யோனாகுனி நினைவுச்சின்னம்
யோனாகுனி நினைவுச்சின்னம் (Yonaguni Monument) என்பது யப்பான் நாட்டின் தென்மேற்குப் பகுதியிலுள்ள இரியூக்கியூ தீவுகளில் ஒன்றான[1][2] யோனாகுனி தீவின் தென் கடற் பகுதியில், கடலுக்கடியில் மூழ்கிய நிலையில் காணப்படும் சிதைந்த பாறையாலான ஒரு அமைப்பாகும்.[3] இது யப்பானின் மேற்கு முனையில் அமைந்திருப்பதுடன், தாய்வானிலிருந்து கிட்டத்தட்ட 100 கிலோ மீற்றர் தொலைவிலேயே காணப்படுகின்றது.[4] இது யோனாகுனி பிரமிடு என்றும் அழைக்கப்படுகின்றது.[2] இது முற்றிலும் இயற்கையானதா அல்லது மனிதனால் உருவாக்கப்பட்டு, தற்போது நீருக்கடியில் மூழ்கிய நிலையிலுள்ளதா என்பது பற்றி பல்வேறு கருத்துக்கள் நிலவி வருகின்றன.[3]
வரலாறு[தொகு]
1980 களின் நடுப்பகுதியில், கிஹாஷிரோ அரடேக் என்னும் நீர்மூழ்கி ஒருவரால், கடலுக்கடியில் இந்தப் படிகள் போன்ற பாறையாலான அமைப்புக் கண்டறியப்பட்டது. இது மனிதனால் உருவாக்கப்பட்டதுபோல் படிகளாலான அமைப்பாக இருந்ததனால், மூழ்கிய ஒரு நகரத்தின் சிதைந்த பகுதியென நம்பி, அதனை அறிவித்தார்.[2] அதன் பின்னர் அந்தப் பகுதியானது பல்வேறு தரப்பினரின் ஆய்வுக்கு உட்படுத்தப்பட்டது.
அமைப்பு[தொகு]
இந்த அமைப்பானது மணற்பாறை அல்லது களிமண் பாறையாலான அமைப்பாகக் காணப்படுகின்றது.[5] இந்த அமைப்பு கிட்டத்தட்ட 165 அடி (50 மீற்றர்) நீளமும், 65 அடி (20 மீற்றர்) அகலமும் கொண்ட அமைப்பு என பிரிற்றானிக்காவில் கூறப்பட்டுள்ளது.[3] இது கடலில் 27 மீட்டர் ஆழத்தில் அமைந்துள்ளது எனவும், 150 மீட்டர் நீளமும், 40 மீட்டர் அகலமும் கொண்ட அமைப்பெனவும் வேறு சில தகவல்கள் தெரிவிக்கின்றன.[6] இது படிகளையும், சமமான உச்சி பகுதியையும், சுவர்களையும் கொண்டுள்ளது. தொங்கும் பாறை போன்ற அமைப்பானது இதன் அடித்தளத்தைச் சுற்றி மூன்று பகுதிகளில் காணப்படுகிறது. ஒரு முக்கோணப் பள்ளத்தின் விளிம்புகளில் இரு பெரும் துளைகள் உள்ளது. மனிதனின் முகம் போன்ற 7 மீட்டர் உயரம் உள்ள பாறையும், இரண்டு பெரிய தூண்களும் உள்ளன.
செயற்கை கட்டமைப்பு[தொகு]
சமதள இணை முகங்கள், கூர்மையான விளிம்புகள், நேரான சுவர், மற்றும் தூண்கள் போன்ற அமைப்புக்கள் செதுக்கப்பட்டது போன்ற தோற்றத்தைத் தருவதனால், அவை மனிதனால் செயற்கையாக உருவாக்கப்பட்டிருக்க வேண்டும் என்று கூறப்படுகின்றது. இவற்றின் தோற்றம் 5000[3] - 10,000[5] ஆண்டுகளுக்கு மேலாக இருக்கலாம் என்றும், இலெமூரியா கண்டத்தின் இழப்புகளில் ஒன்றாக இருக்கலாம் எனவும் நம்பப்படுகின்றது.[3]
வெளி இணைப்புக்கள்[தொகு]
மேற்கோள்கள்[தொகு]
- ↑ "Ryukyu-Islands". Encyclopædia Britannica, Inc. பார்க்கப்பட்ட நாள் 2 சூன் 2019.
- ↑ 2.0 2.1 2.2 "YONAGUNI PYRAMID". A Geoglyphic Study of The Yonaguni Monolith, Japan. The Faram Research Foundation. பார்க்கப்பட்ட நாள் 2 சூன் 2019.
- ↑ 3.0 3.1 3.2 3.3 3.4 "Yonaguni Monument, underwater rock structure, near Yonaguni Island, Japan". Encyclopædia Britannica, Inc. பார்க்கப்பட்ட நாள் 2 சூன் 2019.
- ↑ "Yonaguni Island". Okinawa Convention & Visitors Bureau. பார்க்கப்பட்ட நாள் 2 சூன் 2019.
- ↑ 5.0 5.1 "Yonaguni-jima Kaitei Chikei (Yonaguni Monument)". Atlas Obscura. பார்க்கப்பட்ட நாள் 2 சூன் 2019.
- ↑ "10 Facts About the Yonaguni Monument". Ancient Code. பார்க்கப்பட்ட நாள் 2 சூன் 2019.