களில் லேசான கேலி அல்லது சலிப்பை வெளிப்படுத்தவும் (எ.கா: "பலவீனமான" அல்லது "சலிப்பானது") பயன்படுத்தப்பட்டது. இத்தகைய பயன்பாடுகள் எந்த அளவிற்கு தன்பாலீர்ப்பு வெறுப்புணர்வோடு (Homophobia) தொடர்புடையவை என்பது விவாதத்திற்குரியதாகவும், கடுமையான விமர்சனத்திற்குள்ளாகவும் உள்ளது.[6][7]
இச்சொல்லை இழிவாகப் பயன்படுத்துவது கடுமையான மனவருத்தத்தை ஏற்படுத்துவதாலும், தன்பாலீர்ப்பாளர்களை அவமதிக்கும் செயலாகக் கருதப்படுவதாலும், இது சமூக ரீதியாகப் பொருத்தமற்ற ஒன்றாகவே பார்க்கப்படுகிறது. சில நாடுகளில் இத்தகைய இழிவுபடுத்தும் பயன்பாடுகள் சட்டப்பூர்வமாகக் கட்டுப்படுத்தப்பட்டும் உள்ளன.[8][9]
வரலாறு
[தொகு]கண்ணோட்டம்
[தொகு]
"கே" (Gay) என்ற சொல் 12 ஆம் நூற்றாண்டில் பழைய பிரெஞ்சு மொழியின் 'காய்' (gai) என்ற சொல்லிலிருந்து ஆங்கிலத்திற்கு வந்தது; இது பெரும்பாலும் ஒரு செருமானிய மூலத்திலிருந்து பெறப்பட்டிருக்கலாம். இச்சொல் ஆங்கிலத்தில் வந்த தொடக்க காலத்தில், "மகிழ்ச்சியான", "துள்ளலான", "பிரகாசமான" அல்லது "வேடிக்கையான" என்ற பொருள்களிலேயே பல நூற்றாண்டுகளாகப் பயன்படுத்தப்பட்டது. 20 ஆம் நூற்றாண்டின் பிற்பகுதியில் (குறிப்பாக 1960-களுக்குப் பிறகு), இச்சொல் தன்பாலீர்ப்பு கொண்ட ஆண்களைக் குறிக்கும் முதன்மைச் சொல்லாக உருவெடுத்தது.[2]
ஆங்கிலத்தில், இச்சொல்லின் முதன்மையான பொருள் "மகிழ்ச்சியான", "கவலையற்ற", "பிரகாசமான" மற்றும் "கவர்ச்சியானது" என்பதாகும். கடந்த காலப் பேச்சு வழக்கிலும் இலக்கியங்களிலும் இச்சொல் பொதுவாக இப்பொருளிலேயே எடுத்தாளப்பட்டது. உதாரணமாக, அமெரிக்க வரலாற்றில் பொருளாதார வளமும் மகிழ்ச்சியும் நிறைந்ததாகக் கருதப்படும் 1890-களின் காலகட்டம், இன்றும் பொதுவாக "தி கே நைன்டீஸ்" (The Gay Nineties) என்றே குறிப்பிடப்படுகிறது. 1938-ஆம் ஆண்டின் பிரெஞ்சு பாலே (Ballet) நடனமான 'காய்தே பாரிசியன்' (Gaïté Parisienne - பாரிசிய மகிழ்ச்சி) என்பதைத் தழுவி, 1941-இல் வார்னர் பிரதர்ஸ் வெளியிட்ட 'தி கே பாரிசியன்' (The Gay Parisian) என்ற திரைப்படத்தின் தலைப்பும் இச்சொல்லின் இப்பொருளையே விளக்குகிறது.[11] 19-ஆம் நூற்றாண்டிற்கு முன்னரே இச்சொல் சில பாலியல் விபரங்களோடு தொடர்புபடுத்தப்பட்டிருந்தாலும், 20-ஆம் நூற்றாண்டின் நடுப்பகுதிக்குப் பிறகே இது குறிப்பாக "தன்பாலீர்ப்பு" என்ற பொருளைத் தரும் சொல்லாக நிலைபெற்றது.[2]
இதிலிருந்து உருவான "கெய்டி" (Gaiety - மகிழ்ச்சி) என்ற பெயர்ச்சொல், இத்தகைய பாலியல் அர்த்தங்கள் எமுமின்றி முற்றிலும் மகிழ்ச்சியைக் குறிக்கும் சொல்லாகவே விளங்கியது. கடந்த காலத்தில், டப்ளினில் உள்ள புகழ்பெற்ற "கெய்டி தியேட்டர்" (Gaiety Theatre) போன்ற பல பொழுதுபோக்கு மையங்களின் பெயர்களில் இச்சொல் பயன்படுத்தப்பட்டு வந்துள்ளது.
தன்பாலீர்ப்பு
[தொகு]பாலீர்ப்பு, அடையாளம், நடத்தை
[தொகு]அமெரிக்க உளவியல் சங்கத்தின் வரைவிலக்கணத்தின்படி, பாலியல் நாட்டம் என்பது ஆண்கள், பெண்கள் அல்லது இருபாலர் மீதும் ஏற்படும் தொடர்ச்சியான உணர்வுப்பூர்வ, காதல் மற்றும் பாலியல் ஈர்ப்பைக் குறிக்கிறது. இது பொதுவாக எதிர்பாலீர்ப்பு, தன்பாலீர்ப்பு, மற்றும் இருபாலீர்ப்பு என வகைப்படுத்தப்படுகிறது.[12]
இனம் அல்லது மொழி சார்ந்த பிற சிறுபான்மையினரைப் போலன்றி, தன்பாலீர்ப்புடைய பெண்கள் (லெஸ்பியன்), தன்பாலீர்ப்புடைய ஆண்கள் (கே), மற்றும் இருபாலீர்ப்பாளர்கள் தங்கள் அடையாளத்தைப் புரிந்துகொள்ளவும் ஆதரிக்கவும் ஏற்ற குடும்ப அல்லது சமூகச் சூழலில் வளர்வது அரிதாகவே உள்ளது. மாறாக, பெரும்பாலும் தன்பாலீர்ப்பு குறித்த போதிய விழிப்புணர்வின்மை அல்லது சமூக எதிர்ப்பு நிலவும் சூழல்களிலேயே இவர்கள் வளர்கின்றனர்.[13]
பிரித்தானிய மனித உரிமைச் செயற்பாட்டாளர் பீட்டர் தட்செல், 'கே' போன்ற சமூகப் பெயரிடல்கள் ஒரு குறிப்பிட்ட காலக்கட்டத்தின் சமூக நிலையைப் பிரதிபலிக்கும் தற்காலிக அடையாளங்களே என்றும், எதிர்காலத்தில் இத்தகைய வகைப்பாடுகளுக்கான தேவை இருக்காது என்றும் குறிப்பிடுகிறார்.[14]
ஒருவரின் பாலியல் செயல்பாடு அல்லது நடத்தையானது அவரது பாலியல் அடையாளத்துடன் எப்போதும் முழுமையாகப் பொருந்த வேண்டிய அவசியமில்லை. ஒரே பாலினத்தைச் சேர்ந்தவருடன் பாலுறவு கொண்டாலும் ஒருவர் தன்னைத் தன்பாலீர்ப்பாளராக வெளிப்படையாக அடையாளப்படுத்திக் கொள்ளாமல் இருக்கலாம். அதேபோல், உடலுறவு அனுபவம் இல்லாத நிலையிலும் ஒருவர் தன்னைத் தன்பாலீர்ப்பாளராக உணர்ந்து அடையாளப்படுத்திக் கொள்ள முடியும். மேலும் சிலர் தன்பாலின ஈர்ப்பு கொண்டிருந்தாலும் உடலுறவில் ஈடுபடாமலோ அல்லது எந்தவொரு அடையாளத்தையும் ஏற்காமலோ இருக்கலாம்; இது சில நேரங்களில் பாலிலீர்ப்பாகவும் கருதப்படுகிறது.
மேலும் வாசிக்க
[தொகு]- Cory, Donald Webster (1951). The Homosexual in America: A Subjective Approach. Greenberg. p. 107. Chapter 9 ("Take My Word For It") includes a valuable discussion of the term "gay.".
- Leap, William (1995). Beyond the Lavender Lexicon: Authenticity, Imagination, and Appropriation in Lesbian and Gay Language. Taylor & Francis. p. 360. ISBN 978-2-88449-181-5.
மேற்கோள்கள்
[தொகு]- ↑ Hobson, Archie (2001). The Oxford Dictionary of Difficult Words (1st ed.). Oxford University Press. ISBN 978-0195146738.
- 1 2 3 Harper, Douglas (2001–2013). "Gay". Online Etymology dictionary. Archived from the original on 19 February 2006. Retrieved 13 February 2006.
- ↑ "Gay". Oxford English Dictionary. Oxford University Press. Archived from the original on 21 May 2018. Retrieved 13 February 2018.
- ↑ "GLAAD Media Reference Guide - LGBTQ Terms". GLAAD (in ஆங்கிலம்). 2022-02-24. Archived from the original on 23 April 2022. Retrieved 2023-03-27.
- ↑ "Avoiding Heterosexual Bias in Language". American Psychological Association. Archived from the original on 21 March 2015. Retrieved 14 March 2015. (Reprinted from American Psychologist, Vol 46(9), Sep 1991, 973-974 பரணிடப்பட்டது 3 சூன் 2018 at the வந்தவழி இயந்திரம்)
- ↑ Winterman, Denise (18 March 2008). "How 'gay' became children's insult of choice" இம் மூலத்தில் இருந்து 2 February 2014 அன்று. பரணிடப்பட்டது.. https://web.archive.org/web/20140202204245/http://news.bbc.co.uk/2/hi/7289390.stm.
- ↑ Christiansen, Jen (April 6, 2006). "Anti-gay abuse seen to pervade U.S. schools". Gay.com. Archived from the original on 1 March 2007. Retrieved 27 April 2026.
- ↑ "Harassment Prevention in 2026". www.workforcebulletin.com. 3 March 2026.
- ↑ "LILLIENDAHL v ICELAND". 8 September 2020.
- ↑ "The Great Social Evil". Archived from the original on 2 April 2016. Retrieved 5 September 2012. Punch magazine, Volume 33, 1857, page 390. A stand-alone editorial cartoon, no accompanying article.
- ↑ xoregos (2 December 1941). "The Gay Parisian (1941)". IMDb. Archived from the original on 9 February 2017. Retrieved 1 July 2018.
- ↑ "Understanding sexual orientation and homosexuality". APA. 2008. Archived from the original on 5 May 2012. Retrieved 24 May 2012.
- ↑ Rosario, M.; Schrimshaw, E.; Hunter, J.; Braun, L. (2006). "Sexual identity development among lesbian, gay, and bisexual youths: Consistency and change over time". Journal of Sex Research 43 (1): 46–58. doi:10.1080/00224490609552298. பப்மெட்:16817067. பப்மெட் சென்ட்ரல்:3215279. https://archive.org/details/sim_journal-of-sex-research_2006-02_43_1/page/46.
- ↑ Tatchell, Peter (27 November 2006). "Just a phase". The Guardian (London) இம் மூலத்தில் இருந்து 30 August 2013 அன்று. பரணிடப்பட்டது.. https://web.archive.org/web/20130830212725/http://www.theguardian.com/commentisfree/2006/nov/27/isgayjustaphase.
வெளி இணைப்புகள்
[தொகு]
பொதுவகத்தில் gay தொடர்பாக ஊடகக் கோப்புகள் உள்ளன.
விக்கிமேற்கோளில் ஆண்விழையான் சம்பந்தமான மேற்கோள்கள்:
