அமாசு ராப்பப்போர்ட்
அமாசு ராப்பபோர்ட் (Amos Rapoport, 28 மார்ச் 1929 – 29 செப்டம்பர் 2026) என்பவர் அமெரிக்கக் கட்டடக்கலைஞரும், கட்டடக்கலைப் பேராசிரியரும் ஆவார். வீடுகளின் வடிவத்திற்கும், பண்பாட்டிற்கும் இடையிலான தொடர்பாக இவர் மேற்கொண்ட ஆய்வுகளும், அதன் விளைவாக இவர் 1969-ஆம் ஆண்டில் எழுதிய வீட்டு வடிவமும் பண்பாடும் (House Form and Culture) என்னும் தலைப்பிட்ட நூலும் பெரிதும் அறியப்பட்டவை. இத்துறையில் ஒரு முன்னோடி ஆய்வான இவரது ஆய்வுக் கட்டடக் கலை ஆய்வாளர்களில் கவனத்தை மிகக் குறைவாகவே பெற்றுவந்த குடிசை வீடுகள் முதலியவற்றை உள்ளடக்கிய நாட்டார் கட்டடக்கலை தொடர்பில் புதிய ஆர்வத்தை ஏற்படுத்தியது. இது, உயர் பண்பாடுகளுக்குரிய கட்டடங்களை மட்டுமே கட்டடக்கலையாகப் பார்த்த நிலையை மாற்றி பல்வேறு இன மக்களின் மரபுவழிக் கட்டடக் கலையின் பால் பலரையும் ஈர்த்தது என்று கூறலாம்.[1][2][3]
இளமைக்காலம்
[தொகு]அமாசு இராப்பப்போர்ட் போலந்து நாட்டில் உள்ள வார்சோ நகரில் 1929-ஆம் ஆண்டில் பிறந்தார். மெல்பேர்ன் பல்கலைக்கழகத்தில் கட்டடக்கலை பயின்ற இராப்பப்போர்ட், 1954-ஆம் ஆண்டில் கட்டடடக்கலையில் இளநிலைப் பட்டம் (B. Arch) பெற்றார். பின்னர் ரைசு பல்கலைக்கழகத்தில் சேர்ந்து, 1956-ஆம் ஆண்டில் கட்டடக்கலையில் முதுநிலைப் பட்டமும் (M. Arch) பெற்றார். 1962-ஆம் ஆண்டில் மெல்பேர்ன் பல்கலைக்கழகத்திலிருந்து நகரம் மற்றும் பிரதேசத் திட்டமிடலில் பட்டப்பின் பட்டயக் கல்வியும் பெற்றார்.
தொழில்
[தொகு]1952 முதல் 1961 வரை பல அலுவலகங்களிலும் கட்டடக்கலைத்துறையில் பணிபுரிந்தார். இலண்டன் பல்கலைக்கழகக் கல்லூரி, பேர்க்லியில் உள்ள கலிபோர்னியா பல்கலைக்கழகம், ஆசுத்திரேலியாவில் உள்ள சிட்னிப் பல்கலைக்கழகம், மெல்பேர்ன் பல்கலைக்கழகம், விசுக்கோன்சின் - மில்வோக்கி பல்கலைக்கழகம் ஆகிய பல்கலைக் கழகங்களில் பேராசிரியராகப் பணிபுரிந்துள்ள இவர், இசுரேல், துருக்கி, பெரிய பிரித்தானியா, ஆர்சென்டீனா, பிரேசில், கனடா, மெக்சிக்கோ, பியுட்டோ ரிக்கோ, இந்தியா, சுவிட்சர்லாந்து, போன்ற பல நாடுகளின் பல்கலைக்கழகங்களில் வருகைப் பேராசிரியராகவும் இருந்துள்ளார்.
இறப்பு
[தொகு]அமாசு இராப்பப்போர்ட் 2026 செப்டம்பர் 29 அன்று தனது 97-ஆவது அகவையில் காலமானார்.[4]
அமாசு ராப்பப்பொர்ட் எழுதிய நூல்கள்
[தொகு]- House Form and Culture (வீட்டு வடிவமும் பண்பாடும்) - 1969
- Human Aspects of Urban Form (நகரிய வடிவத்தின் மானிட அம்சங்கள்) - 1977
- Meaning of Built Environment (கட்டிடச் சூழலின் பொருள்) - 1982
- History and Precedent in Environmental Design (சூழல் வடிவமைப்பில் வரலாறும், முன்மதிரியும்) - 1990
- Cukture, Architecture and Desugn (பண்பாடும் கட்டடக்கலையும் வடிவமைப்பும்)
மேற்கோள்கள்
[தொகு]- ↑ Ingold, Tim (2002) Companion Encyclopedia of Anthropology, Taylor & Francis
- ↑ TU Darmstadt: "Public Lecture of the Australian / American Architectural anthropologist Prof. Amos Rapoport" பரணிடப்பட்டது 2016-03-04 at the வந்தவழி இயந்திரம், 2010, retrieved 9 August 2015
- ↑ Caves, R. W. (2004). Encyclopedia of the City. Routledge. pp. 556. ISBN 9780415252256.
- ↑ "Goodman-Bensman Funeral Home". www.goodmanbensman.com. Retrieved 2026-10-05.
