ஹொங்கொங் காரணப் பெயர்

முத்து ஆற்று முகத்துவாரத்தில் ஹொங்கொங்

ஹொங்கொங் பெயர் எவ்வாறு வழக்கில் வந்தது என்றால், கண்டோனிஸ் அல்லது ஹக்கா எனும் மொழிகளில் ஒன்றில் இருந்தே தோற்றம் பெற்றதாகக் கூறப்படுகின்றது. இருப்பினும் ஹொங்கொங் எனும் சொல்லுக்கான கண்டோனிக்ஸ் மொழியின் பொருள் "நறுமணம் வீசும் துறைமுகம்" (Fragrant Harbour) என்பதாகும். அதாவது கண்டோனிஸ் சொற்களான Heung மற்றும் Gong என்பவையே Fragrant என்றும் Harbour என்றும் பொருள் தருகின்றன.

ஹொங்கொங் பெயர் வழங்கப்பட்ட இடம்

ஹொங்கொங் எனும் பெயர் 1842 ஆம் ஆண்டிற்கு முன்பு; தற்போது எபர்டீன் (Aberdeen) என்றழைக்கப்படும் இடத்திற்கும், அப் லெய் ச்சாவ் தீவுக்கும் (Ap Lei Chau) இடையில் அமைந்திருக்கும் சிறிய குடா பகுதியை குறிக்கும் ஒரு பெயராகத்தான் இருந்துள்ளது. இப்பகுதியில் வசித்து வந்த மீனவர்கள் தமது பேச்சு வழக்கில் இப்பெயரை பயன்படுத்தியுள்ளனர். இந்த சிறிய குடா பகுதியே பிரித்தானிய கப்பற் படையினருக்கும் இத்தீவின் பூர்வக் குடிகளாக வாழ்ந்த மீனவர்களுக்கும் இடையிலான தொடர்பாடலுக்கு முதல் புள்ளியாக அமைந்தது. தென்சீனக் கடல் நீரோடு முத்து ஆற்று நீர் (Pearl River) வந்து கலக்கும் முகத்துவாரப் பகுதியிலேயே இத்தீவுகள் இருந்துள்ளன. எனவே இத்தீவுகளை அண்டியப் பகுதி கடல், முத்து ஆற்றின் நன்னீர் உட்புகும் கடலாகையால் இக்கடல் பரப்பின் நீர் சுவையானதாகவும் நறுமணமுடையதாகவும் இருப்பதாக இப்பகுதி வாழ் மீனவர்கள் கூறுகின்றனர். இதனாலேயே இவர்கள் இக்கடல் பகுதிக்கு ஹொங்கொங் (நறுமணம் வீசும் துறைமுகம்) என்று அழைத்தனராம். இன்றும் இந்த கடல் பகுதின் நீர் உப்பு சுவை அற்றதாகவே இருக்கின்றது. இந்த கடலில் பிடிக்கப்படும் மீன்களும் நன்னீர் மீன்கள் (குளத்து மீன்கள்) போன்று உப்பற்றதாகவே இருப்பது குறிப்பிடத்தக்கது.

ஹொங்கொங் பெயர் வரலாற்றில் பதிவு

ஹொங்கொங் தீவு

ஹொங்கொங் தீவு, கவ்லூண் தீபகற்பம் 1860

ஹொங்கொங் ஆளுகைக்கு உட்பட்ட முழு நிரப்பு

1842 ஆம் ஆண்டு இத்தீவு பிரித்தானியரின் ஆட்சிக்கு உட்பட்டப்பொழுது இத்தீவையும் இத்தீவை அண்டிய கடல் பகுதியையும் குறிக்கும் பெயராகியது. இருப்பினும் முதலாம் அபின் போர் (First Opium War) முடிவடைந்து, 1842 இல் நான்கிங் உடன்படிக்கை (Treaty of Nanking) கைச்சாத்திடப்பட்ட பொழுதே ஹொங்கொங் எனும் பெயர் உலக வரலாற்றில் முதன்முதல் இத்தீவுக்கான பெயராகப் பதிவு செய்யப்பட்டது.

ஹொங்கொங் தீவு - கவ்லூண் தீபகற்பம்

அதனைத் தொடர்ந்து 1860 ஆம் ஆண்டு இரண்டாம் அபின் போர் (Second Opium War) இன் பிறகு மேற்கொண்ட பெக்கிங் மாநாடு (Convention of Peking) உடன்படிக்கைப் படி ஹொங்கொங் தீவுடன், கவ்லூண் தீபகற்ப நிலப்பரப்பும் (Kowloon peninsula) கல்லுடைப்பான் தீவும் (Stonecutter Island) பிரித்தானியரின் ஆட்சி வசமானது. அதன்பின் இந்த இரண்டு பகுதிகளுக்குமான பொதுப்பெயராக ஹொங்கொங் என அழைக்கப்பட்டது.

ஹொங்கொங் தீவு, கவ்லூண் தீபகற்பம், புதிய அரசக் கட்டுப்பாட்டுப்பகுதி

1898 யூன் 9 ஆம் நாள் பிரித்தானியா, சீனப் பேரரசு இரண்டும் செய்துக்கொண்ட இன்னுமொரு உடன்படிக்கையின் படி இரண்டாம் பெக்கிங் மாநாடு (Second Convention of Peking) சீனாவின் ஷம் ச்சுன் ஆற்றின் (Sham Chun River) தெற்காக உள்ள அகன்ற நிலப்பரப்பும், அதனைச் சுற்றியுள்ள 262 தீவுத் தொகுதிகளும் 99 ஆண்டுகளுக்கான குத்தகையின் அடிப்படையில் அந்நிலப்பரப்பின் ஆட்சிப் பொருப்பை சீனப்பேரரசு பிரித்தானியாவிடம் கையளித்தது. பிரித்தானியா அந்நிலப்பரப்பை புதிய அரச கட்டுப்பாட்டுப் பகுதி (New Territories) யாக அறிவித்தது.

இவ்வாறு ஹொங்கொங் எனும் பெயர் முதலில் ஹொங்கொங் தீவை மட்டும் குறிக்கும் பெயராகவும், 1860 களின் பின் ஹொங்கொங் தீவையும் கவ்லூண் தீபகற்பப் பகுதியையும் குறிக்கும் பெயராகவும், 1898 யூன் 9 ஆம் நாளின் பின் ஹொங்கொங் தீவையும், கவ்லூண் பகுதியையும், ஷம் ச்சுன் ஆற்றின் தெற்காக உள்ள அகன்ற நிலப்பரப்புடன் அதனை அண்டிய 262 தீவுகளையும் உள்ளடக்கிய முழு நிலப்பரப்புக்குமான பெயராக ஹொங்கொங் பதிவுசெய்யப்பட்டு பிரித்தானியர் வசமானது. அத்துடன் கடல் பரப்பும் ஹொங்கொங் ஆட்சிக்குட்பட்ட தனித்துவமான எல்லைகளையும் கொண்டுள்ளது.

தற்போது ஹொங்கொங்

1997 ஆம் ஆண்டு பிரித்தானியா ஹொங்கொங் மீண்டும் சீனாவிடம் கையளித்தது. அதன்பின்பு சீன மக்கள் குடியரசின் சிறப்பு நிர்வாகப் பகுதியாக பிரித்தானியரின் ஆட்சிக்குட்பட்டிருந்த அதே எல்லைகளுடனான நிலப்பரப்பு ஹொங்கொங் எனும் பெயரிலேயே அழைக்கப்படுகின்றது.

வெளியிணைப்புகள்

• http://www.asiatravel.com/hknut.html பரணிடப்பட்டது 2007-10-17 at the வந்தவழி இயந்திரம்