அழ. வள்ளியப்பா

கட்டற்ற கலைக்களஞ்சியமான விக்கிப்பீடியாவில் இருந்து.
Jump to navigation Jump to search
அழ. வள்ளியப்பா

பிறப்பு வள்ளியப்பா
நவம்பர் 7, 1922(1922-11-07)
இராயவரம், புதுக்கோட்டை மாவட்டம், தமிழ்நாடு, இந்தியா
இறப்பு மார்ச்சு 16, 1989(1989-03-16) (அகவை 66)
சென்னை
தொழில் கவிஞர், பத்திரிகை ஆசிரியர், குழந்தை எழுத்தாளர், வங்கிப் பணியாளர்
நாடு இந்தியர்
இனம் தமிழர்
நாட்டுரிமை இந்தியர்
கல்வி பள்ளியிறுதி வகுப்பு
இலக்கிய வகை தமிழ் இலக்கியம்
கருப்பொருட்கள் குழந்தை இலக்கியம்
இயக்கம் குழந்தை எழுத்தாளர் சங்கம்
குறிப்பிடத்தக்க
படைப்பு(கள்)
மலரும் உள்ளம்
குறிப்பிடத்தக்க
விருது(கள்)
"தமிழ்ப் பேரவைச் செம்மல்" விருது
துணைவர்(கள்) வள்ளியம்மை
பிள்ளைகள் 5

அழ. வள்ளியப்பா (நவம்பர் 7, 1922- மார்ச் 16, 1989) குழந்தை இலக்கியங்கள் படைத்த மிக முக்கியமான கவிஞர். 2,000 க்கும் மேலான குழந்தைகளுக்கான பாடல்கள் எழுதியுள்ளார்.

பிறப்பு[தொகு]

புதுக்கோட்டை மாவட்டத்திலுள்ள இராயவரத்தில் 1922 ஆம் ஆண்டு பிறந்தார். இவர் நகரத்தார் சமூகத்தைச் சேர்ந்த அழகப்ப செட்டியார், உமையாள் ஆச்சி தம்பதியருக்கு மகனாகப் பிறந்தார். பெற்றோர் இவருக்குச் சூட்டிய பெயர் வள்ளியப்பன். ஐந்தாம் வயதில் தான் பிறந்த வீட்டிற்கு அடுத்த வீட்டில் வாழ்ந்த அழகப்பன் என்பவருக்குத் தத்துப்பிள்ளையாகச் சென்றார். [1] இராயவரம் காந்தி ஆரம்பப் பள்ளியில் ஐந்தாம் வகுப்பு வரை படித்தார். பின்னர் இராமச்சந்திரபுரத்தில் உள்ள பூமீசுவரசுவாமி இலவச உயர்நிலைப் பள்ளியில் படித்தார்.

எழுத்துப் பணி தொடக்கம்[தொகு]

தொடர்ந்து படிக்க முடியாததால் 1940 ஆம் ஆண்டில் வாழ்வாதாரம் தேடி வை. கோவிந்தனின் சென்னை சக்தி பத்திரிகை அலுவலகத்தில் காசாளராகச் சேர்ந்தார். அப்போது சக்தி ஆசிரியராக இருந்த தி. தி. ஜ. ரங்கநாதனின் ஊக்குவிப்பின் காரணமாக சக்தி இதழிலேயே எழுத ஆரம்பித்தார். "ஆளுக்குப் பாதி" என்னும் தம் முதல் கதையை எழுதினார்.

சக்தியில் பணியாற்றிய போது வள்ளியம்மை என்பாரைத் திருமணம் செய்தார். இவர்களுக்கு ஒரு மகனும், நான்கு மகள்களும் உள்ளனர்.

1941 -ல் சக்தியில் இருந்து விலகி இந்தியன் வங்கியில் சேர்ந்தார். வங்கிப் பணியில் இருந்தவாறு கவிதையும் கட்டுரையும் எழுதத் தொடங்கியவர் 1982 -ல் வங்கிப் பணியிலிருந்து ஓய்வு பெறும் வரை எழுதினார். ஓய்வுக்குப் பின்பும் எழுதிக் கொண்டுதான் இருந்தார்.

செய்தித்தாள் ஆசிரியர்[தொகு]

வங்கிப் பணியில் இருக்கும்போதே பாலர் மலர், டமாரம், சங்கு ஆகிய செய்தித் தாள்களுக்கு கௌரவ ஆசிரியராகப் பணியாற்றினார். 1951 முதல் 1954 வரை பூஞ்சோலை என்ற இதழுக்கும், ஓய்வு பெற்ற பின் 1983 முதல் 1987 வரை, கல்கி வெளியீடான கோகுலம் என்ற இதழிலும் ஆசிரியராக இருந்தார்.

குழந்தை எழுத்தாளர் சங்கம்[தொகு]

குழந்தை எழுத்தாளர்கள் பலரைத் திரட்டி 1950 -ல் குழந்தை எழுத்தாளர்கள் சங்கம் என்ற அமைப்பை உருவாக்கினார். சக்தி வை.கோவிந்தன் இச்சங்கத்தின் முதல் தலைவராக இருந்தார். அவரைத் தொடர்ந்து வள்ளியப்பா இந்த அமைப்பின் காரியதரிசியாகவும், தலைவராகவும், வழிகாட்டியாகவும் பல பொறுப்புகளை ஏற்றுச் செயல்பட்டார். காரைக்குடி குழந்தை எழுத்தாளர் சங்கத் தலைவராகப் பொறுப்புவகித்தார்.[1]

உறுப்பினர்[தொகு]

அழ. வள்ளியப்பா இலக்கியம், நூல், கலை தொடர்பான பின்வரும் குழுகளில் பங்காற்றினார்:[1]

  1. தமிழ்நாட்டு அரசினரின் குழந்தை இலக்கிய வளர்ச்சி - ஆராய்ச்சிக் குழு
  2. திரைப்படப் பரிசுத்தேர்வுக் குழு
  3. பாரதீய வித்யா பவன் ஆட்சிக்குழு
  4. தேசிய புத்தக டிரஸ்ட் ஆலோசனைக்குழு


காணொளி வழியில் அழ. வள்ளியப்பாவின் பாடல்கள் சில[தொகு]

செல்லமே செல்லம் எனும் YouTube சேனலில் திரு அழ வள்ளியப்பாவின் நூல்களை குறிப்பாக கொண்டு பல பாடல்கள் குழந்தைகளுக்காக அனிமேஷன் வடிவில் இருக்கின்றன .

அவற்றுள் சில :

  1. வேடிக்கை பாடல்கள்
  2. கதை பாடல்கள்

மற்றும் பல https://www.youtube.com/user/MagicboxTamRhy

நூல்கள்[தொகு]

அழ. வள்ளியப்பா 11 பாடல் தொகுதிகள், 12 புதினங்கள், 9 கட்டுரை நூல்கள், 1 நாடகம், 1 ஆய்வு நூல், 2 மொழிபெயர்ப்பு நூல்கள், 1 தொகுப்பு நூல் ஆகியவற்றை வெளியிட்டுள்ளார். இவற்றில், 2 நூல்கள் இந்திய நடுவண் அரசின் பரிசும், 6 நூல்கள் தமிழக அரசின் பரிசும் பெற்றன.

  1. அம்மாவும் அத்தையும்
  2. இனிக்கும் பாடல்கள் (பாடல்)
  3. ஈசாப் கதைப் பாடல்கள் (பாடல்)
  4. உமாவின் பூனைக் குட்டி
  5. எக்காலத்துக்கும் ஏற்றக் கதைகள் (கதைகள்)
  6. எங்கள் கதையைக் கேளுங்கள் (விலங்கியல்)
  7. எங்கள் பாட்டி
  8. கதை சொன்னவர் கதை (வரலாறு)
  9. குதிரைச் சவாரி (கதை)
  10. குழந்தைக் கவிஞரின் கதைப் பாடல்கள் முதல் தொகுதி (பாடல்)
  11. குழந்தைக் கவிஞரின் கதைப் பாடல்கள் இரண்டாம் தொகுதி (பாடல்)
  12. கேள்வி நேரம்
  13. சிட்டுக் குருவி
  14. சிரிக்கும் பூக்கள் (பாடல்)
  15. சின்னஞ்சிறு பாடல்கள் (பாடல்)
  16. சின்னஞ்சிறு வயதில் (வரலாறு)
  17. சுதந்திரம் பிறந்த கதை (வரலாறு)
  18. சோனாவின் பயணம் (கதை)
  19. திரும்பி வந்த மான் குட்டி (கதை)
  20. நமது நதிகள்: தென்னாட்டு ஆறுகள் (புவியியல்), தேசிய புத்தக டிரஸ்ட், புதுதில்லி. 14 மொழிகளில் மொழிபெயர்க்கப்பட்டது.
  21. நல்ல நண்பர்கள் (கதை)
  22. நான்கு நண்பர்கள் (கதை)
  23. நீலா மாலா (கதை)
  24. நேரு தந்த பொம்மை
  25. நேருவும் குழந்தைகளும்
  26. பாப்பாவுக்குப் பாட்டு (பாடல் தொகுதி)
  27. பர்மா ரமணி (கதை)
  28. பாட்டிலே காந்தி கதை (பாடல் வரலாறு)
  29. பாட்டுப் பாடுவோம் (பாடல்)
  30. பாடிப் பணிவோம் (பாடல்)
  31. பாலர் பாடல் (பாடல்)
  32. பிள்ளைப் பருவத்திலே! (வரலாறு)
  33. பெரியோர் வாழ்விலே முதல் தொகுதி (வரலாறு)
  34. பெரியோர் வாழ்விலே இரண்டாம் தொகுதி (வரலாறு)
  35. மணிக்கு மணி
  36. மலரும் உள்ளம் முதல் தொகுதி (பாடல்), 1944 முதற்பதிப்பு, 23 பாடல்கள் கொண்டது, பழனியப்பா பிரதர்ஸ், சென்னை.
  37. மலரும் உள்ளம் முதல் தொகுதி (பாடல்), 1954 இரண்டாம்பதிப்பு, 135 பாடல்கள் கொண்டது.
  38. மலரும் உள்ளம் இரண்டாம் தொகுதி (பாடல்), 1961
  39. மல்லிகை (பாடல்)
  40. மிருகங்களுடன் மூன்று மணி
  41. மூன்று பரிசுகள்
  42. ரோகந்தாவும் நந்திரியாவும்
  43. ரோஜாச் செடி
  44. வாழ்க்கை விநோதம்
  45. விடுகதை விளையாட்டு
  46. வித்தைப் பாம்பு (மொழிபெயர்ப்புக் கதை)
  47. வெளிநாட்டு விடுகதைகள்
  48. வேட்டை நாய்

சொற்பொழிவுகள்[தொகு]

பாராட்டும் விருதும்[தொகு]

  • குழந்தைகள் இலக்கிய முன்னோடி, பிள்ளைக் கவியரசு, மழலைக் கவிச் செம்மல் என்று சில அமைப்புகள் பாராட்டி போற்றியுள்ளனர்.
  • 1982 -ல் மதுரை காமராசர் பல்கலைக் கழகத்தினால் "தமிழ்ப் பேரவைச் செம்மல்" என்று விருதளிக்கப்பட்டு பாராட்டப்பட்டார்.

சான்றடைவு[தொகு]

  1. 1.0 1.1 1.2 பூவண்ணன் எழுதிய குழந்தைக்கவிஞர் வள்ளியப்பா: வாழ்க்கை வரலாறு, சென்னை வானதி பதிப்பகம், 1982 நவம்பர்

வெளி இணைப்புகள்[தொகு]

"https://ta.wikipedia.org/w/index.php?title=அழ._வள்ளியப்பா&oldid=2734428" இருந்து மீள்விக்கப்பட்டது