அறுகுளோரோ இருசிலேன்

அறுகுளோரோ இருசிலேன்

பெயர்கள்
ஐயூபிஏசி பெயர் எக்சாகுளோரோடைசிலேன்
வேறு பெயர்கள் இருசிலிக்கான் அறுகுளோரைடு
இனங்காட்டிகள்
சிஏஎசு எண்	13465-77-5
பண்புகள்
மூலக்கூறு வாய்பாடு	Si2Cl6
வாய்ப்பாட்டு எடை	268.88 கி/மோல்
தோற்றம்	நிறமற்ற திரவம்
உருகுநிலை	−1 °C (30 °F; 272 K)
கொதிநிலை	144 °C (291 °F; 417 K)
மாறுதலாக ஏதும் சொல்லவில்லை என்றால் கொடுக்கப்பட்ட தரவுகள் யாவும் பொருள்கள் அவைகளின் இயல்பான வெப்ப அழுத்த நிலையில் (25°C, 100kPa) இருக்கும்.
Infobox references

அறுகுளோரோஇருசிலேன் (Hexachlorodisilane) என்பது Si₂Cl₆ என்ற மூலக்கூற்று வாய்ப்பாடு கொண்ட ஒரு கனிம வேதியல் சேர்மமாகும். நிறமற்ற திரவமாகக் காணப்படும் இத்திரவம் ஈரக் காற்றில் புகைகிறது. வினைப்பொருள் மற்றும் சிலிக்கான் உலோகத்தின் துரிதமாக ஆவியாகின்ற தயாரிப்பு முன்னோடியாகவும் விளங்குகிறது.

தயாரிப்பு மற்றும் அமைப்பு

அறுகுளோரோஇருசிலேன் மூலக்கூறானது ஈத்தேன் மூலக்கூறின் அமைப்பைப் போலவே Si-Si பிணைப்பு நீளம் 0.233 நானோமீட்டர் அளவுடன் அமைந்துள்ளது .

கால்சியம் சிலிசைடு போன்ற சிலிசைடுகளை குளோரினேற்றம் செய்வதால் அறுகுளோரோ இருசிலேன் உருவாகிறது. இந்தத் தனித்துவ வினை வருமாறு:

CaSi₂ + 4 Cl₂ → Si₂Cl₆ + CaCl₂

வினைகள் மற்றும் பயன்கள்

400°செல்சியசு வெப்பநிலையில் காற்று அல்லது நைட்ரசனில் அறுகுளோரோஇருசிலேன் பல மணி நேரங்களுக்கு நிலைப்புத் தன்மையுடன் உள்ளது. ஆனால் அறை வெப்பநிலையிலும் கூட இலூயிக் அமிலத்தின் முன்னிலையில் பன்னிருகுளோரோநியோஐஞ்சிலேன் மற்றும் சிலிக்கான் நாற்குளோரைடுகளாக மாறுகிறது.

3 Si₂Cl₆ → SiCl₄ + Si₅Cl₁₂

சிலிக்கான் அடிப்படையிலான சேர்மங்களை உருவாக்குவதில் இம்மாற்று முறை பயனுள்ளதாக இருக்கிறது. இச்சேர்மங்கள் ஒளிவோல்ட்டா மின்கலம் போன்ற குறைகடத்தும் கருவிகளில் பயனாகிறது.

பாசுபீன் ஆக்சைடு போன்ற சேர்மங்களில் ,பொதுச் செயல்முறையான ஆக்சிசன் நீக்க வினைகளுக்கும் இச்சேர்மம் ஒரு முகவராகச் செயல்படுகிறது.

2 Si₂Cl₆ + OPR₃ → OSi₂Cl₆ + PR₃