பாக்கியசோதி சரவணமுத்து

கட்டற்ற கலைக்களஞ்சியமான விக்கிப்பீடியாவில் இருந்து.
பாக்கியசோதி சரவணமுத்து
Paikiasothy Saravanamuttu
பிறப்பு(1892-10-26)26 அக்டோபர் 1892
இறப்பு28 மே 1950(1950-05-28) (அகவை 57)
இனம்இலங்கைத் தமிழர்
படித்த கல்வி நிறுவனங்கள்இலண்டன் பல்கலைக்கழகம்
பணிஅரசு அதிகாரி
வாழ்க்கைத்
துணை
சிபில் தங்கம்
உறவினர்கள்சகோதரர்கள்: இரத்தினசோதி, நனசோதி, தர்மசோதி, மாணிக்கசோதி, சப்தரணசோதி

பாக்கியசோதி சரவணமுத்து (Paikiasothy Saravanamuttu, 26 அக்டோபர் 1892 - 28 மே 1950) இலங்கை அரசு அதிகாரியும், அரசியல்வாதியும் ஆவார்.

ஆரம்ப வாழ்க்கை[தொகு]

சரவணமுத்து 1892 அக்டோபர் 26 இல் கொழும்பைச் சேர்ந்த மருத்துவர் வேதாரணியம் சரவணமுத்து என்பவருக்குப் பிறந்தார்.[1] இவரது தாயார் யாழ்ப்பாணம் வட்டுக்கோட்டையைச் சேர்ந்தவர்.[2] இவரது தந்தை வழிப் பாட்டனார் வேதாரணியம் என்பவர் வட இலங்கையில் சுன்னாகம் என்ற சிறிய நகரை நிருமாணித்தவர் எனக் கூறப்படுகிறது.[3] சரவணமுத்துவுடன் கூடப் பிறந்தவர்கள் இரத்தினசோதி, நனசோதி, தர்மசோதி, மாணிக்கசோதி, சப்தரணசோதி ஆகியோர் ஆவர்.[1] கல்கிசை புனித தோமையர் கல்லூரில் கல்வி பயின்றார்.[1][2] பள்ளிக்கூட விளையாட்டுக் கழகத்தில் உறுப்பினராக இருந்து, துடுப்பாட்ட, உதைபந்தாட்ட அணிகளிலும் சேர்ந்து விளையாடினார்.[2] இலண்டன் பல்கலைக்கழகத்தின் இளங்கலைப் பட்டம் பெற்ற பின்னர்,[1][2] சரவணமுத்து கொழும்பு றோயல் கல்லூரி சிறிது காலம் ஆசிரியராகப் பணியாற்றினார்.[2] இந்தியக் குடிமைப் பணியில் சேருவதற்காக 1915 ஆம் ஆண்டில் கேம்பிரிட்ச் பிட்சுவில்லியம் கல்லூரியில் சேர்து படித்தார். ஆனாலும், குடும்ப சூழலால், அவரால் படிப்பைத் தொடர முடியாமல் போனது.[2][3]

புத்தளத்தைச் சேர்ந்த வழக்கறிஞர் முத்துக்குமாரு என்பவரின் மகள் சிபில் தங்கம் என்பவரை திருமணம் புரிந்தார். இவர்களுக்கு பாஸ்கி, சந்திரி என இரண்டு ஆண்களும், சகுந்தலா என்ற ஒரு பெண்ணும் பிள்ளைகள் உள்ளனர்.[1] இவர்களில் பாஸ்கியின் மகன் பாக்கியசோதி மாற்றுக் கொள்கைகள் மையத்தின் தலைவராகப் பணியாற்றுகிறார்.[2]

பணி[தொகு]

1919 ஆம் ஆண்டில் இலங்கை திரும்பிய சரவணமுத்து இலங்கைக் குடியுரிமை சேவையில் சேர்ந்து, ஆரம்பத்தில் கொழும்பு கச்சேரியில் பணியாற்றினார்.[2][3] பல்வேறு அரசு அலுவலகங்களில் பணியாற்றிய இவர் குடியுரிமை சேவையாளராகத் தரமேற்றப்பட்டார்.[1] 1926 இல் முல்லைத்தீவிலும் பின்னர் அம்பாந்தோட்டையிலும் மாவட்டச் செயலாளராகப் பணியாற்றினார்.[1][2] பதுளை, களுத்துறை, கேகாலை, குருணாகல் ஆகிய இடங்களில் நீதித்துறை அலுவலராகப் பணியாற்றினார்.[1][2] 1946 இல் விவசாயத்துறை அமைச்சில் பணியாற்றிய பின்னர், தேயிலை, இரப்பர் கட்டுப்பாடு ஆணையாளராக நியமிக்கப்பட்டார்.[1][3] அப்போதைய காலகட்டத்தில் நாட்டிலேயே மிக அதிக வேதனம் பெற்ற அரசு அதிகாரியாக இவர் திகழ்ந்தார்.[2] இவரது போர்கால சேவைக்காக இவருக்கு பிரித்தானிய அரசின் சென் மைக்கேல், சென் ஜோர்ஜ் விருது 1946 புத்தாண்டில் அறிவிக்கப்பட்டதாயினும், அவர் விருதை ஏற்றுக்கொள்ளவில்லை.[2][3]

1946 ஆம் ஆண்டில் இளைப்பாறிய பாக்கியசோதி, அரசியலில் நுழைந்தார்.[2] 1947 1வது நாடாளுமன்றத் தேர்தலில் சுயேட்சை வேட்பாளராக கொழும்பு தெற்கில் போட்டியிட்டு 640 வாக்குகளால் இரண்டாவதாக வந்து தோற்றார்.[4] இத்தேர்தலில் முதலாவதாக வந்து வெற்றி பெற்ற ஆர். ஏ. டி மெல் ஊழல் குற்றச்சாட்டின் பேரில் தனது பதவியை இழந்தார்.[2] 1948 நவம்பரில் நடந்த இடைத்தேர்தலில் பாக்கியசோதி போட்டியிட்டு மீண்டும் தோற்றார்.[5]

சமூகப் பணி[தொகு]

சரவணமுத்து தமிழ் யூனியன் துடுப்பாட்ட, தடகளக் கழகத்தில் இணைந்து அதன் வளர்ச்சிக்குப் பெரும் பங்காற்றினார்.[1] 1948 முதல் 51 வரை இக்கழகத்தின் தலைவராக இருந்து பணியாற்றினார்.[6] கழகத்துக்கான அரங்கம் ஒன்றை நிறுவினார். கொழும்பு ஓவல் என அழைக்கப்படும் இவ்வரங்கத்திகு பாக்கியசோதியின் நினைவாக 1977 ஆம் ஆண்டில் பாக்கியசோதி சரவணமுத்து அரங்கம் எனப் பெயர் மாற்றப்பட்டது.[1][3] பி. சரா விருது என்ற துடுப்பாட்டத் தொடர் 1949 முதல் 1982 வரை விளையாடப்பட்டு வந்தது.[1] சரவணமுத்து 1937 முதல் 1950 வரை இலங்கைத் துடுப்பாட்டக் கழகத்தின் தலைவராகவும், 1949 முதல் 1950 வரை இலங்கைத் துடுப்பாட்ட வாரியத்தின் முதலாவது தலைவராகவும் இருந்து பணியாற்றினார்.[2][3]

மேற்கோள்கள்[தொகு]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 1.11 எஸ். ஆறுமுகம் (1997). Dictionary of Biography of the Tamils of Ceylon. பக். 181. http://www.noolaham.org/wiki/index.php?title=Dictionary_of_Biography_of_the_Tamils_of_Ceylon. 
  2. 2.00 2.01 2.02 2.03 2.04 2.05 2.06 2.07 2.08 2.09 2.10 2.11 2.12 2.13 2.14 "He gave of his best, but died a disillusioned man". சண்டே டைம்சு. 28 மே 2000. http://www.sundaytimes.lk/000528/plus10.html. 
  3. 3.0 3.1 3.2 3.3 3.4 3.5 3.6 Billimoria, Marc (13 ஆகத்து 2004). "The Saravanamuttu Prize at S. Thomas' College". டெய்லி நியூஸ். http://archives.dailynews.lk/2004/08/13/spo10.html. 
  4. "Result of Parliamentary General Election 1947" (PDF). இலங்கைத் தேர்தல் திணைக்களம். Archived from the original (PDF) on 2015-09-24. பார்க்கப்பட்ட நாள் 2014-12-28.
  5. "Summary of By-elections 1947 to 1988" (PDF). இலங்கைத் தேர்தல் திணைக்களம். Archived from the original (PDF) on 2009-12-09. பார்க்கப்பட்ட நாள் 2014-12-28.
  6. "Presidents". Tamil Union Cricket and Athletic Club. Archived from the original on 2017-01-08. பார்க்கப்பட்ட நாள் 2014-12-28.
"https://ta.wikipedia.org/w/index.php?title=பாக்கியசோதி_சரவணமுத்து&oldid=3562512" இலிருந்து மீள்விக்கப்பட்டது