அஸ்கோ பார்ப்போலா
அஸ்கோ பார்ப்போலா (பி. 1941) பின்லாந்து நாட்டு எல்சிங்க்கி பல்கலைக்கழகத்தின் ஆசிய, ஆப்பிரிக்கப் படிப்புகளுக்கான நிலையத்தில் இந்தியவியல் துறை பேராசிரியராக இருந்து ஒய்வு பெற்றவர். எல்சிங்க்கியில் நடைபெற்ற (14-19 சூலை, 2003) 12-வது உலக சமசுக்கிருத மாநாட்டிற்குத் தலைவராக இருந்தவர்.[1] 2009-ஆம் ஆண்டிற்கான “கலைஞர் மு.கருணாநிதி செம்மொழித் தமிழ் விருதை” பார்ப்போலாவிற்கு வழங்குவது என முதல்வர் கருணாநிதி, அண்ணாப் பல்கலைக்கழக முன்னாள் துணைவேந்தர் வா. செ. குழந்தைசாமி, நீதிபதி எஸ்.மோகன், செக்கோசுலோவாக்கியா நாட்டு தமிழறிஞர் பேராசிரியர் சரோசுலாவ் வாசெக், கல்வெட்டியல் அறிஞர் ஐராவதம் மகாதேவன், கவிஞர் அப்துல் ரகுமான் ஆகியோர் அடங்கிய குழு ஒருமனதாக முடிவெடுத்துள்ளது. பார்ப்போலாவிற்கு இவ்விருது உலகத்தமிழ்ச் செம்மொழி மாநாட்டின் போது அளிக்கப்படும்.[2].
சாம வேதத்தில் குறிப்பிடத்தக்க ஆய்வுகளைச் செய்துள்ள பார்ப்போலா, கேரளாவில் பான்சால் என்ற இடத்திலுள்ள ஒரு புகழ்பெற்ற நம்பூதிரி அறிஞரிடன் சாம வேதத்தைக் கற்றறிந்தார். சமக்கிருதத்திலும் (குறிப்பாக வேதிய சமக்கிருதம்) சிந்து சமவெளி நாகரிகத்திலும் வல்லுநரான பார்ப்போலாவின் இரண்டு தொகுதிகளடங்கிய சிந்து வரிவடிவமும் சமயமும் / முத்திரைகள் மற்றும் (கல்வெட்டு) எழுதுகைகளின் திரட்டு சிந்து சமவெளி நாகரிகத்தைப் பற்றி அறிந்து கொள்ள விரும்புபவர்களுக்கு உள்ளதொரு தரமான தொகுப்பு;[3]
பார்ப்போலாவின் ஆராய்ச்சிகள்[தொகு]
- சிந்து நாகரிகம்: சிந்து வரிவடிவம் & சமயம் / முத்திரைகள் மற்றும் (கல்வெட்டு) எழுதுகைகளின் திரட்டு
- வேதம்: வேதச் சடங்குகள் / சாமவேத, ஜைமினியவேத உரைகள், சடங்குகள் / பூர்வ மீமாம்சம்
- தெற்காசிய மதங்கள்: இந்துமதம் / சைவ, சத்தி பரபுகள் (சாக்த மரபுகள்) / துர்கை
- தென்னிந்தியா: கேரளா / தமிழ்நாடு / கர்நாடகா
- சமக்கிருதம் / மலையாளம் / தமிழ் / இந்திய மொழிகளின் முன்வரலாறு
- தெற்காசியாவின் வரலாற்று-முற்காலத் தொல்பொருளியல் / ஆரியர்களின் வருகை [4]
