நாடு கடந்த தமிழீழ அரசு

கட்டற்ற கலைக்களஞ்சியமான விக்கிப்பீடியாவில் இருந்து.
Transnational Government of Tamil Eelam
நாடுகடந்த தமிழீழ அரசாங்கம்
உருவாக்கம்17 மே 2010
நோக்கம்விடுதலை தமிழீழம் அமைப்பது
ஆட்சி மொழி
தமிழ்
தலைமையமைச்சர் (பிரதமர்)
விசுவநாதன் உருத்திரகுமாரன்
மைய அமைப்பு
நாடுகடந்த தமிழீழ அரசு
Transnational Constituent Assembly of Tamil Eelam
வலைத்தளம்tgte.org

நாடு கடந்த தமிழீழ அரசு (Transnational Government of Tamil Eelam; TGTE) என்பது புலம்பெயர் ஈழத்தமிழர் மத்தியில் தமிழீழத்தை நிறுவுவதை நோக்கமாகக் கொண்ட ஒரு நாடு கடந்த அரசாங்கம் ஆகும். தமிழீழம் என்பது 1970களின் பிற்பகுதியில் இருந்து தமிழீழ விடுதலைப் புலிகள் அமைப்பினால் ஒரு மதச்சார்பற்ற, சனநாயக சோசலிச அரசை இலங்கையின் வடக்கு மற்றும் கிழக்கு மாகாணங்களில் உருவாக்குவதை நோக்கமாகக் கொண்டது.[1][2]

பன்னாட்டு அமைப்பாக நிறுவப்பட்டுள்ள நாடு கடந்த தமிழீழ அரசில் ஐக்கிய அமெரிக்கா, கனடா, நோர்வே, ஐக்கிய இராச்சியம் உட்படப் பல நாடுகளில் இருந்து பிரதிநிதிகள் உறுப்பினராக உள்ளனர். இதன் தலைவராக விசுவநாதன் உருத்திரகுமாரன் உள்ளார்[3][4] இவ்வமைப்பின் அங்கத்தவர்களைத் தெரிவதற்காக இலங்கை தவிர்த்து வெளிநாடுகளில் வதியும் இலங்கைத் தமிழரிடையே மே 2010 இல் தேர்தல்கள் இடம்பெற்று உறுப்பினர்கள் தேர்ந்தெடுக்கப்பட்டனர்.

செயல்திட்டம்[தொகு]

நாடு கடந்த தமிழீழ அரசாங்கம் ஒன்றினை தற்பொழுதிற்கு உருவாக்குவதற்கான கட்டமைப்புக்களை உருவாக்குவதற்காக வி. உருத்திரகுமாரன் தலைமையில் பின்வரும் விடயங்களைக் கருத்திற் கொண்டு பணியாற்ற செயற்குழு ஒன்று 2009 ஜூன் 16 அமைக்கப்பட்டது[2].

  • 1976 இல் வரையறுக்கப்பட்ட வட்டுக்கோட்டைப் பிரகடனத்தினதும், 1977 இல் நடைபெற்ற பொதுத் தேர்தலில் தமிழ் மக்களால் ஒரு மனதாக வாக்களித்து வரவேற்கப்பட்டதும், பின்பு 1985 இல் திம்புப் பிரகடனத்தில் வெளிப்படுத்தப்பட்டதும், 2003 இல் இடைக்காலத் தன்னாட்சி அதிகாரப்பகிர்வின் தளமாக அமைந்ததுமாகிய
    • தமிழர் ஓர் தேசிய இனம்
    • வடக்கு- கிழக்கு தமிழர் தாயக நிலம்
    • ஈழத் தமிழரின் தன்னாட்சி உரிமை

போன்ற அடிப்படைக் கோட்பாடுகளை ஈழத் தமிழரின் அரசியல் அபிலாசைகளின் ஆதார சுருதியாக ஏற்றுக்கொள்ளும் அனைத்துத் தமிழ் மக்களையும் ஓன்றிணைப்பது.

  • 2001 ஆம் ஆண்டு, 2004 ஆம் ஆண்டு பொதுத் தேர்தல்களின்போது தமிழ் மக்களின் அரசியல் அபிலாசைகளைப் பிரதிபலிக்கும் அரசியல் கட்சியாகத் தமிழ் மக்களினால் ஏற்று உறுதி செய்யப்பட்ட தமிழ்த் தேசியக் கூட்டமைப்புடனும் ஈழத் தமிழரின் தன்னாட்சிக் கோட்பாட்டினை ஏந்தி ஆதரிக்கும் ஏனைய தமிழ் அரசியல் கட்சிகளுடனும் இணைந்து செயற்படுதல்.
  • சிங்களப் தேசத்துடனான பேச்சுவார்த்தைகளுக்கான தமிழர் தேசத்தின் நிலைப்பாடுகளை வெளிப்படுத்தல்.
  • உலகு அனைத்தும் பரவி வாழும் ஈழத் தமிழர் மத்தியில் அனைத்துலக மதிப்பினைப் பெற்ற நிறுவனம் ஒன்றினுடன் இணைந்து வாக்காளர் பட்டியல் ஒன்றினைத் தயாரித்தல். இவ்வாறு தயாரிக்கப்பட்ட வாக்காளர் பட்டியலின் அடிப்படையில் வாக்களிப்பை நடத்தி தமிழ்த் தேசியப் பேரவையினை தெரிவு செய்து இப்பேரவையினூடாக தமிழீழ அரசியல் யாப்பினை வடிவமைத்தலும் தமிழரின் தேசியப் பிரச்சினைக்கு இறுதித் தீர்வு காணும் நோக்குக்கு வழிகோலும் வகையில் பொது வாக்கெடுப்பினை பன்னாட்டு மேற்பார்வையில் நடத்த வழிசெய்தலும்.
  • ஈழத் தமிழர் உலகப்பேரவை ஒன்றினையும், நிறைவேற்று அதிகாரக் குழு ஒன்றினையும் தெரிவு செய்யும் முறைநெறிகளை வரையறை செய்தல்.
  • அரசுகளுடனும், பல் அரசுகள் சார்ந்த நிறுவனங்களுடனும் நேரடித் தொடர்புகளை ஏற்படுத்துதல்.
  • உலகெங்கும் பரவி வாழும் ஈழத் தமிழரின் சமூக, பொருண்மிய, பண்பாட்டு மேம்பாடுகளைத் துரிதப்படுத்தல்.
  • தமிழ் மற்றும் முஸ்லிம் மக்களுக்கிடையிலான வேறுபாடுகளை தமிழர் தன்னாட்சி உரிமைக்கு எதிரான பயத்தை தோற்றுவிக்கும் கருவியாகக் கொள்ளாமல், முஸ்லிம் மக்களுடன் இணைந்து இரு சமூகத்தினரும் ஒருமித்து பங்குபெறும் அரசியல் வழிமுறைகளை இனம் காணுதல்.
  • வடக்கு- கிழக்கில் வாழும் ஈழத் தமிழர்களினதும், உலகெங்கும் வாழும் புலம்பெயர்ந்து வாழும் தமிழ் மக்களினதும் நலன்பேணும் வகையிலான செயற்பாடுகளை ஊக்குவித்தல்.

முதலாவது அமர்வு[தொகு]

நாடு கடந்த தமிழீழ அரசாங்கத்தின் மக்கள் பிரதிநிதிகளைக் கொண்ட அரசவையின் முதலாவது அமர்வு 2010, மே 17-19 ஆம் திகதிகளில் அமெரிக்காவின் பென்சில்வேனியா மாநிலத்தின், பிலடெல்பியா நகரில் அமைந்துள்ள அமெரிக்காவின் அரசியலமைப்பு எழுதப்பட்ட வரலாற்றுப் புகழ் மிக்க தேசிய அரசியலமைப்பு மையத்தில் கூடியது.

இம் அமர்வில் அவுஸ்திரேலியா, கனடா, டென்மார்க், பிரான்ஸ், சுவிட்சர்லாந்து, பிரித்தானியா, அமெரிக்கா ஆகிய நாடுகளில் இருந்து நாடு கடந்த தமிழீழ அரசாங்கத்துக்காக தெரிவு செய்யப்பட்ட மக்கள் பிரதிநிதிகள் நேரடியாகக் கலந்து கொண்டனர்[5].

வலைதளம்[தொகு]

இந்த அமைப்பின் வலைதளம்

மேற்கோள்கள்[தொகு]

  1. "Lanka asks European countries not to support LTTE remnants". ஹிந்துஸ்தான் டைம்ஸ். 15 May 2010 இம் மூலத்தில் இருந்து 18 மே 2010 அன்று. பரணிடப்பட்டது.. https://web.archive.org/web/20100518120125/http://www.hindustantimes.com/News-Feed/srilanka/Lanka-asks-Europe-not-to-support-LTTE-remnants/Article1-544056.aspx. 
  2. 2.0 2.1 நாடு கடந்த தமிழீழ அரசு: வரலாற்றுத் தேவை, சட்டப் பின்னணி, வேலைத் திட்டங்கள், ஆலோசனைக் குழு: உருத்திரகுமாரன் விளக்கம், புதினம், 16 ஜூன் 2009
  3. Haviland, Charles (15 செப்டம்பர் 2009). "Tamil exiles to form 'government'". பிபிசி. http://news.bbc.co.uk/1/hi/world/south_asia/8257144.stm. 
  4. "Tamils proposed Provisional ”Transnational Government of Tamil Eelam (PTGTE)”". UKTamilNews.com. 20 செப்டம்பர் 2009. http://www.uktamilnews.com/?p=5229. [தொடர்பிழந்த இணைப்பு]
  5. நாடு கடந்த தமிழீழ அரசாங்கத்தின் முதலாவது அமர்வு பரணிடப்பட்டது 2010-05-24 at the வந்தவழி இயந்திரம், தமிழ்வின், மே 21, 2010

வெளி இணைப்புகள்[தொகு]

"https://ta.wikipedia.org/w/index.php?title=நாடு_கடந்த_தமிழீழ_அரசு&oldid=3442757" இலிருந்து மீள்விக்கப்பட்டது