மட்சுவோ பாஷோ

கட்டற்ற கலைக்களஞ்சியமான விக்கிப்பீடியாவில் இருந்து.
தாவிச் செல்லவும்: வழிசெலுத்தல், தேடல்
ஹிரோசுமி இவேட்டே என்னும் இடத்திலுள்ள பாஷோவின் சிலை

மட்சுவோ பாஷோ (Matsuo Bashō, 1644 - நவம்பர் 28, 1694) மிகவும் புகழ் பெற்ற ஜப்பானின் இடோ காலத்துக் கவிஞர் ஆவார். இவரது வாழ்க்கைக் காலத்திலேயே ஹைக்காய் னொ ரெங்கா என்னும் கவிதை வடிவத்தில் பெயர் பெற்றவராக விளங்கினார். பல நூற்றாண்டுகளுக்குப் பின் இன்று அவர் சுருக்கமானவையும் தெளிவானவையுமான ஹைக்கூ கவிதைகளில் வல்லுனராக ஏற்றுக்கொள்ளப்பட்டுள்ளார். இவர் ஒரு உலகப் புகழ் வாய்ந்த கவிஞர். ஜப்பானில் இவரது கவிதைகள் நினைவுச் சின்னங்களிலும், மரபுசார்ந்த இடங்களிலும் பொறிக்கப்பட்டுள்ளன.

பாஷோ இளம் வயதிலேயே கவிதைத் துறைக்கு அறிமுகமானார். இடோவின் அறிவுசார் சமூகத்துடன் தன்னை இணைத்துக்கொண்ட இவர் விரைவிலேயே ஜப்பான் முழுவதிலும் பெயர் பெற்ற ஒருவரானார். இவர் ஒரு ஆசிரியராகத் தொழில் புரிந்தார். எனினும், இலக்கியத் துறையினரின் சமூக, நகர்சார்ந்த வாழ்க்கை முறையைப் புறந்தள்ளினார். ஹைக்கூ கவிதைகளை எழுதுவதற்கான அகத்தூண்டலைப் பெறுவதற்காக மேற்கு, கிழக்கு, வடக்கு என நாட்டின் பலபகுதிகளுக்கும் சென்றார். தன்னைச் சுற்றியுள்ள உலகத்தைப் பற்றி அவர் பெற்ற நேரடி அனுபவங்கள் அவரது கவிதைகளில் செல்வாக்குச் செலுத்தின. காட்சிகளின் உணர்வுகளைக் கவிதைகளில் எளிமையான கூறுகளில் அவர் அடக்கினார்.

இளமைக்காலம்[தொகு]

பாஷோ 1644 ஆம் ஆண்டளவில், ஈக்கா மாகாணத்தில் உள்ள யுவேனோ என்னும் இடத்துக்கு அண்மையில் உள்ள ஏதோ ஒரு இடத்தில் பிறந்தார். இவரது இயற் பெயர் மட்சுவோ கின்சாக்கு. இவரது தந்தையார் ஒரு கீழ் மட்டத் தரநிலையில் இருந்த ஒரு படைசார் உயர்குடியைச் சேர்ந்தவர் ஆவார். இதனால் பாஷோவுக்குப் படைத்துறையில் தொழில் கிடைக்கக்கூடிய வாய்ப்பு இருந்தது. எனினும் இது அவருக்குக் குறிப்பிடத்தக்க வாழ்க்கை நிலையைக் கொடுத்திருக்காது. இவர் குறித்த மரபுவழி வரலாறுகள் இவர் சமையல் கூடத்தில் பணி புரிந்ததாகக் கூறுகின்றன. எனினும், சிறுவனாக இருந்தபோது பாஷோ, டோடோ யஷித்தாடா என்பவருக்கு வேலையாளாகப் பணிபுரிந்தார். யஷித்தாடாவும், பாஷோவைப் போலவே கூட்டு முயற்சியில் எழுதப்படும் ஒருவகைக் கவிதையான ஹைக்காய் நோ ரெங்கா எனப்படும் கவிதையில் பற்றுக் கொண்டிருந்தார். 1662 ஆம் ஆண்டில் பாஷோவின் முதல் கவிதை வெளியிடப்பட்டது. 1664 இல் இவரது ஹோக்கு கவிதைகள் இரண்டு ஒரு தொகுப்பில் இடம்பெற்றன. 1665 ஆம் ஆண்டில், பாஷோவும், யொஷித்தாடாவும் வேறும் சில நண்பர்களுடன் இணைந்து 100 பாடல்களைக் கொண்ட ரெங்கு கவிதை நூலை ஆக்கினர்.

1666 இல் யொஷித்தாடாவின் திடீர் இறப்பு, ஒரு வேலையாளாக பாசோவுக்கு இருந்த நிம்மதியான வாழ்க்கையை முடிவுக்குக் கொண்டுவந்தது. இவருடைய இக் காலப்பகுதி பற்றிய தெளிவான தகவல்கள் எதுவும் கிடைக்கவில்லை. ஆனால் இவர் சமுராய் தரம் பெறக்கூடிய தனது வாய்ப்பை உதறிவிட்டு வீட்டை விட்டுக் கிளம்பினார் என்று நம்பப்படுகின்றது. எனினும் இவரது கவிதைகள் 1667, 1669, 1671 ஆகிய ஆண்டுகளிலும் தொகுப்பு நூல்களில் தொடர்ந்தும் பதிப்பிக்கப்பட்டு வந்தன.

"http://ta.wikipedia.org/w/index.php?title=மட்சுவோ_பாஷோ&oldid=1387277" இருந்து மீள்விக்கப்பட்டது